ဗြိတိန်အစိုးရက နိုင်ငံတွင်းအရေးပါတဲ့ အဆောက်အအုံတွေမှာ တရုတ်နဲ့ ချိတ်ဆက်ထားတဲ့ လုံခြုံရေးစောင့်ကြည့်ကင်မရာတွေ တပ်ဆင်ထားတာကို လုံခြုံရေးအန္တရာယ်အကြောင်းပြချက်နဲ့ ရပ်တန့်ဖို့ သူ့ရဲ့ ဌာနဆိုင်ရာတွေကို အမိန့်ထုတ် ညွှန်ကြားထားပါတယ်။ 

ဗြိတိန်လွှတ်တော်အမတ် ဒါဇင်ပေါင်းများစွာဟာ တရုတ်အစိုးရ-တစိတ်တပိုင်း-ပိုင်ဆိုင်တဲ့ ဟိုက်ဗစ်ရှင်နဲ့ တာ့ဟွာတရုတ်ကုမ္ပဏီ နှစ်ခုဆီက လုံခြုံရေးကင်မရာတွေကို ရောင်းချခွင့်နဲ့ အသုံးပြု ခြင်းတို့ကို တားမြစ်ဖို့ တောင်းဆိုခဲ့ပြီးနောက် လပိုင်းအတွင်း ဒီညွှန်ကြားချက် ထွက်လာတာပါ။ 

ဒါနဲ့ ပတ်သက်ပြီး တရုတ်အစိုးရကတော့ တရုတ်ကုမ္ပဏီတွေရဲ့ တရားဝင်အခွင့်အရေးနဲ့ အကျိုးစီးပွားတွေကို ခုခံကာကွယ်သွားမှာ ဖြစ်ကြောင်း နိုဝင်ဘာ ၂၅ ရက်က ပြောကြားခဲ့ပါတယ်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်းက "တရုတ်စီးပွားရေးလုပ်ငန်းတွေကို ကန့်သတ်ဖို့ အမျိုးသားလုံခြုံရေး အယူအဆကိုအလွန်အကျွံ ကျင့်သုံးနေတဲ့ လူတချို့ရဲ့ လုပ်ဆောင်ချက်တွေကို ပြင်းပြင်းထန်ထန် ကန့်ကွက်ပါတယ်" လို့ နိုဝင်ဘာ ၂၅ ရက် ပုံမှန်သတင်းစာရှင်းလင်းပွဲမှာ ပြောကြားခဲ့ပါတယ်။ 

တရုတ်နိုင်ငံရှိ လူ့အခွင့်အရေးချိုးဖောက်မှုတွေနဲ့ ဆက်နွှယ်နေတဲ့ ကုမ္ပဏီတွေရဲ့ ထုတ်ကုန်တွေ အပေါ် ကိုယ်ရေးကိုယ်တာ ကြောက်ရွံ့မှုတွေနဲ့ စိုးရိမ်မှုတွေ ရှိလာတာကြောင့်လို့ ဆိုပါတယ်။

ဟိုက်ဗစ်ရှင်ကုမ္ပဏီက ရိုက်တာကို ထုတ်ပြန်ချက်ထဲမှာ ဒီစွပ်စွဲချက်တွေကို ငြင်းဆန်ထားပြီး ကုမ္ပဏီအနေနဲ့ အဲဒီဆုံးဖြတ်ချက်ကို နားလည်သဘောပေါက်ဖို့ ဗြိတိန်အာဏာပိုင်တွေနဲ့ ထပ်မံပူးပေါင်းဆောင်ရွက်သွားမယ်လို့ ပြောကြားခဲ့ပါတယ်။ 

မြန်မာနိုင်ငံက ဝယ်ယူထားတဲ့ တရုတ်နိုင်ငံထုတ် Sinopharm ကိုဗစ်-၁၉ ကာကွယ်ဆေး ၄ သန်းထပ်မံရောက်ရှိလာခဲ့တယ်လို့ မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားပါတယ်။

အဆိုပါ ထုတ်ပြန်ချက်ထဲမှာတော့ လက်ရှိအချိန်ထိ တရုတ်နိုင်ငံကနေ မြန်မာနိုင်ငံကို ထောက်ပံ့ပေးခဲ့တဲ့ ကိုဗစ်-၁၉ ကာကွယ်ဆေးအလုံးရေ ၁၂ ဒသမ ၆ သန်းရှိခဲ့ပြီး အဲဒီထဲက အလုံးရေ ၃ ဒသမ ၉ သန်းက တော့ တရုတ်နိုင်ငံက လှူဒါန်းပေးအပ်တာဖြစ်ပြီး အလုံးရေ ၈ ဒသမ ၇ သန်းကတော့ မြန်မာအစိုးရက ဝယ်ယူတာဖြစ်တယ်လို့ ဖော်ပြပါတယ်။

ခုလက်ရှိရောက်လာခဲ့တဲ့ ကာကွယ်ဆေး အလုံးရေ ၄ သန်းကတော့ ဝယ်ယူထား တာတွေထဲက ပထမဆုံးအသုတ်အနေနဲ့ ရန်ကုန်အပြည်ပြည်ဆိုင်ရာလေဆိပ်ကတဆင့် ပို့ဆောင်ခဲ့တာလို့ ဆိုပါတယ်။

ကိုဗစ်-၁၉ ရောဂါ တတိယလှိုင်းကူးစက်မှုတွေ ဖြစ်ပွားနေတဲ့ မြန်မာနိုင်ငံမှာ လက်ရှိအချိန်ထိ ရောဂါကူးစက်ခံရသူပေါင်း ၄၃၀,၀၀၀ ကျော်နဲ့ သေဆုံးသူ ၁၆,၀၀၀ ကျော် ရှိလာနေပြီလို့ အကြမ်းဖက်စစ်ကောင်စီ ကျန်းမာရေးဝန်ကြီးဌာနက ဖော်ပြပါ တယ်။

ဒီစစ်ဆေးမှုဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲစမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှုတိကျတဲ့ ပမာဏအတိုင်း အဆကို မသိနိုင်သေးပါဘူး။

မြန်မာနိုင်ငံမှာ အကြမ်းဖက်စစ်ကောင်စီက မတရားအာဏာသိမ်းယူထားခဲ့တာ ၇ လကျော် ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေးစောင့်ရှောက်မှုတွေမှာ အဘက်ဘက်က ကျဆင်း နေခဲ့တာ ဖြစ်ပါတယ်။

ဒါ့အပြင် မြန်မာနိုင်ငံတဝန်း ကာကွယ်ဆေးထိုးနှံပြီးသူ အရေအတွက်ဟာ ၅ သန်း နီးပါးရှိခဲ့ပြီလို့ စစ်ကောင်စီ ကျန်းမာရေးဝန်ကြီးဌာနက ထုတ်ပြန်ထားပေမယ့်  ပြည်သူ တွေကြားမှာတော့အကြမ်းဖက်စစ်ကောင်စီကို မယုံကြည်ကြတာမို့ ကာကွယ်ဆေးသွား ရောက်ထိုးနှံသူ အရေအတွက်ဟာ နည်းပါးတယ်လို့ သိရပါတယ်။