သရုပ်ဆောင် မင်းသားကြီး ဒန်နီရန်းဟာ တရုတ်အစိုးရကို ထောက်ခံတဲ့အတွက် ဟောင်ကောင်လူတစုက အစပြုပြီး လူပေါင်း ၈၄,၀၀၀ ကျော်က အော်စကာဆုပေးပွဲ အစီအစဉ်တင်ဆက်သူနေရာက သူ့ကို ဖယ်ရှားပေးဖို့ အွန်လိုင်းကနေ လက်မှတ်ထိုး တောင်းဆိုနေကြတယ်လို့ သိရပါတယ်။
၂၀၁၉ ခုနှစ် ဟောင်ကောင်ဆန္ဒပြမှုကို ရန်းက “ဒါက ဆန္ဒပြတာမဟုတ်ဘူး။ ဆူပူနှောင့်ယှက်နေတာပဲ။ အဲ့ဒါနဲ့ပတ်သက်ပြီး လူတွေ ဘယ်လိုခံစားနေရတယ်ဆိုတာကို ပြောင်းလဲမှာမဟုတ်ဘူး။ ငါ့ကိုယ်ပိုင်အတွေ့အကြုံအရပါ” လို့ အင်တာဗျူးတခုမှာ ပြောခဲ့ပါတယ်။
အနောက်နိုင်ငံတွေရဲ့ မီဒီယာအဖွဲ့အစည်းတွေ BBC တို့၊ CNN တို့ဆိုတာ တရုတ်နဲ့ပတ်သက်ပြီး မကောင်းတဲ့သတင်းရေးဖို့သာ အာရုံစိုက်နေကြတာလို့လည်း ရန်းက ဆိုပါတယ်။
ဒီလက်မှတ်ရေးထိုး တောင်းဆိုမှုကိုတော့ ဟောင်ကောင်ရဲ့ တက်ကြွလှုပ်ရှားသူ ထုန်ဝေဟုံက စတင်လုပ်ဆောင်ခဲ့တာဖြစ်ပြီး ဟောင်ကောင်ရဲ့ လွတ်လပ်စွာ ထုတ်ဖော်ပြောဆိုခွင့်ကို ထိပါးနေတဲ့အတွက် အခုလို တောင်းဆိုရတာလို့ ပြောပါတယ်။
အော်စကာအဖွဲ့က ရန်းကို ဖိတ်ကြားတာဟာ ဟောင်ကောင်ပြည်သူတွေကို အထင်သေးတာ ဖြစ်ပြီး သူတက်ရောက်မယ်ဆို ရုပ်ရှင်နယ်ပယ်ရဲ့ ပုံရိပ်နဲ့ ဂုဏ်သိက္ခာကို ထိခိုက်ပျက်စီးစေလိမ့်မယ်လို့ ဟုံက ဆိုပါတယ်။
ရန်းဟာ တရုတ်ပြည်သူ့နိုင်ငံရေးအတိုင်ပင်ခံ ကွန်ဖရင့် (CPPCC) ရဲ့ အဖွဲ့ဝင်တယောက် ဖြစ်ပြီး မတ်လအစောပိုင်းက ဘေဂျင်းမှာကျင်းပခဲ့တဲ့ နှစ်ကြိမ်မြောက် တရုတ်လွှတ်တော်နဲ့ ထိပ်တန်းနိုင်ငံရေးအကြံပေးအဖွဲ့ နှစ်ပတ်လည်အစည်းအဝေးကိုလည်း တက်ရောက်ခဲ့ပါတယ်။
အသက် ၅၉ နှစ်အရွယ် ရန်းဟာ MMA အပေါ် အခြေခံပြီး ရိုက်ကူးထားတဲ့ ဟောင်ကောင်ဇာတ်လမ်းတွဲ IP Man ရုပ်ရှင်နဲ့ နာမည်ကျော်ခဲ့ပြီး ကမ္ဘာ့ရုပ်ရှင်ရုံမှတ်တမ်းမှာ ကန်ဒေါ်လာ သန်း ၄၀၀ ကျော်အထိ ရရှိခဲ့တဲ့အပြင် ဟောလိဝုဒ်ရုပ်ရှင် John Wick 4 မှာလည်း ပါဝင်သရုပ်ဆောင်မယ်လို့ ကြေညာထားပါတယ်။
သရုပ်ဆောင် ဒန်နီ ရန်းကို မတ်လ ၁၂ ရက် လေ့ာစ်အိန်ဂျလိစ်မြို့မှာ ကျင်းပမယ့် အော်စကာ ဆုပေးပွဲအတွက် အစီအစဉ်တင်ဆက်သူအဖြစ် ဖိတ်ကြားထားတာဖြစ်ပြီး အော်စကာဆု ရွေးချယ်ရေး အဖွဲ့ကတော့ အခုလို လက်မှတ်ထိုးတောင်းဆိုတာနဲ့ ပတ်သက်ပြီး တစုံတရာ မှတ်ချက်ပေးတာမျိုး မရှိပါဘူး။
တရုတ်ပြည်မကြီးက လက်ရှိဆန္ဒပြပွဲတွေကို အသံတိတ်သွားတဲ့အထိ ဖြိုခွင်းမှာဖြစ်လို့ လက်ရှိ ကိုဗစ်ဆိုင်ရာ ဆန္ဒပြလှိုင်းလုံးတွေဟာ သမ္မတရှီကျင့်ဖျင် အစိုးရကို တုန်လှုပ်စေနိုင်မှာ မဟုတ်ဘူးလို့ နိုင်ငံရေးတက်ကြွလှုပ်ရှားသူ တရုတ်အနုပညာရှင် အိုက်ဝေဝေက သူ လက်ရှိနေထိုင်ရာ ပေါ်တူဂီကနေ နိုဝင်ဘာ ၂၈ ရက်မှာ ပြောပါတယ်။
တင်းကျပ်တဲ့ ကိုဗစ်-၁၉ ကန့်သတ်ချက် စည်းကမ်းတွေကနေ လွတ်လပ်ခွင့်ပေးဖို့ ပြီးခဲ့တဲ့ ရက်ပိုင်းအတွင်း တရုတ်ပြည်မကြီးရဲ့ ရှန်ဟိုင်း၊ ပေကျင်းနဲ့ တခြားမြို့တွေမှာ ပြည်သူတွေက လမ်းပေါ်ထွက် ဆန္ဒပြခဲ့ကြတာပါ။
လုံခြုံရေးတပ်ဖွဲ့ဝင်တွေက ဆန္ဒထုတ်ဖော် ပြောဆိုသူတွေကို နှိမ်နင်းမှာဖြစ်သလို ဆန္ဒပြသူတွေ ကြားမှာလည်း ခေါင်းဆောင်မှုနဲ့ စည်းရုံးမှု အားနည်းတာကြောင့် ဆန္ဒပြပွဲတွေ ရှေ့ဆက်နိုင်မယ်လို့ မမြင်ကြောင်း သူက ဆိုပါတယ်။
သမ္မတရှီဟာ သူ့လက်ထက်မှာ သဘောထားကွဲလွဲမှုတွေကို နှိမ်နင်းကိုင်တွယ်လေ့ရှိပြီး နည်းပညာမြင့် လူထုစောင့်ကြည့်ရေးစနစ်ကိုလည်း နေရာအနှံ့ ဖြန့်ကြက်ထားတဲ့အတွက် ဆန္ဒပြပွဲတွေဟာ ပိုခက်ခဲပြီး ပိုစွန့်စားရပါတယ်။
“ရှင်းလင်းတဲ့ နိုင်ငံရေးလမ်းစဉ် မရှိတဲ့အတွက် ဆန္ဒပြသူတွေကို ဖမ်းဆီးပြီး သူတို့ရှေ့ဆက်သွားဖို့ အရမ်းလွယ်ကူနေတာပါ။ ဟောင်ကောင်အရေး ဒါမှမဟုတ် ၁၉၈၉ ခုနှစ် တီယန်နန်မင်ရင်ပြင် အရေးအခင်း အတိုင်းအတာမျိုး ဖြစ်လာခဲ့ရင်တောင် တရုတ်ပြည်မ အစိုးရက တုန်လှုပ်မှာမဟုတ်ပါဘူး” လို့ အိုက်ဝေဝေက ပြောပါတယ်။
“နှစ်ပေါင်း ၇ဝ ကြာ အစိုးရကို မေးခွန်းထုတ်မယ့် ပညာတတ်တွေ၊ သတင်းမီဒီယာတွေကို အပြတ်ရှင်းထားခဲ့တာ၊ တရုတ်ပြည်မှာ နိုင်ငံရေးပတ်ဝန်းကျင် မရှိရအောင် ဆောင်ရွက်ထားတာကြောင့် ဆန္ဒပြလှုပ်ရှားမှုတွေကို ဘယ်သူမှ ဦးမဆောင်နိုင်လောက်ဘူး” အိုက်ဝေဝေက ရိုက်တာသတင်းဌာနကို ပြောပါတယ်။
