တရုတ်နိုင်ငံရဲ့ အိုလံပစ် ၃ ကြိမ်တိုင်တိုင် အလေးမချန်ပီယံဖြစ်သူ လျိုရှောင်ကျွန်းဟာ တားမြစ်ပစ္စည်းတခုကို သုံးစွဲထားကြောင်း စမ်းသပ်တွေ့ရှိခဲ့ပြီးနောက် အားကစားပြိုင်ပွဲတွေကနေ သူ့ကို ယာယီဆိုင်းငံ့ထားတယ်လို့ နိုင်ငံတကာ စမ်းသပ်စစ်ဆေးရေးအေဂျင်စီ (ITA) က ဒီဇင်ဘာ ၂၂ ရက်မှာ ပြောပါတယ်။
လျိုဟာ အောက်တိုဘာ ၃၀ ရက်က ပြိုင်ပွဲပြင်ပ စစ်ဆေးမှုအတွင်း ပေါ့စတစ်အဖြေတွေ့ရှိတဲ့ နမူနာကို ပြန်ရရှိခဲ့တယ်လို့ အပြည်ပြည်ဆိုင်ရာ အလေးမအဖွဲ့ချုပ် (IWF) ရဲ့ တားမြစ်ဆေး/ပစ္စည်း တိုက်ဖျက်ရေး အစီအစဉ် အများစုကို ကြီးကြပ်ရတဲ့ (ITA) က ပြောပါတယ်။
မနှစ်က တိုကျိုအိုလံပစ်မှာ ၈၁ ကီလိုဂရမ် အလေးမချန်ပီယံဆုကို ဆွတ်ခူးနိုင်ခဲ့ပြီး အသက်အကြီးဆုံး အိုလံပစ်ရွှေတံဆိပ် ရရှိခဲ့တဲ့ လျိုဟာ ကြွက်သားကြီးထွားမှု အားတိုးအောင် တားမြစ်ထားတဲ့ အီရီသရို ပွိုက်ယတင် ဆိုတဲ့ ပပ်တိုဒ် ဟော်မုန်းအားတိုးဆေးကို သုံးစွဲထားကြောင်း စမ်းသပ်တွေ့ရှိခဲ့တာပါ။
တရုတ်အလေးမအဖွဲ့ချုပ်ကတော့ မှတ်ချက်ပေးဖို့ တောင်းဆိုမှုအပေါ် ချက်ချင်းတုံ့ပြန်ခြင်း မရှိပါဘူး။
လျိုဟာ ၂၀၁၂ ခုနှစ်နဲ့ ၂၀၁၆ ခုနှစ် အိုလံပစ်ပြိုင်ပွဲတွေမှာ ၇၇ ကီလိုဂရမ် အလေးမ ရွှေတံဆိပ် ရရှိခဲ့ပါတယ်။
ပြီးခဲ့တဲ့နှစ်တွေအတွင်း အားကစားလောကမှာ တားမြစ်ဆေးသုံးစွဲမှု အများအပြားကို တွေ့ရှိခဲ့ရပါတယ်။
ဒီနှစ် ဇွန်လထဲမှာပဲ နိုင်ငံတကာ ထိပ်တန်း အလေးမအားကစားသမားတွေဖြစ်တဲ့ တားမက်စ် အာ့ဂျန်နဲ့ နီကူ ဗလတ် တို့ဟာ တားမြစ်ဆေးသုံးစွဲမှုအပေါ် ဖုံးကွယ်ထားတာကြောင့် တသက်တာ ပွဲပယ်ပြစ်ဒဏ် ချမှတ်ခံခဲ့ရပါတယ်။
