အကြမ်းဖက်အဖွဲ့တွေကို ထောက်ပံ့တာဟာ ဥပဒေအရ အရေးယူခံရနိုင်တယ်လို့ CCCT အကြမ်းဖက်တိုက်ဖျက်ရေး ဗဟိုအဖွဲ့ကနေ ဇန်နဝါရီ ၃၁ ရက် မနက် ၁၀ နာရီလောက်မှာ ATOM (အရင် တယ်လီနော) အော်ပရေတာကတဆင့် စာတိုပေးပို့လာတယ်လို့ စစ်ကိုင်းတိုင်းအတွင်း နေထိုင်သူတဦးက ပြောပါတယ်။
“ဒီနေ့မနက် ၁၀ နာရီလောက်မှာ ATOM (တယ်လီနော) ကနေ အကြမ်းဖက်အဖွဲ့တွေကို ထောက်ပံ့ရင် အရေးယူခံရနိုင်တယ်ဆိုတဲ့စာတို မက်ဆေ့ချ်ဝင်လာတယ်ဗျ။ ဒါ သူတို့လက်အောက်မှာရှိတဲ့ ဖုန်းအော်ပရေတာတွေကို အသုံးချပြီး ပြည်သူတွေကို ခြိမ်းခြောက်တာပဲဗျ။ သူတို့ တော်လှန်ရေးအင်အားစုတွေကို ထောက်ပံ့အားပေးတာ အင်အားလျော့ကျသွားအောင် လက်ကိုင်ဖုန်းရှိသူတိုင်းကို အသိပေးတာဖြစ်လို့ သူတို့ ကြောက်နေပြီဆိုတာ ကောက်ချက်ချလို့ ရနေပြီဗျ” လို့ တော်လှန်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
ပြီးခဲ့တဲ့ ဒီဇင်ဘာ ၂ ရက်ကလည်း ATOM ရဲ့ ဝန်ဆောင်မှုတွေကို ပုံမှန်အတိုင်း ဆက်လက်သုံးစွဲနိုင်ဖို့ စစ်ကောင်စီလက်အောက်ခံ ဆက်သွယ်ရေးညွှန်ကြားမှုဦးစီးဌာနရဲ့ ညွှန်ကြားချက်နဲ့ လက်ရှိသုံးစွဲနေတဲ့ ATOM ဆင်းကတ်တွေကို အချက်အလက်မှန်ကန်စွာ မှတ်ပုံတင်ထားခြင်းရှိမရှိ စစ်ဆေးဖို့နဲ့ မှန်ကန်မှုမရှိပါက ပြန်လည်ပြင်ဆင် မှတ်ပုံတင်ဖို့ အသိပေး အကြောင်းကြားခဲ့ပါတယ်။
စစ်ကိုင်းတိုင်းအတွင်း MPT နဲ့ Telenor (ATOM) ကိုသာ အသုံးများပြီး တခြားဖုန်းဆင်းကတ် အသုံးပြုသူနည်းပါးကာ အခုလို စာတို မက်ဆေ့ချ်ပေးပို့ခြင်း ရှိမရှိကိုတော့ မသိရှိရဘဲ MPT က မက်ဆေ့ချ်မဝင်သေးတော့ မသိရသေးဘူးလို့ သုံးစွဲသူတွေက ပြောပါတယ်။
စစ်တပ်က အာဏာသိမ်းပြီးနောက် စစ်ကိုင်းတိုင်းအတွင်း ဆက်သွယ်ရေး အော်ပရေတာတွေက ဖုန်းလိုင်း၊ အင်တာနက်လိုင်းတွေကို မကြာခဏ ဖွင့်လိုက်၊ ပိတ်လိုက်လုပ်ကာ စစ်ကောင်စီစစ်ကြောင်းထိုးရင် ဖုန်းလိုင်းတွေဖြတ်ထားပြီး စစ်ကြောင်းထိုးသလို အင်တာနက်လိုင်းလည်း အသုံးပြုလို့မရဘဲ သတင်းစီးဆင်းမှု နှေးကွေးရပ်တန့်အောင် ပြုလုပ်နေတယ်လို့ ဒေသခံတွေဆီက သိရပါတယ်။
သုံးစွဲသူ အမျိုးသမီးငယ်တဦးက “တနေရာရာမှာ တိုက်ပွဲဖြစ်ပြီဆို ဖုန်းလိုင်းဖြတ်တော့တာပဲ၊ သူတို့လုပ်တတ်တာလည်း ဒါပဲရှိတယ်” လို့ ပြောပါတယ်။
အမျိုးသားညီညွတ်ရေးအစိုးရ (NUG)၊ CRPH၊ PDF တွေကို ထောက်ပံ့ကူညီတာတွေ ရပ်တန့်ဖို့၊ တော်လှန်ရေးအရှိန် တားဆီးနိုင်ဖို့ ရည်ရွယ်ပြီး မက်ဆေ့ချ် ပေးပို့ခဲ့တာ ဖြစ်နိုင်တယ်လို့ ဒေသခံပြည်သူတဦးက ဆိုပါတယ်။
အခုလို တယ်လီဖုန်းအော်ပရေတာကတဆင့် စာတိုပေးပို့ဖို့ကို ဇန်နဝါရီ ၁၀ ရက်နေ့ကလုပ်တဲ့ စစ်ကောင်စီရဲ့ အကြမ်းဖက်မှုတိုက်ဖျက်ရေးဗဟိုအဖွဲ့ အစည်းအဝေးမှာ စစ်ကောင်စီပြည်ထဲရေးဝန်ကြီးနဲ့ အပေါင်းပါတွေက ဆွေးနွေးဆုံးဖြတ်ခဲ့တာဖြစ်ပါတယ်။
နိုင်ငံတဝန်းက ဘုန်းတော်ကြီးသင်ပညာရေးကျောင်းတွေနဲ့ မိဘမဲ့ကျောင်းတွေအတွက် ကျပ် သန်း ၁၀၀၀ ကို စတင်လှူဒါန်း ထောက်ပံ့နေပြီလို့ တယ်လီနောကို ဝယ်ယူအမည်ပြောင်းလိုက်တဲ့ အက်တမ် (ATOM) က ထုတ်ပြန်ပါတယ်။
အက်တမ် (ATOM) ဟာ ကော်ပိုရိတ်လူမှုရေးဆိုင်ရာတာဝန်ယူမှု တာဝန်ခံမှုရန်ပုံငွေအဖြစ် ကျပ် သန်း ၃၀၀၀ သတ်မှတ်ထားပြီး ဒီထဲက ကျပ်သန်း ၁၀၀၀ ကို ဘုန်းတော်ကြီးသင် ပညာရေးကျောင်းတွေနဲ့ မိဘမဲ့ကျောင်းတွေအတွက် လိုအပ်နေတဲ့ အရည်အသွေးပြည့်ဝတဲ့ အထောက်အကူပစ္စည်းတွေနဲ့ အခြေခံအဆောက်အအုံတွေကို ပံ့ပိုးဖို့ စတင်နေပြီလို့ ထုတ်ပြန်လိုက်တာပါ။
ဒီအကူအညီက ကလေးတွေနဲ့ လူငယ်လူရွယ် ၅၀၀၀ ကျော်အတွက် အကျိုးရှိနိုင်မယ်လို့ သူတို့ကဆိုပြီး မေ ၅ ရက်နေ့ကတော့ ရန်ကုန်တိုင်း တိုက်ကြီးမြို့နယ်က YGW ပရဟိတ မိဘမဲ့ကျောင်းမှာ ခန်းမဆောင်တခု ဆောက်လုပ်လှူဒါန်းခဲ့ပါတယ်။
YGW ပရဟိတမိဘမဲ့ကျောင်း ဆရာတော် ဘဒ္ဒန္တ တေဇိန္ဒက “ဦးဇင်းတို့ဆီမှာ စောင့်ရှောက်ထားတဲ့ ကလေးလူငယ်ပေါင်း ၅၀၀ ကျော်အတွက် ဒီမဏ္ဍပ်အသစ်ရရှိတဲ့အခါ ကလေးတွေနေ့စဉ် လှုပ်ရှားမှု ပြုရာမှာ အလွန်အသုံးဝင်မှာဖြစ်လို့ ကလေးတွေလည်း ပျော်ကြမှာပါ။ သူတို့ရဲ့ အနာဂတ် အိပ်မက်တွေ အကောင်အထည်ဖော်ဖို့ ခွန်အားတခုဖြစ်စေမယ်လို့လည်း ဦးဇင်းတို့ ယုံကြည်ပါတယ်။ ခက်ခဲတဲ့ကာလဖြစ်တဲ့အတွက်ကြောင့် ဒီလိုအလှူရှင်အဖွဲ့အစည်းနဲ့ ဆုံဆည်းခွင့်ရလို့ ဦးဇင်းတို့က အလွန်ဝမ်းမြောက်ရပါတယ်” လို့ ပြောပါတယ်။
သန်လျင်မြို့ ပုဂံတောင်ကျေးရွာက ဓမ္မိကရာမ ဘုန်းတော်ကြီးသင် ပညာရေးကျောင်းအတွက်လည်း လာမယ့်ရက်ပိုင်းမှာ စာသင်ကျောင်းဆောင်တခု ဆောက်လုပ်ပေးမယ်လို့ အက်တမ် (ATOM) က ထုတ်ပြန်ထားပါတယ်။
အက်တမ် (ATOM) ဟာ ၂၀၂၃ နှစ်ကုန်အထိ ကော်ပိုရိတ် လူမှုရေးဆိုင်ရာ တာဝန်ယူမှု တာဝန်ခံမှုဆိုင်ရာ စီမံကိန်းတွေအတွက် မြန်မာကျပ်ငွေ သန်း ၃၀၀၀ လျာထားပြီး မြန်မာပြည်သူတွေအတွက် ပိုကောင်းတဲ့ လူမှုဘဝတွေဖန်တီးပေးမယ်လို့ ကတိကဝတ်ပြုကြောင်း သူတို့ရဲ့ ထုတ်ပြန်ချက်မှာ ဖော်ပြထားပါတယ်။
ATOM ရဲ့ ဒုတိယအမှုဆောင် အရာရှိချုပ် ဦးဝင်းပိုင်ကျော်က “ကျနော်တို့က လူ့အခွင့်အရေးဆိုင်ရာ အကဲဖြတ်ခြင်းနဲ့ စီမံခန့်ခွဲမှုဆိုင်ရာမှာ မှတ်ကျောက်တင် မှတ်တမ်းများ ရရှိထားတဲ့ အတိုင်ပင်ခံကုမ္ပဏီတခုနဲ့အနီးကပ်တိုင်ပင်လုပ်ဆောင်လျက်ရှိပါတယ်။ အတိုင်ပင်ခံကုမ္ပဏီက ဝန်ထမ်းများနဲ့ သုံးစွဲသူတွေအတွက် လူ့အခွင့်အရေးဆိုင်ရာ ကျင့်ဝတ်များနဲ့ အညီ တာဝန်ယူမှုတာဝန်ခံမှုရှိတဲ့ စီပွားရေး လုပ်ငန်းတခုအဖြစ် ဆက်လက်ရပ်တည်ဖို့ ဆိုတဲ့ အက်တမ် (ATOM) ရဲ့ ကတိကဝတ်တွေကို အကောင်အထည်ဖော်နိုင်ဖို့ အကြံပေး လုပ်ဆောင်ပေးသွားမှာ ဖြစ်ပါတယ်” လို့ ပြောကြောင်း ထုတ်ပြန်ချက်မှာ ဖော်ပြထားပါတယ်။
ပြည်သူတွေ ဆက်သွယ်ပြောဆိုတာတွေကို ကြားဖြတ်နားထောင်မှတ်တမ်းတင်နိုင်မယ့် စက်ပစ္စည်းတွေတပ်ဆင်ဖို့ မိုင်ဘိုင်းလ် ဆက်သွယ်ရေးကုမ္ပဏီတွေကို အာဏာသိမ်းစစ်တပ်က စေခိုင်းပြီးနောက်ပိုင်းမှာ ဒီလုပ်ရပ်ကြောင့် စီးပွားရေးပိတ်ဆို့ခံရတာကနေ ရှောင်ရှားနိုင်ဖို့ တယ်လီနောကုမ္ပဏီဟာ မြန်မာပြည်တွင်းက လုပ်ငန်းတွေကို စစ်တပ်နဲ့ နီးစပ်တဲ့ ကုမ္ပဏီကို ရောင်းချခဲ့ပါတယ်။
ဒီရောင်းချလွှဲပြောင်းမှုကို နိုင်ငံတကာအပါအဝင် အဖွဲ့အစည်းတွေက ဝေဖန်ခဲ့ကြပြီး အခုလည်း ပြည်တွင်းမှာကျန်နေသေးတဲ့ လွတ်လပ်တဲ့ အော်ပရေတာတခုဖြစ်တဲ့ အော်ရီဒူးဟာလည်း သူ့လုပ်ငန်းတွေကို ရောင်းချဖို့ စီစဉ်နေပြီဖြစ်ပါတယ်။
