ရန်ကုန်တိုင်း တိုက်ကြီးမြို့မှာ စက်တင်ဘာ ၂၂ ရက်နေ့မနက်ပိုင်းက စစ်ကောင်စီခန့် ရာအိမ်မှူးတစ်ယောက် သေနတ်နဲ့ ပစ်သတ်ခံခဲ့ရတယ်လို့ ဒေသခံတွေဆီကနေ သိရပါတယ်။ 

တိုက်ကြီးမြို့ ဗောဓိကုန်းရပ်ကွက်က စစ်ကောင်စီခန့် ရာအိမ်မှူး သိန်းဝင်းဇော်ကို ဒီကနေ့ မနက် ၉ နာရီကျော်လောက်က ဘောလုံးကွင်း ၁ လမ်းအဝင်မှာ ဆိုင်ကယ်စီးလာတဲ့ လူ ၂ ယောက်က သေနတ်နဲ့ ပစ်သတ်လိုက်ပြီး ဆေးရုံအရောက်မှာ သေဆုံးသွားတယ်လို့ ဒေသခံတစ်ယောက်က DVB ကို ပြောပါတယ်။

အဲဒီရာအိမ်မှူးဟာ အကြမ်းဖက်စစ်အုပ်စု ရဲတပ်ဖွဲ့ဝင်တစ်ယောက်ရဲ့ သားတော်စပ်သလို စစ်ကောင်စီနဲ့ ပူးပေါင်းပြီး ပြည်သူတွေကို နည်းမျိုးစုံနဲ့ ဒုက္ခပေးနေတာကြောင့် ပစ်သတ်ခံရတာဖြစ်ပြီး ဘယ်အဖွဲ့စည်းက ပြုလုပ်တယ်ဆိုတာကိုတော့ မသိရသေးဘူး လို့ ဆိုပါတယ်။

အဲဒီရာအိမ်မှူး အသတ်ခံရပြီးနောက် အကြမ်းဖက်စစ်အုပ်စုတွေ ရောက်လာပြီးတော့ တိုက်ကြီးမြို့နယ်ထဲက နေရာတစ်ချို့မှာ လားသွားလမ်းလာပြည်သူတွေကို ပိတ်ဆို့ ရှာဖွေ စစ်ဆေးတာတွေ ပြုလုပ်နေတယ်လို့ သိရပါတယ်။

ဒီနေ့ တိုက်ကြီးမြို့မှာ စစ်အာဏာရှင်ဆန့်ကျင်ရေး ကျောင်းသားတွေ ဆန္ဒပြဖို့ စုရုံးနေတုန်း ရဲနဲ့ စစ်တပ်က အကြမ်းဖက် ပစ်ခတ်ဖြိုခွင်းပြီး တချို့ကို ရိုက်နှက် ဖမ်းဆီးခေါ်ဆောင်သွားတယ်လို့ သိရပါတယ်။

မနက်ပိုင်းက ဗိုလ်အောင်ကျော်လမ်းနားမှာ စုရုံးနေချိန် မျက်ရည်ယိုဗုံးတွေ၊ အသံဗုံးတွေ၊ သေနတ်တွေနဲ့ ပစ်ခတ် ဖြိုခွင်းခဲ့တာပါ။

“လူတွေကို ဆွဲတယ်။ ပြည်သူတွေက ပြန်တောင်းတဲ့အချိန်မှာ သေနတ်တွေနဲ့ ဆက်တိုက်ပစ်တာ။ ဘယ်နှစ်ချက်မှန်းတောင် မရေနိုင်ဘူး။ ကောက်လို့ရတဲ့ ကျည်ခွံကတော့ ၁၂ ခုပဲရှိတယ်။ အဲအချိန်မှာ ရိုက်တာကြောင့် တယောက် ခေါင်းကွဲပြီး အခု မျောနေတယ်” လို့ ဒေသခံတယောက်က ပြောပါတယ်။

ဆန္ဒပြသူတွေ ရပ်ကွက် လမ်းတွေထဲ တိမ်းရှောင်ချိန်မှာ လမ်းတွေ အိမ်တွေထဲထိ မျက်ရည်ယိုဗုံးတွေနဲ့ ပစ်သွင်းတာတွေလည်း လုပ်ခဲ့တယ်လို့ ဆိုပါတယ်။

ဒီနောက်မှာတော့ စစ်တပ်နဲ့ ရဲအင်အား ထပ်ဖြည့်လာပြီး အခု တိုက်ကြီးအဝင်တိုးဂိတ်ကိုလည်း ပိတ်ထားလိုက်တယ်လို့ ဒေသခံက ပြောပါတယ်။

“မှော်ဘီက စစ်ကား ၃ စီး၊ ရွှေမြယာရဲတပ်ရင်းက ၂ စီး၊ တိုင်းဗဟို လေ့ကျင့်ရေးတပ်က ၂ စီး၊ သဲဝါဘက်က လေကြောင်းကာကွယ်ရေးက ၃ စီးရောက်လာတယ်။ အခု ဗိုလ်အောင်ကျော်လမ်းထိပ်နဲ့ ဈေးထဲမှာ တပ်စွဲထားတယ်။”

နောက်ဆုံးသိရသလောက် အမျိုးသမီး ၂ ယောက်အပါအဝင် ၁၉ ယောက် ဖမ်းခံရပြီး ဒီထဲမှာ သာယာဝတီကလူတယောက်က အအေးထိုင်သောက်နေတုန်း ဖမ်းခံရတာလို့ ဒေသခံတွေက ပြောပါတယ်။