ရခိုင်ပြည်နယ်မှာ ၂၀၂၂ ခုနှစ်အတွင်း တရားမဝင်သစ်တန်ချိန် ၈၀၀ ကျော် ဖမ်းဆီးရမိခဲ့တယ်လို့ ပြည်နယ်သစ်တောဦးစီးဌာနမှ တာဝန်ရှိသူတဦးက ပြောပါတယ်။
“၂၀၂၀ နဲ့ ၂၀၂၁ မှာ သစ်တန်ချိန် ၅,၀၀၀ ကျော်အထိ ဖမ်းဆီးမိခဲ့တယ်။ ၂၀၂၂ မှာ တန်ချိန် ၈၀၀ ကျော်အထိသာ ဖမ်းမိခဲ့တာ။”
ရခိုင်ပြည်နယ်မှာ ၂၀၂၀ ခုနှစ် အောက်တိုဘာလမှ ၂၀၂၁ ခုနှစ် သြဂုတ်လအထိ ၁၁ လတာ ကာလအတွင်း တရားမဝင် သစ်တန်ချိန်ပေါင်း ၅,၁၈၁ ဒသမ ၅၀၉၁ တန်အထိ ဖမ်းဆီးရမိခဲ့ပြီး ၂၀၂၂ ခုနှစ်အတွင်း သစ်တန်ချိန် စုစုပေါင်း ၈၄၄ ဒသမ ၅၃၉၂ တန်သာ ဖမ်းဆီးရမိခဲ့တယ်လို့ ပြည်နယ်သစ်တောဦးစီးဌာန စာရင်းတွေအရ သိရပါတယ်။
ရခိုင်ပြည်နယ်မှာ ဖမ်းဆီးရမိတဲ့ သစ်အမျိုးအစားတွေကတော့ ကျွန်း၊ ပျဉ်းကတိုးနဲ့ တခြားသစ်တွေဖြစ်ကြောင်း ပြည်နယ်သစ်တောဦးစီးဌာနမှ တာဝန်ရှိသူက ဆိုပါတယ်။
တရားမဝင်ဖမ်းဆီးရမိတဲ့ သစ်တွေမှာ သံတွဲခရိုင်မှ ၅၁၄ ဒသမ ၃၇၂၂ တန်၊ မောင်တောခရိုင်မှ ၁၀၅ ဒသမ ၇၀၈၂ တန်၊ စစ်တွေခရိုင်မှ ၁၈၄ ဒသမ ၃၆၀၂ တန်၊ ကျောက်ဖြူခရိုင်မှ ၃၉ ဒသမ ၉၁၈၆ တန်တို့ဖြစ်ကြောင်း ပြည်နယ်သစ်တောဦးစီးဌာနရဲ့ ကိန်းဂဏန်းတွေအရ သိရပါတယ်။
အဲဒီလို တရားမဝင် သစ်ခိုးထုတ်သူတွေကို သစ်တောဥပဒေပုဒ်မ ၄၁(က)၊ ၄၂(က) တို့နဲ့ သက်ဆိုင်ရာ မြို့နယ်ရဲစခန်းတွေမှာ အရေးယူ ဆောင်ရွက်နေပြီး အခုနှစ်အတွင်း တရားမဝင် သစ်ခိုးမှုပေါင်း ၁၁၂ မှု ရှိခဲ့ကြောင်းလည်း ပြည်နယ်သစ်တောဦးစီးဌာန စာရင်းတွေအရ သိရပါတယ်။
ပြည်နယ်သစ်တောဦးစီးဌာန စာရင်းတွေအရ လက်ရှိ ဖမ်းဆီးရမိတဲ့ တရားမဝင်သစ်တွေမှာ သံတွဲခရိုင်အတွင်းက ဖမ်းဆီးရမိတာ အများဆုံးဖြစ်ပြီး တဖက် ဘင်္ဂလားဒေ့ရှ်နိုင်ငံဘက် တရားမဝင်ခိုးပို့တဲ့ သစ်တန်ချိန် ၁၀၅ ဒသမ ၇၀၈၂ တန်အထိ ဖမ်းမိခဲ့ကြောင်း သိရပါတယ်။
“၂၀၂၂ ခုနှစ်မှာ တဖက် ဘင်္ဂလားဒေ့ရှ်နိုင်ငံကို ခိုးထွက်တဲ့ သစ်ခိုးဘုတ် အကြိမ်ရေ ၅ ကြိမ်အထိ ဖမ်းမိခဲ့တယ်။ ကျွန်းနဲ့ တခြားသစ် ၁၀၅ ဒသမ ၇၀၈၂ တန်အထိ ဖမ်းမိခဲ့တာ။ ဖမ်းတာကတော့ တပ်မတော်ရေနဲ့ နယ်ခြားစောင့်က ဖမ်းဆီးတာ” လို့ မောင်တောခရိုင် သစ်တောဦးစီးဌာနမှ တာဝန်ရှိသူတဦးက ပြောပါတယ်။
ရခိုင်ပြည်နယ်အတွင်း သစ်ခိုးထုတ်ယူမှု များပြားလာနေတာကြောင့် သစ်တောပြုန်းတီးနေပြီး သစ်ခိုးထုတ်မှုကို ထိထိရောက်ရောက် ကိုင်တွယ်ဆောင်ရွက်သင့်တယ်လို့ သဘာဝပတ်ဝန်းကျင်ထိန်းသိမ်းရေး လုပ်ဆောင်နေကြသူတွေက ထောက်ပြ ပြောဆိုကြပါတယ်။
စစ်ကိုင်းတိုင်း မြောင်၊ ကောလင်းနဲ့ ကနီမြို့နယ်တို့မှာ တရားမဝင်သစ်နဲ့ စစ်ကောင်စီတပ်ဖွဲ့ ပစ္စည်းပို့ ယာဉ်တွေကို ပြည်သူ့ကာကွယ်ရေးတပ်ဖွဲ့တွေက ဖမ်းဆီးခဲ့တယ်လို့ သိရပါတယ်။
စစ်ကိုင်းတိုင်း မြောင်ရဲစခန်းကနေ ကျောက်ရစ်ရဲစခန်းကို ပစ္စည်းပို့တဲ့ စစ်ကောင်စီ ယာဉ်တစ်စီးကို မြောင်မြို့နယ်ပြည်သူ့ကာကွယ်ရေးနဲ့ လုံခြုံရေးအဖွဲ့ (CDSOM) က ဒီဇင်ဘာ ၁ ရက်နေ့ ညနေပိုင်းက သိမ်းဆည်းရမိခဲ့ပါတယ်။
စစ်ကောင်စီပစ္စည်းပို့ ကားဖြတ်သန်းမယ်ဆိုတဲ့သတင်းအရ CDSOM ရဲဘော်တွေ စောင့်ကြည့်ခဲ့ပြီးနောက် ပြည်သူ့ကားဟန်ဆောင်ကာ အရပ်ဝတ် ကားသမားနှစ်ဦး မောင်းနှင်လာတဲ့ ယာဉ်နဲ့အတူ သေတ္တာ ၆ လုံး၊ ပလတ်စတစ်ပုံး ၂ ပုံး၊ အိတ် ၁ လုံးနဲ့ ရဲယူနီဖောင်းတွေ၊ ဖုန်းတွေနဲ့ တခြားအသုံးအဆောင်တွေကို သိမ်းဆည်းမိခဲ့တာလို့ CDSOM က ထုတ်ပြန်ထားပါတယ်။
ကားသမားနှစ်ဦးအား စစ်ဆေးမေးမြန်းရာ စစ်ကောင်စီတပ်က အတင်းခိုင်းစေတာကြောင့် ပို့ဆောင်ပေးရကြောင်း ဝန်ခံခဲ့တဲ့အတွက် လုံခြုံတဲ့နေရာကို ထွက်ပြေးတိမ်းရှောင်ဖို့ ဆိုပါတယ်။
ကောလင်းမြို့နယ် ရွှေဘို-မြစ်ကြီးနားကားလမ်းမှာလည်း ဒီဇင်ဘာ ၁ ရက်မနက် ၅ နာရီဝန်းကျင်က တရားမဝင်သစ်သယ် ကားလေးစီးကို ကောလင်း PDF က ဖမ်းဆီးပြီး မီးရှို့ဖျက်ဆီးခဲ့တယ်လို့ သိရပါတယ်။
ဖမ်းဆီးရမိတဲ့ ပစ္စည်းစာရင်း ကျွန်းသစ် ၁၃ တန်၊ သစ်မာ ၁၈ တန်၊ ကျွန်းတံခါးဘောင် တစ်ရာလောက်၊ ဆန်အိတ်နဲ့ ဆန်ကွဲအိတ် ၃၁၅ အိတ်၊ငွေ ဆယ်သိန်းကျော်တို့ကို ဖမ်းမိခဲ့ပြီး ငွေနဲ့ဆန်အိတ်တွေကို ရိက္ခာအဖြစ်သိမ်းဆည်းထားပြီး ကျန်ပစ္စည်းတွေကို မီးရှို့ဖျက်ဆီးခဲ့တယ်လို့ ကောလင်းက PDF က ဒီဇင်ဘာ ၁ ရက်နေ့မှာ ထုတ်ပြန်ပါတယ်။
ကောလင်း PDF က ကားသမားတွေကို ကြိမ်ဒဏ်ပေးပြီး အိမ်ပြန်ဖို့ လမ်းစရိတ်ပေး စီစဉ်ပေးခဲ့ကာ တရားမဝင်စီးပွားရှာနေသူတွေကို ထိရောက်စွာအရေးယူသွားမယ်လို့ ဆိုပါတယ်။
ကနီမြို့နယ် ချင်းတွင်းမြစ်အရှေ့ဘက်ခြမ်းမှာလည်း နိုဝင်ဘာ ၃၀ ရက်နေ့က တရားမဝင်သစ်ခိုးထုတ်နေတဲ့ ကားတွေကို ကနီပြည်သူ့ကာကွယ်တပ်မတော်အဖွဲ့က ဖမ်းဆီးခဲ့ပါတယ်။
“ကျနော်တို့ သဘာဝ ပတ်ဝန်းကျင်ကို ပျက်စီးစေတဲ့အရာနဲ့ ပြည်သူတွေရဲ့ အသက်အိုးအိမ် စည်းစိမ်ကို ကာကွယ်စောင့်ရှောက်ရမှာက ကျနော်တို့ PDF တွေရဲ့တာဝန်ပါ။ မြန်မာပြည်ရဲ့ သယံဇာတတွေကလည်း ကျနော်တို့ရဲ့ အမွေအနှစ်တွေပါ။ အခုလိုသစ်ခိုးထုတ်တာမျိုး နောက်ထပ် မပြုလုပ်ဖို့ ပထမဆုံးနဲ့ နောက်ဆုံး သတိပေးဖမ်းဆီးရတာလို့ ကနီပြည်သူ့ကာကွယ်ရေး တပ်မတော်ရဲ့ ခေါင်းဆောင်တစ်ဦးက ပြောပါတယ်။
အဖမ်းဆီးခံရတဲ့ သစ်ကားအရေတွက်ဟာ ကား ၄ စီးဖြစ်ပြီး သစ်တန် ၃၀ကျော်ပါရှိကာ ကာလတန်ဖိုး ကျပ်သိန်း ၂၀၀ ဖိုးလောက် ရှိတယ်လို့ သိရပါတယ်။
