အမျိုးသားညီညွတ်ရေးအစိုးရ (NUG) ကို မြန်မာနိုင်ငံရဲ့တရားဝင်အစိုးရအဖြစ်  အသိအမှတ်ပြုလိုက်တဲ့ ပြင်သစ်အထက်လွှတ်တော်ရဲ့ ရှေ့ဆောင်ဆုံးဖြတ်ချက်ကို အပြည်ပြည်ဆိုင်ရာ ကုန်သွယ်ရေးသမဂ္ဂအဖွဲ့ချုပ် ITUC က ကြိုဆိုလိုက်ပါတယ်။ 

ပြင်သစ်ပါလီမန်ရဲ့ အထက်လွှတ်တော်မှာ ဒီဆုံးဖြတ်ချက်ကို ကန့်ကွက်သူမရှိ တညီတညွတ်တည်း အတည်ပြုခဲ့တာပါ။

ပြင်သစ်အထက်လွှတ်တော်က ဒီရှေ့ဆောင်ဥပမာကို သတ်မှတ် လုပ်ဆောင်လိုတာဟာ ကောင်းတဲ့လုပ်ရပ်ဖြစ်ကြောင်းနဲ့ အစိုးရအားလုံးလည်း  ဒီဥပမာအတိုင်း လိုက်နာပြီး မြန်မာနိုင်ငံရဲ့ တရားဝင်အစိုးရ၊ တရားဥပဒေနဲ့အညီဖြစ်တဲ့အစိုးရအဖြစ် NUG ကို နှောင့်နှေးတုံ့ဆိုင်းခြင်းမရှိ အသိအမှတ်ပြုပေးဖို့ တောင်းဆိုလိုက်တယ်လို့ ITUC ရဲ့ အထွေထွေအတွင်းရေးမှူး ရှာရန်ဘာရိုးက ပြောပါတယ်။

စစ်ကောင်စီကို ကုလသမဂ္ဂအထွေထွေညီလာခံ၊ ILO နိုင်ငံတကာအလုပ်သမားညီလာခံ၊ ကုလသမဂ္ဂစားနပ်ရိက္ခာနဲ့ စိုက်ပျိုးရေးအဖွဲ့၊ ကမ္ဘာ့ကျန်းမာရေးအဖွဲ့တို့ကလည်း ရှောင်ဖယ်နေပြီ ဖြစ်ကြောင်းနဲ့  ဒီအဖွဲ့အစည်းတွေအားလုံးဟာ စစ်အုပ်စုရဲ့ အထောက်အထားတွေကိုလက်ခံဖို့ ငြင်းဆန်ခဲ့ကြတယ်လို့လည်း ဆိုပါတယ်။ 

စစ်အုပ်စုအနေနဲ့ တရား၀င် ရွေးကောက်တင်မြှောက်ခံရတဲ့ခေါင်းဆောင်တွေကို အာဏာပြန်ပေးအပ်ပြီး မြန်မာပြည်ဒီမိုကရေစီ ပြန်လည်ထူထောင်ရမယ့်အချိန် ဖြစ်တယ်လို့ ITUC  အဖွဲ့က ပြောပါတယ်။

သပိတ်မှောက်တာ ဒါမှမဟုတ် တခြားဆန္ဒပြလုပ်ရပ်တွေကြောင့် အသက်မွေးဝမ်းကျောင်းဆုံးရှုံးခဲ့တဲ့ မြန်မာနိုင်ငံရှိအလုပ်သမားတွေနဲ့ မိသားစုတွေကို ထောက်ပံ့ဖို့အတွက်  အပြည်ပြည်ဆိုင်ရာ ကုန်သွယ်ရေးသမဂ္ဂအဖွဲ့ချုပ် ITUC ဟာ ညီညွတ်ရေးရန်ပုံငွေကို တည်ထောင်ထားတာကြောင့် မြန်မာသပိတ်ရံပုံငွေကိုလည်း  ITUC ကနေတဆင့် လှူဒါန်းနိုင်ကြောင်း နှိုးဆော်ထားပါတယ်။ 

PHOTO-Wikimedia

မြန်မာနိုင်ငံရဲ့ အမျိုးသားညီညွတ်ရေးအစိုးရ (NUG) ကို တရားဝင်အစိုးရအဖြစ် ပြင်သစ်အစိုးရကအသိအမှတ်ပြုဖို့ ပြင်သစ်အထက်လွှတ်တော်အမတ် ၁၅၀ ကျော်တို့ လက်မှတ်ရေးထိုးခဲ့ကြတယ်လို့ သိရပါတယ်။

အခုလို ရေးထိုးတာကို ပြင်သစ်နိုင်ငံ အထက်လွှတ်တော်၏ နိုင်ငံခြားရေးရာ၊ ကာကွယ်ရေးနှင့်လက်နက်ကိုင် တပ်ဖွဲ့များဆိုင်ရာ ကော်မတီကနေ သတင်းကောင်း ပြောကြားခဲ့တယ်လို့ NUG- အမျိုးသားညီညွတ်ရေးအစိုးရရဲ့ ပြောခွင့်ရ အပြည်ပြည်ဆိုင်ရာ ပူးပေါင်းဆောင်ရွက်ရေး ပြည်ထောင်စုဝန်ကြီး ဒေါက်တာဆာဆာက သူ့ရဲ့လူမှုကွန်ရက်စာမျက်နှာကနေ အသိပေးထားပါတယ်။ 

ဒီဆုံးဖြတ်ချက်ကို မကြာခင် ပြင်သစ်အထက်လွှတ်တော်ဆွေးနွေးပွဲမှာ ဆွေးနွေးပြီးတော့ မဲခွဲဆုံးဖြတ်သွားမှာလည်း ဖြစ်ပါတယ်။ 

ပြင်သစ်လွှတ်တော်အမတ်တွေဟာ မြန်မာပြည်သူ ၅၄ သန်းအပေါ် စစ်အာဏာရှင်ရဲ့ အကြမ်းဖက်တဲ့အုပ်ချုပ်မှု အဆုံးသတ်ရေးအတွက် ပြင်းထန်တဲ့ အရေးယူမှုများ ပြုလုပ်ဖို့ ပြင်သစ်အစိုးရကို တိုက်တွန်းခဲ့ကြပါတယ်။ 

ဒီဆုံးဖြတ်ချက်ဟာ မြန်မာနိုင်ငံကို စစ်အာဏာရှင်ရဲ့ အကြမ်းဖက်အုပ်ချုပ်မှုအောက်မှ လွတ်မြောက်ပြီး လွတ်လပ်တဲ့ မြန်မာပြည်သူလူထုအားလုံး ပါဝင်တဲ့ ဖက်ဒရယ်ဒီမိုကရက်တစ် ပြည်ထောင်စုသမ္မတမြန်မာနိုင်ငံတော် တည်ထောင်ရန်အတွက် မှတ်တိုင်များနဲ့ အရေးကြီးသော ခြေလှမ်းများဖြစ်တယ်လို့လည်း ဒေါက်တာဆာဆာက ဆိုပါတယ်။