မကွေးတိုင်း မြိုင်မြို့နယ်၊ သရက်ကန်ရွာကို ဧပြီ ၂၉ ရက် မွန်းလွဲ ၂ နာရီလောက်က ဒရုန်းနဲ့ ဗုံးကြဲတိုက်ခိုက်ရာ ပျူးစောထီး ၁ ယောက် ဒဏ်ရာရခဲ့တယ်လို့ မြိုင်ပကဖက သိရပါတယ်။

ဒရုန်းနဲ့ အီနာဂါဗုံးသီး ၁၅ ကြိမ်ကြဲချ တိုက်ခိုက်ခဲ့တာကို ဧရာအနောက်ပြောက်ကျားတပ်ဖွဲ့နဲ့ TYK အဖွဲ့တို့နဲ့ ပူးပေါင်းလုပ်ဆောင်ခဲ့တာလို့ မြိုင်ပကဖ၊တပ်ရင်း(၁)၊ တပ်ခွဲ (၂) ဂဠုန်တပ်ဖွဲ့ရဲ့ တိုက်ခိုက်ရေးတာဝန်ခံ ရဲဘော်ဇေယျာက ပြောပါတယ်။

တိုက်ခိုက်မှုအတွင်းမှာ ပျူစောထီးသင်တန်း တက်ရောက်နေတဲ့ အမျိုးသမီး ၁ ယောက် ဒဏ်ရာ ရခဲ့တယ်လို့ ဆိုပါတယ်။

ရဲဘော်ဇေယျာက “သတင်းရတဲ့ အိမ်တွေကို သွားကြဲနေတာ။ အီနာဂါကလည်း မလုံလောက်တော့ လို့ တခါကြဲရင် လေးငါးခြောက် လုံးလောက်ဘဲ ကြဲနိုင်တာ အများကြီးမကြဲနိုင်ဘူး”လို့ ဆိုပါတယ်။

ဧပြီ ၂၆ ရက်မှာတော့ စစ်ကောင်စီရဲ့ တပ်ကြပ်အဆင့်ရှိသူ တယောက် ဒဏ်ရာ ရရှိပြီး ဧပြီ ၂၇ ရက်မှာလည်း ပျူစောထီးသင်တန်းတက်နေတဲ့ အမျိုးသမီး တယောက် ဒဏ်ရာ ရခဲ့တယ်လို့ ပြောပါတယ်။

အဲဒီရွာမှာ စစ်ကောင်စီတပ်သားတွေနဲ့ ပျူစောထီးတွေက မြိုင်မြို့ကနေ ၁၀တန်း စာမေးပွဲဖြေပြီး ပြန်လာတဲ့ အသက် ၁၆/၁၇ အရွယ်ကလေးတွေကို လက်နက်ကိုင်သင်တန်း ပေးနေတယ်လို့ ဆိုပါတယ်။

ချင်းပြည်နယ် ကန်ပက်လက်မြို့နယ်မှာ ဧပြီ ၂၉ ရက်က စစ်ကောင်စီတပ်သားတွေ တိုက်ခိုက်ခံရပြီး ၂ ယောက်သေဆုံးခဲ့တယ်လို့ CDF-ကန်ပက်လက်က ထုတ်ပြန်ထားပါတယ်။

အဲဒီဖြစ်စဥ်နဲ့ပတ်သက်လို့ CDF-ကန်ပက်လက်ရဲ့ တပ်မဟာမှူး ကိုထွန်းလိန်းကို ဆက်သွယ်ခဲ့ ပေမယ့် ဖုန်းလက်ခံဖြေကြားခြင်း မရှိသေးပါဘူး။

ကျင်ဒွေးမြို့ စစ်ကောင်စီတပ်စခန်းက စစ်ကောင်စီတပ်သားတွေဟာ ဧပြီ ၂၉ ရက်မှာ ကျေးရွာ တွေကို ဝင်ရောက်လာလို့ နှစ်ဘက် ထိတွေ့တိုက်ပွဲ ဖြစ်ပွားခဲ့တယ်လို့ ဆိုပါတယ်။

အဲဒီတိုက်ပွဲဟာ ကျင်ဒွေးမြို့နဲ့ ငါးအော်ကျင်းကျေးရွာကြားမှာ ဖြစ်ပွားခဲ့တာဖြစ်ပြီး တိုက်ပွဲ အတွင်း စစ်ကောင်စီတပ်သား ၂ယောက်သေဆုံးခဲ့ပြီး CDF-ကန်ပက်လက်က ရဲဘော်တွေ ထိခိုက်မှု မရှိဘဲ ဆုတ်ခွာနိုင်ခဲ့ကြတယ်လို့ ထုတ်ပြန်ချက်က ဆိုပါတယ်။

ကန်ပက်လက်မြို့နယ် ထွေအုပ်ရုံးမှာတပ်စွဲထားတဲ့ စစ်ကောင်စီတပ်သားတွေကိုလည်း ဧပြီ ၂၆ ရက် မနက်ပိုင်းမှာ CDF-ကန်ပက်လက်က သွားရောက်တိုက်ခိုက်ခဲ့လို့ စစ်ကောင်စီဘက်က ၁ ယောက် သေဆုံးကာ ၂ ယောက်အပြင်းထန်ဒဏ်ရာရရှိခဲ့တယ်လို့ သိရပါတယ်။

ကေအန်ယူနယ်မြေမှာရှိတဲ့ စစ်ကောင်စီ တပ်စခန်း ၂  ခုကို ကရင်အမျိုးသားလွတ်မြောက် ရေးတပ်မတော်(KNLA)က ဧပြီ ၂၂ ရက်မှာတိုက်ခိုက်သိမ်းပိုက် ဖျက်ဆီးနိုင်ခဲ့ပြီး စစ်ကောင်စီတပ်က ဒုတပ်ရင်းမှူးအပါအဝင် ၁၆ ဦးသေဆုံး၊ ၁၇ ဦး ဒဏ်ရာရတယ်လို့ ကေအန်ယူက  ဒီကနေ့ ထုတ်ပြန်ပါတယ်။

KNLA  တပ်မဟာ (၃) တပ်ပေါင်းစုတပ်ဖွဲ့တွေဟာ စစ်ကောင်စီရဲ့ တပ်စခန်း‌ ၄ ခုဖြစ်တဲ့ ကေအန်ယူ-မူးမြို့နယ်ရှိ နောင်ကုန်းစခန်း၊ ရန်မျိုးအောင်စခန်း၊ ကေအန်ယူ-လယ်ဒိုမြို့နယ်ရှိ ညောင်ကုန်းစခန်းနဲ့  ကျွန်းကုန်းစခန်းတို့ကို မနေ့မနက် ၄ နာရီခွဲကနေ ၅ နာရီခွဲအတွင်းမှာ  တပြိုက်နက် တိုက်ခိုက်ခဲ့တာပါ။

ညောင်ကုန်းစခန်းနဲ့ ကျွန်းကုန်းစခန်းကို တိုက်ခိုက်ချေမှုန်းဖျက်ဆီးနိုင်ပြီး လက်နက်တွေ သိမ်းဆည်းရမိခဲ့ပေမဲ့ နောင်ကုန်းစခန်းနဲ့ ရန်မျိုးအောင်စခန်းတွေမှာတော့ စစ်ကောင်စီတပ်တွေက စခန်းတွင်မနေပဲ အပြင်ဘက်သို့ ပုန်းရှောင်နေလို့ တိုက်ခိုက်ခဲ့ရတာမရှိဘူးလို့ဆိုပါတယ်။ 

တိုက်ခိုက်အပြီးမှာ စစ်ကောင်စီတပ်က လယ်ဒိုမြို့နယ်ရှိ ညောင်တန်း၊ ညောင်ကုန်းနဲ့ နရွဲပင်ကျေးရွာ ကြားမှာ ရဟတ်ယာဉ် ၂ စီး၊ ဂျက်တိုက်ယာဉ် ၁ စီးနဲ့ လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံရွာသားတွေ ဘေးလွတ်ရာထွက်ပြေးတိမ်းရှောင်ခဲ့ရတယ်လို့  ကေအန်ယူက ထုတ်ပြန်ပါတယ်။

ဒီတိုက်ပွဲမှာ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၃ တပ်ပေါင်းစုဘက်ကလည်း ၁ ဦး ကျဆုံးကာ ၂ ဦး ထိခိုက်ဒဏ်ရာရရှိခဲ့ပါတယ်။ 

ဒီတိုက်ပွဲနဲ့ ပတ်သက်ပြီး စစ်ကောင်စီဘက်ကို ဆက်သွယ်မေးမြန်းနိုင်ခြင်းမရှိသလို စစ်ကောင်စီဘက်ကလည်း သတင်းထုတ်ပြန်လေ့မရှိပါဘူး။

ကရင်ပြည်နယ်ထဲမှာ စစ်ကောင်စီတပ်တွေနဲ့ KNLA ၊PDF ပူးပေါင်းတပ်ဖွဲ့တွေ နေ့စဉ်လိုလို တိုက်ပွဲတွေ ဖြစ်ပွားနေတာဖြစ်ပါတယ်။