တရုတ်နိုင်ငံနယ်စပ် ရွှေလီမြို့က မြန်မာရွှေ့ပြောင်းအလုပ်သမားတွေကို တရားဝင်ဂိတ်က ပြန်ထွက်ခွာခွင့်ပြုထားပေမယ့် ကျယ်ဂေါင်မြို့မှာ မြန်မာရွှေ့ပြောင်းအလုပ်သမားတွေ အားလုံးနီးပါး ပြန်တာကြောင့် သတ်မှတ်ထားတဲ့ အချိန်မှာ လူပြည့်ပြီး အချိန်မလောက်လို့  ရွှေလီဘက်က လူတွေကို အချိန်ကန့်သတ်ထားလိုက်ရပါတယ်။

ရွှေလီမြို့က ရွှေမြန်မာ အွန်လိုင်း အရေးပေါ် ကျန်းမာရေး ကူညီမှုအသင်း ဥက္ကဋ္ဌ ကိုချမ်းမြေ့က “ကျယ်ဂေါင်တံတားကနေ ပေးမဖြတ်တာမဟုတ်ဘူး။ ပေးဖြတ်မှာ။ ဘာဖြစ်လို့လဲဆိုတော့ ဒီဘက်မှာ ကျနော်တို့ ခွင့်ပြုထားတဲ့အချိန်က မြန်မာချိန် မနက် ၈ နာရီကနေ နေ့လယ် ၁၂ နာရီ ထိပဲ ဂိတ်က ဖွင့်ပေးတာ။ အဲဒီ ကိစ္စမှာ ခုလောလောလတ်လတ်မှာ ပြန်တဲ့လူ ကျယ်ဂေါင်က အကုန်လုံးနီးပါးပြန်နေတာ ဆိုတော့ဗျာ လူဦးရေ တအားများနေတယ်။ ထွက်တဲ့လူက။ လူဦးရေ ထွက်မယ့်လူက များနေတော့ ကျယ်ဂေါင်နဲ့တင် ကျနော်တို့ မနက် ၈ နဲ့ နေ့လည် ၁၂ နာရီ အထိက အချိန် ကပြည့်ကော။ အဲလို ပြည့်သွားတဲ့ အနေအထားမှာ ရွှေလီက လာတဲ့လူတွေကို ခဏတားထားတာ” လို့ ရှင်းပြပါတယ်။

ကျယ်ဂေါင်လူပါးသွားပြီး ပြန်မယ့် လူမရှိတော့ဘူးဆိုရင် ရွှေလီတံတားကို ဖွင့်ပေးမှာဖြစ်သလို အရေးကြီးလို့ ပြန်မယ့်လူဆိုရင်တော့ သတင်းပို့လာရင် မန်ဟီးရိုး ခိုးပေါက်နဲ့ ဝမ်တိန်ခိုးပေါက်တို့ ဘက်ကနေ တရားဝင်ဂိတ် မဟုတ်ပေမယ့် ပြန်လို့ရအောင် စီစဉ်ပေးနေတယ်ထပ်မံ ရှင်းပြပါတယ်။

တရုတ်ဘက်ခြမ်းမှ မြန်မာရွှေ့ပြောင်း အလုပ်သမားတွေကို ပြန်လာခွင့်ပြုတဲ့ ဒုတိယနေ့ ဇူလိုင်လ ၂၇ ရက်နေ့မှာတော့ အမျိုးသား ၅၉ ဦး၊ အမျိုးသမီး ၅၆ ဦး စုစုပေါင်း ၁၁၅ ဦး နေရပ်ပြန်လာ ကြပါတယ်။

မူဆယ် ကိုဗစ်-၁၉ ကာကွယ်ထိန်းချုပ်ကုသရေး ကော်မတီအနေနဲ့ ပြန်လာသူ အားလုံးအတွက် နေ့လယ်စာ အခမဲ့ စီစဉ်ပေးပြီး ပြန်လာသူတွေ အားလုံးက ကျယ်ဂေါင်မြို့က ဖြစ်တယ်လို့ မူဆယ် တရုတ်ကျောင်း ကွာရန်တင်းစင်တာ တာဝန်ခံ ဦးမန်းမျိုးမြင့်က ပြောပါတယ်။ 

တရုတ်-မြန်မာ နှစ်နိုင်ငံ နယ်စပ်တာဝန်ရှိသူတို့ ညှိနှိုင်းပြီး ကျယ်ဂေါင်၊ ရွှေလီမှာ လာရောက် အလုပ်လုပ်ကိုင်နေတဲ့ မြန်မာနိုင်ငံသားတွေကို တရားဝင်ဂိတ်ပေါက် ဖြစ်တဲ့ နန်းတော်ပေါက် ကနေ ဇူလိုင်လ ၂၆ ရက်နေ့ မနက် ၈ နာရီကစ ပြန်ခွင့် ပြုတာပါ၊

ပထမနေ့မှာ ပြန်လာသူတွေ အမျိုးသား ၁၉ ဦး၊ အမျိုးသမီး ၂၈ ဦး စုစုပေါင်း ၄၉ ဦးရှိကာ ကျယ်ဂေါင်မြို့မှ လာရောက် အလုပ်လုပ်ကိုင်သူတွေ ဖြစ်ကြပါတယ်။ 

Pra Jaw

တရုတ်နိုင်ငံ၊ ကျယ်ဂေါင်မှာ ကုန်တင်ပြီး ထွက်မရဘဲ ပိတ်မိနေတဲ့ မြန်မာကုန်ကားတွေကို ဇွန် ၁ ရက်မနက် ၇ နာရီကနေ စတင်ပြီး မန့်ဝိန်းပေါက်ကနေ ထုတ်ယူခွင့်ပြုနေတယ်လို့ တရုတ်မြန်မာနယ်စပ်နေ ဒေသခံတွေထံက သိရပါတယ်။

မန့်ဝိန်းပေါက်ကနေ ဇွန်လ ၁ ရက်မှ  ၃ ရက်နေ့အထိ၊ မနက် ၇ နာရီမှ ည‌နေ ၅ နာရီအထိ ထွက်ခွင့်ပြုလိုက်တာလို့  ကျယ်ဂေါင်မှာ နေထိုင်သူ ကိုကိုကျော်သက်က ပြောပါတယ်။

တရုတ်ဘက်က ကုန်ကား ထုတ်ပေးမယ့်ရက် ၃ ရက် သတ်မှတ်ထားပေမယ့် သတ်မှတ် ကား အစီးရေကုန်ရင် ပြန်ပိတ်မှာဖြစ်တဘ်လို့လည်း သိရပါတယ်။

မူဆယ်ယာဉ်ထိန်းရဲတပ်ကြပ်ကြီး ဦးမျိုးမင်းသူက "မန့်ဝိန်းဂိတ်က တရုတ်ပြည်က ကားတွေလေ၊ ကားပိတ်တုန်းက မြန်မာပြည် ပြန်မယ့် ကားတွေ ရှိတယ်လေ။ အဲဒီထဲက ကား အစီး ၂၀၀ ကျော်ကို ပြန်ထုတ်ပေးမှာပေါ့။ ဘယ်နှစ်ရက်တော့ မဟုတ်ဘူး။ အဲကား ကုန်အောင် ထုတ်မှာပေါ့။ ဒီနေ့ မဟုတ်ရင် မနက် ဖြန်လည်း ပြီးရင် ပြီးမှာပေါ့။" လို့ ပြောပါတယ်။ 

မြန်မာ - တရုတ် နှစ်နိုင်ငံရဲ့ အဓိက ကုန်သွယ်စီးဆင်းရာ ဂိတ်ပေါက်ဖြစ်တဲ့ မန့်ဝိန်းပေါက်ကို ကျယ်ဂေါင်၊ ရွှေလီမှာ ကိုဗစ်-၁၉ ပိုးတွေ့အကြောင်းပြချက်နဲ့ ဧပြီ ၁ ရက်နေ့ကစလို့ ကုန်တင်ယာဉ် အဝင်အထွက်ကို လုံးဝ ပိတ်လိုက်တာဖြစ်ပြီး အခု မြန်မာဘက် ပြန်ထွက်ခွင့်ပြုလိုက်တာပါ။

တရုတ်နိုင်ငံကျယ်ဂေါင်ဘက်က ထွက်လာတဲ့ကားတွေကို မြန်မာဘက်က ယာဉ်မောင်းနဲ့ ယာဉ် နောက်လိုက်တွေက PPE ဝတ်စုံနဲ့ မန့်ဝိန်းဂိတ်ပေါက်မှာ စောင့်ယူရမှာဖြစ်ပါတယ်။   

လမ်းမှာယာဉ်ရပ်နားတာ ပြုလုပ်ခွင့်မရှိဘဲ (၁၀၅)မိုင်ကုန်သွယ်ရေးဇုန်က နှင်းနှင်းခိုင် သွင်းကုန်ယာဉ်ရပ်နားကွင်းကို တောက်လျောက် မောင်းနှင် ဝင်ရောက်ရပ်နားရမှာဖြစ်တယ်လို့ သိရပါတယ်။ 

တရုတ်နိုင်ငံ ကျယ်ဂေါင်မှာ ကိုဗစ် Lockdown ကာလ မတိုင်ခင်က ကုန်တင်ပြီး ထွက်မရပဲ ကျယ်ဂေါင်မှာ ပိတ်မိနေတဲ့ မြန်မာကုန်ကား တချို့ကို ဧပြီလ ၁၁ ရက်နေ့ကလည်း ကုန်ကား ကုန်ကား အစီး ၂၀၀ လောက် မူဆယ်ဘက်သို့ ပထမအကြိမ် ထုတ်ပေးခဲ့တာဖြစ်ပြီး ကနေ့ ဇွန်လ ၁ ရက်နေ့မှာတော့ ဒုတိယအကြိမ် ထုတ်ပေးတာ ဖြစ်ပါတယ်။

မန့်ဝိန်းဂိတ်ပေါက်ကနေ တရုတ်ဘက်ကို မြန်မာ့ လယ်ယာထွက်ကုန်တွေနဲ့ တခြားကုန်ခြောက်တွေကို တင်ပို့နေတာဖြစ်ပြီး တရုတ်ဘက်က ကုန်မျိုးစုံကို တင်သွင်းနေတာလည်းဖြစ်ပါတယ်။