ထိုင်းနိုင်ငံအလယ်ပိုင်း အယုဒ္ဓယခရိုင်ထဲမှာ ဒီကနေ့ ဧပြီ ၁၉ ရက် မနက် ၉ နာရီက တရားမဝင် ဝင်ရောက်လာတဲ့ မြန်မာအလုပ်သမား ၂၃ ဦး အဖမ်းခံရတယ်လို့ မန်နေဂျာအွန်လိုင်း ထိုင်းသတင်းအရ သိရပါတယ်။

အယုဒ္ဓယခရိုင် အဝေးပြေးလမ်း ရဲတပ်ဖွဲ့ဝင်တွေဟာ ဒီနေ့မနက်က ဖဟွန်ယိုးထင်း လမ်းမကြီးပေါ်မှာ တာဝန်ထမ်းဆောင်စဉ် ကီလိုမီတာအမှတ် ၄၇-၄၈ ကြားမှာ ဘန်ပအင်မြို့နယ်ဘက်ကနေ လေးလံတဲ့အရာတွေတင်ဆောင်ပြီး ဘန်ကောက်ဘက်ကို ဦးတည်မောင်းနှင်နေတဲ့ မသင်္ကာဘွယ်ကား ၂ စီးကို တားဆီးစစ်ဆေးခဲ့ပါတယ်။

ပထမကားမှာ အနက်ရောင် တိုယိုတာဝီဂို့ အမျိုးအစားဖြစ်ပြီး အသက် ၃၁ နှစ်အရွယ်ရှိ နိုင်းဆီဖတ်ဆိုသူ ထိုင်းအမျိုးသား မောင်းနှင်လာကြောင်း၊ ကားပေါ်မှာတော့ ပြွတ်သိပ်နေအောင် စီးနင်းလိုက်ပါလာတဲ့ တရားမဝင် မြန်မာလုပ်သား ၁၁ ဦးကို စစ်ဆေးတွေ့ရှိတာလို့ ဆိုပါတယ်။

တချိန်တည်းမှာပဲ  နိုင်းဝပ်ချရဖုန်း (၄၁ နှစ်) မောင်းနှင်လာတဲ့  မီးခိုးရောင် အီဇူးစူးကား ၁ စီး ပေါ်ကနေ တရားမဝင် မြန်မာ ၁၂ ဦးကို ထပ်မံတွေ့ရှိခဲ့ပါတယ်။

ကား ၂ စီးပေါ်ကနေ အထောက်အထားမဲ့ မြန်မာအမျိုးသား ၁၄ ဦး၊ အမျိုးသမီး ၉ ဦး၊ စုစုပေါင်း ၂၃ ဦးကို ဖမ်းဆီးလိုက်ပါတယ်။

ယာဉ်မောင်းတွေရဲ့ ထွက်ဆိုချက်အရ သူတို့ဟာ တသုတ်တည်းဖြစ်ပြီး ၁ ဦးကို ကားခ ဘတ် ၁,၀၀၀ နှုန်းနဲ့ ပထုန်ဌာနီခရိုင်ကို ပို့ပေးဖို့ တာ့ခ်ခရိုင်ကနေ ဒီနေ့မနက် ၃ နာရီက ထွက်ခွာလာတာလို့ ဆိုပါတယ်။

အဖမ်းခံရတဲ့ အလုပ်သမား ၁ ဦးကတော့ သူဟာ အရင်က ထိုင်းနိုင်ငံ ခေါက်ဆွဲစက်ရုံမှာ ၅ နှစ်ကျော် လုပ်ခဲ့ဖူးပြီး မြန်မာပြည်ပြန်သွားကြောင်း၊ ဟိုမှာအလုပ်မဖြစ်လို့ နောက်ထပ် သူငယ်ချင်း ၅ ယောက် ထပ်ခေါ်လာကြောင်း၊ ပွဲစားခ ၁ ဦးကို ဘတ် ၁၀,၀၀၀  ကနေ ၂၀,၀၀၀ ထိ ပေးရမှာဖြစ်ပြီး အဲဒီငွေတွေကို အလုပ်လုပ်ပြီး ပြန်ဆပ်ရမှာလို့ ပြောပါတယ်။

တာဝန်ရှိသူတွေက သူတို့ ၂၃ ဦးနဲ့ ထိုင်းယာဉ်မောင်း ၂ ဦးတို့ကို လဝကဥပဒေနဲ့ အရေးယူဖို့ ဖရအင်းရားချားနယ်မြေ ရဲစခန်းကို ပို့ဆောင်လိုက်တယ်လို့ သတင်းမှာ ဖော်ပြပါတယ်။

ထိုင်းနိုင်ငံအနောက်ပိုင်း၊ ပရကျူပ်ခီရီခန်ခရိုင်ထဲမှာ မတ်လ ၁၅ ရက်က ငါးလာမျှားတဲ့ရွာသားကို လာကြိုတဲ့ပွဲစားလို့ ထင်မှတ်ပြီး ပုန်းအောင်းရာက ထွက်လာတဲ့ တရားမဝင်မြန်မာ အလုပ်သမား ၂၇ ဦး ဖမ်းဆီးခံရတယ်လို့ မန်နေဂျာအွန်လိုင်း ထိုင်းသတင်းမှာ ဖော်ပြပါတယ်။

မနေ့ညနေပိုင်းက ခလောင်းဝမ်အုပ်စု ဘန့်ဆွန်ခဝမ်ရွာမှာ ထိုင်းရွာသားတချို့ အုန်းခြံထဲရှိ ရေကန်မှာ ငါးလာမျှားဖို့ရောက်လာစဉ် ချုံထဲကနေ မသင်္ကာသူတွေထွက်လာလို့  ရွာသူကြီးဆီကို ဖုန်းဆက်အကြောင်းကြားလိုက်တယ်လို့ ဆိုပါတယ်။

ရွာသူကြီးက ရဲတပ်ဖွဲ့နဲ့ ကျေးရွာလုံခြုံရေးအဖွဲ့တွေခေါ်ပြီး လာရောက်စစ်ဆေးရာမှာတော့ အမျိုးသား ၂၄ ဦး၊ အမျိုးသမီး ၁ ဦးနဲ့ ကလေး ၂ ယောက် စုစုပေါင်း ၂၇ ယောက်ရှိကြောင်း၊ သူတို့တွေဟာ  မလေးရှားနိုင်ငံသွားမယ့် မြန်မာအလုပ်သမားတွေဖြစ်ပြီး ဆီအုန်းခြံထဲ ပုန်းအောင်းကာ လာခေါ်မယ့်ပွဲစားကို စောင့်နေကြောင်း၊ လာခေါ်မယ့်ပွဲစားကို မတွေ့ဖူးသေးတာကြောင့် သူတို့ရှိရာ ဝင်ရောက်လာတဲ့ ရွာသားတွေကို ပွဲစားအထင်နဲ့ ထွက်တွေ့ရာက ခုလိုအဖမ်းခံလိုက်ရတာလို့ ဆိုပါတယ်။

ဖမ်းဆီးခံရသူတွေဟာ ရခိုင်၊ ထားဝယ်၊ မြိတ်နဲ့ မန္တလေး စတဲ့ဒေသကဖြစ်ပြီး ပရကျုပ်ခီရီခန်မြို့နယ် ဟွေ့ဆိုင်းကျေးရွာတောလမ်းကနေ ခြေလျင်လျှောက် ဝင်ရောက်လာကာ၊ မလေးရှားနိုင်ငံကို အလုပ်သွားလုပ်ဖို့ ပွဲစားကို ၁ ဦးလျှင် ဘတ် ၄၅၀၀၀ မှ ၅၀၀၀၀ ထိပေးရမှာဖြစ်ပြီး လောလောဆယ် ၁ ဦးလျှင် ဘတ် ၂၀၀၀၀ စီပေးထားကာ ကျန်ငွေကို ခရီးဆုံးခန်းတိုင်မှ ပေးရမယ်လို့ ပြောပါတယ်။

ထိုင်းတာဝန်ရှိသူတွေက သူတို့ကို လဝကဥပဒေနဲ့ အရေးယူဖို့ ရဲစခန်းမှာ ဖမ်းထားပြီး ပွဲစားတွေကို ဆက်လက်စုံစမ်းအရေးယူသွားမယ်လို့ ပြောသွားပါတယ်။ 

Source - mgronline.