ထောင်ဒဏ် ၂ နှစ် အမိန့်ချမှတ်ခံထားရတဲ့ မွန်ပြည်နယ်ဝန်ကြီးချုပ် ဒေါက်တာအေးဇံကို စစ်ကောင်စီက စွဲဆိုထားတဲ့ ရွေးကောက်ပွဲ မလျော်သြဇာသုံးမှုတွေအတွက် ဇန်နဝါရီ ၅ ရက်နေ့မှာ ရုံးထုတ်စစ်ဆေးခဲ့ပြီး၊ တရားလိုသက်သေ မလာတဲ့အတွက်ကြောင့် အမှုမစစ်ဖြစ်ဘူးလို့ တရားရုံးနဲ့နီးစပ်တဲ့သူတွေက ဒီဗွီဘီကို ပြောပါတယ်။

အဲဒီအမှုတွေအတွက် ဝန်ကြီးချုပ် ဒေါက်တာအေးဇံကို ကျိုက်မရောဗဟိုအကျဉ်းထောင်ရှိ အထူးတရားရုံးမှာ ရုံးထုတ်ခဲ့တာဖြစ်ပြီး၊ တရားလို သက်သေဖြစ်တဲ့ စစ်ကောင်စီရဲ့ မြို့နယ်ရွေးကောက်ပွဲကော်မရှင်အဖွဲ့ခွဲ အတွင်းရေးမှူး ရုံးချိန်းမလာလို့ အမှုမစစ်ခဲ့တာပါ။

အခုရုံးချိန်းမှာ အမှုမစစ်ဖြစ်တဲ့အတွက်ကြောင့် နောက်ရုံးချိန်းကို လာမယ့် ဇန်နဝါရီ ၁၂ ရက်နေ့ကို ရွှေ့ဆိုင်းခဲ့တာပါတယ်။

ရုံးချိန်းလာတဲ့ ဝန်ကြီးချုပ် ဒေါက်တာအေးဇံဟာ ကျန်းမာရေး ကောင်းမွန်နေတယ်လို့ တရားရုံးနဲ့ နီးစပ်သူတစ်ဦးက ပြောပါတယ်။

ဝန်ကြီးချုပ် ဒေါက်တာအေးဇံကိုတော့ စစ်ကောင်စီက ရွေးကောက်ပွဲမှာ မလျော်သြဇာသုံးတယ်ဆိုပြီး ရာဇသတ်ကြီး ဥပဒေ ပုဒ်မ ၁၃၀ (က) နဲ့ အမှု ၁ မှု၊  ပုဒ်မ ၁၇၁ (စ) အမှု ၂ မှု ဖွင့်လှစ်ထားတာပါ။

ဝန်ကြီးချုပ် ဒေါက်တာအေးဇံဟာ စစ်ကောင်စီက စွဲဆိုထားတဲ့ အဂတိလိုက်စားမှု အမှု ၉ မှု အပါအဝင် အမှုပေါင်း ၁၂ မှုအတွက် တရားရင်ဆိုင်နေရပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတဦးဝင်းမြင့်နဲ့ နေပြည်တော်ကောင်စီ ဥက္ကဋ္ဌ ဒေါက်တာမျိုးအောင်တို့အပေါ် စွဲဆိုထားတဲ့ ပုဒ်မ ၅၀၅(ခ)နဲ့ ပတ်သက်ပြီး စစ်ကောင်စီဘက်က တင်သွင်းထားတဲ့သက်သေတွေကို လက်ခံဖို့သင့်မသင့် တရားရုံးက လာမယ့် ဇွန်လ ၂၉ ရက်နေ့ရုံးချိန်းမှာ ကြားဖြတ်အမိန့်ချဖို့ ရှိနေပါတယ်။

ဒီနေ့ ဇွန်လ ၂၂ ရက်နေ့က ဇမ္ဗူသီရိတရားရုံးမှာပြုလုပ်ခဲ့တဲ့ ရုံးချိန်းမှာ စစ်ကောင်စီက တင်သွင်းတဲ့ စာရွက်စာတမ်းတွေနဲ့ မှတ်တမ်းဓာတ်ပုံသက်သေတွေနဲ့ ပတ်သက်ပြီး နှစ်ဖက်ရှေ့နေတွေ လျှောက်လဲချက်တင်ခဲ့ပါတယ်။

လျှောက်လဲချက်တွေကို တရားသူကြီးက သုံးသပ်ပြီး လာမယ့်ရုံးချိန်းမှာ တရားလိုသက်သေတွေ ကိုလက်သင့်ခံမခံ ဆုံးဖြတ်မှာဖြစ်တယ်လို့  နိုင်ငံ့ခေါင်းဆောင်တွေရဲ့ရှေ့နေ ဦးသဲမောင်မောင်က ပြောပါတယ်။

"တစ်ဖက်က တင်သွင်းတာကို ဒီဘက်က ကန့်ကွက်တယ်။ လက်ခံသင့်မခံသင့်ပေါ့။ ဘာကြောင့်ကန့်ကွက်ရတယ်ဆိုတာကိုတော့ အသေးစိတ်ပြောလို့မရသေးပါဘူး။ တရား လိုစစ်နေရင်းနဲ့ စာရွက်စာတမ်းတစ်ခု သက်သေခံအဖြစ်တင်ပြတယ်။ ဒါကို တစ်ဘက်က ကန့်ကွက်တယ်။ အဲဒီအပေါ်မှာ လျှောက်လဲချက်ပေးတယ်။ တရားသူကြီးကအမိန့်ချမယ်" ရှေ့နေဦးသဲမောင်မောင်က ပြောပါတယ်။

ဒီနေ့ ရုံးချိန်းမှာ ဒေါ်အောင်ဆန်းစုကြည်ကိုစွဲဆိုထားတဲ့ ဘေးအန္တရာယ်စီမံခန့်ခွဲမှုဆိုင်ရာ ပုဒ်မအတွက် တရားလိုပြသက်သေအဖြစ် ဦးညီညီ(ခ) ဦးမြင့်အောင်ကို တရားရုံးက စစ်ဆေးခဲ့ပါတယ်။  ဒေါ်အောင်ဆန်းစုကြည်က တရားလိုပြသက်သေရဲ့ထွက်ဆိုချက်တိုင်းကို သေသေချာချာနားထောင်ခဲ့ပြီး မဟုတ်မှန်တာ လွဲနေတာတွေကို ထောက်ပြခဲ့တယ်လို့ဆိုပါတယ်။

အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို ဖေဖော်ဝါရီ ၁ ရက်နေ့ကစတင်ပြီး စစ်ကောင်စီက ပုဒ်မ ၆ ခုနဲ့တရာစွဲခဲ့တာပါ။

ဇွန်လ ၉ ရက်နေ့မှာ အဂတိလိုက်စားမှုတိုက်ဖျက်ရေးဥပဒေပုဒ်မ ၅၅ နဲ့ အမှုထပ်ဖွင့်ထားပါတယ်။ ဇွန်လ ၂၁ ရက်နေ့တုန်းက ဒေါ်အောင်ဆန်းစုကြည်နဲ့ ဦးဝင်းမြင့်ကို စွဲထားတဲ့ အမှုလေးခုအတွက် တရားလိုပြသက်သေတွေကိုစတင်စစ်ဆေးခဲ့ပါတယ်။

နောက်ထပ်ရုံးချိန်းတွေကတော့ မှုခင်းစီမံခန့်ခွဲရေးအစည်းအဝေးသဘောတူညီချက်အတိုင်း အပတ်စဉ် တနင်္လာ၊ အင်္ဂါနေ့တွေမှာ ဆက်စစ်ဖို့  တရားရုံးကဆုံးဖြတ်ထားပါတယ်။