ဗြိတိန်နိုင်ငံရဲ့ စကိုင်းဆေဘာ (Sky Sabre) မစ်ဇိုင်းဒုံးကျည်တွေကို နေတိုးအဖွဲ့ဝင်နိုင်ငံဖြစ်တဲ့ ပိုလန်နိုင်ငံမှာ စပြီးတပ်ဖြန့်ချထားမယ်လို့ ဝါဆောမြို့ကို မတ် ၁၇ ရက်နေ့ ရောက်ရှိနေတဲ့ ဗြိတိန်ကာကွယ်ရေးဝန်ကြီးက ပြောပါတယ်။ 

အဆိုပါ မစ်ဇိုင်းကာကွယ်ရေးစနစ်က ဝေဟင်မှာ အသံအလျင်နှုန်းနဲ့ ဖြတ်သွားနေတဲ့ တင်းနစ်ဘောလုံးကိုတောင် မှန်အောင်ပစ်နိုင်စွမ်းရှိတယ်လို့ ဗြိတိန်ကာကွယ်ရေးဌာနက ကြေညာထားတာပါ။

ကာကွယ်ရေးဝန်ကြီး ဘန် ဝေါလေ့စ်က “ရုရှားတွေ နောက်ထပ်ကျူးကျော်လာမှာကို ဟန့်တားဖို့နဲ့ ပိုလန်ရဲ့ဝေဟင်ကို ကာကွယ်ဖို့ Sky Sabre တာလတ်ပစ်ဒုံးကျည်နဲ့ တပ်သား ၁၀၀ ကို ပိုလန်နယ်စပ်မှာ ချထားမယ်” လို့ ပြောပါတယ်။

ဝန်ကြီးချုပ်ဘောရစ်ဂျွန်ဆင်ရဲ့ ပြောရေးဆိုခွင့်ရှိသူကလည်း အခုပို့ပေးတဲ့ မစ်ဇိုင်းစနစ်ကို ပိုလန်အစိုးရက တောင်းဆိုမှုကြောင့် ချပေးထားပြီး ဗြိတိန်တပ်တွေရဲ့ ထိန်းချုပ်မှုအောက်မှာပဲ အမြဲရှိမယ်လို့ ပြောပါတယ်။