မြန်မာ့နွေဦးတော်လှန်ရေးမှာ တိုက်ပွဲဝင်ရင်း တိုင်းပြည်အတွက် အသက်ပေးသွားတဲ့ CDM လက်ထောက်ဘူမိဗေဒအရာရှိ ဦးသန်းဦးအတွက် ဝမ်းနည်းကြောင်း   အမျိုးသားညီညွတ်ရေးအစိုးရ (NUG)၊ သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနက ထုတ်ပြန်ပါတယ်။

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ဘူမိဗေဒလေ့လာရေးနှင့် ဓာတ်သတ္တုရှာဖွေရေး ဦးစီးဌာနမှ CDM ဝန်ထမ်း လက်ထောက်ဘူမိဗေဒအရာရှိ ဦးသန်းဦးဟာ တိုင်းပြည်တာဝန်ထမ်းဆောင်နေရင်း ဇန်နဝါရီ ၄ ရက်မှာ ကျဆုံးသွားခဲ့တာ ဖြစ်ပါတယ်။

ဒီသတင်းအပေါ် NUG အစိုးရအနေနဲ့ မိသားစုနဲ့ထပ်တူ ဝမ်းနည်းရပါကြောင်းနဲ့ မပြီးဆုံးသေးတဲ့ စစ်အာဏာရှင် ကျဆုံးရေးနဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် ဆက်လက်တိုက်ပွဲဝင်သွားမယ်လို့ ကတိပြုပြီး မှတ်တမ်းတင် ဂုဏ်ပြုအပ်တယ်လို့ NUG ကြေညာချက်မှာ ဖော်ပြထားပါတယ်။

မြန်မာနိုင်ငံမှာ အကြမ်းဖက်စစ်အုပ်စုက နိုင်ငံတော်အာဏာကို မတရားသိမ်းယူထားခဲ့တဲ့ ကာလဟာ ၂ နှစ်နီးပါး ကြာမြင့်လာခဲ့ပြီဖြစ်ပြီး မြန်မာ့နွေဦးတော်လှန်ရေး စတင်ချိန်ကတည်းက အကြမ်းမဖက်အာဏာဖီ ဆန်ရေးလှုပ်ရှားမှု (CDM) မှာ ပါဝင်ခဲ့ပြီး ရှေ့တန်းကနေ တိုက်ပွဲဝင်နေသူ၊ အဆုံးထိ စိတ်ဓာတ်မယိုင်လဲပဲ ဆက်လက်တော်လှန်နေကြတဲ့ ပြည်သူ့ဝန်ထမ်းကောင်းတွေဟာလည်း ပြည်သူတရပ်လုံးနဲ့ အတူ အမှန်တရားဘက်ကနေ မားမားရပ် ဆက်လက်တိုက်ပွဲဝင်နေကြဆဲ ဖြစ်ပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ ခုခံစစ်ကို ဆင်နွှဲနေကြတာ ဖြစ်ပါတယ်။

ပြည်သူ့ခုခံတွန်းလှန်စစ် ၁ နှစ်တာ ကာလအတွင်း စစ်ကောင်စီတပ်သား ၁၅,၀၀၀ နီးပါး သေဆုံးခဲ့ပြီး ထိခိုက်ဒဏ်ရာရသူ အယောက် ၄,၈၀၀ ကျော်ထိ ရှိခဲ့တယ်လို့ NUG အစိုးရ ကာကွယ်ရေးဝန်ကြီးဌာနက ထုတ်ပြန်ထားပါတယ်။

မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ အကြမ်းဖက်စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ရှမ်းပြည်နယ်တောင်ပိုင်း၊ အလယ်ပိုင်းတိုင်း စစ်ဌာနချုပ် စစ်ဒေသ  ၃ ၊ ၁၀၀၈ တပ်ရင်းမှ စခန်းမှူး CDM ရဲဘော် ချစ်ကောင်းဟာ မေလ ၁၅ ရက်က  ညောင်ရွှေမြို့နယ် ထီရိ ၊ ဆောင်နန်းခဲဘက်မှ စစ်ကြောင်းထိုးလာတဲ့ စစ်ကောင်စီတပ်ကို ခုခံကာကွယ်ရင်း ကျဆုံးသွားတယ်လို့  သူ့ရဲ့ တပ်ရင်းက ထုတ်ပြန်ထားပါတယ်။ 

“သတင်းကောင်းတွေရှိပေမယ့် သတင်းဆိုးကို အရင်ထုတ်ပြန်ပါရစေ။ ကျနော်တို့ရဲ့ ၁၀၀၈ တပ်ရင်း စခန်းမှူး ရဲဘော်ချစ်ကောင်း CDM  ဟာ စစ်ကောင်စီကို ခုခံရင်းကျဆုံးသွားတဲ့အတွက် မိသားစုနဲ့ထပ်တူ ဝမ်းနည်းစွာဖြင့်ထုတ်ပြန်လိုက်ရပါတယ်။ ကျဆုံးသွားသော ရဲဘော်ချစ်ကောင်းအား မိမိတို့ (၁၀၀၈) တပ်ရင်းမှ အာဇာနည်သူရဲကောင်းအဖြစ် အလေးနီပြုအပ်ပါတယ်” လို့ ၁၀၀၈ တပ်ရင်းက ထုတ်ပြန်ချက်မှာ ချက်မှာဖော်ပြပါတယ်။

ရှမ်းပြည်နယ်တောင်ပိုင်းရှိ တော်လှန်ရေးအင်အားစု ၅ဖွဲ့နဲ့ မဟာမိတ်ပူးပေါင်းထားတဲ့ ရှမ်းတောင် တော်‌လှန်ရေးလူငယ်များအဖွဲ့(SSRY) တပ်ရင်းကို အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာန၊ အလယ်ပိုင်းတိုင်းစစ်ဌာနချုပ် စစ်ဒေသ ၃ ၊ ၁၀၀၈ တပ်ရင်းအဖြစ် တရားဝင် တာဝန်ထမ်း ဆောင်ခွင့်ရပြီဖြစ်တယ်လို့ ၁၀၀၈ တပ်ရင်းက မေလ ၁၄ ရက် ညပိုင်းမှာ ကြေညာထားတာပါ။ 

ရှမ်းတောင်တော်လှန်ရေးလူငယ်များအဖွဲ့  SSRY တပ်ရင်းကို  ရှမ်းပြည်နယ်တောင်ပိုင်းရှိ တော်လှန်ရေးအင်အားစုတွေဖြစ်တဲ့ SSRY Eagle Force ၊ Dragon Force၊ Tai PDF Cobra Force ၊ Dove Guerrilla Force ၊ Southern Shan Irine Force အဖွဲ့တို့နဲ့  ပြီးခဲ့တဲ့  ဧပြီ  ၂၁ ရက်က  စုစည်းတည်ထောင်ခဲ့တာဖြစ်ပါတယ်။