စစ်ကိုင်းတိုင်း၊ တန့်ဆည်မြို့နယ်၊ ချောင်းရိုးကျေးရွာကို ဧပြီ ၁၁ ရက်နေ့ မနက် ၅ နာရီကျော်လောက်မှာ စစ်ကောင်စီက စစ်ကြောင်းထိုးလာပြီး ပစ်ခတ်သွားတာကြောင့် အမျိုးသမီး ၂ ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

“ရွာဘက်ကို စစ်ကြောင်းထိုးလာထိုးလာလို့ ရွာထိပ်က ကာကွယ်ရေးကင်းနဲ့ တွေ့ပြီး ပစ်ခတ်တာတွေ ဖြစ်ကြသေးတယ်။ လက်နက်သံတွေကြားရတော့ ရွာထဲက လူတွေ အကုန်ထွက်ပြေးရတယ်။ အဲလိုထွက်ပြေးတာကို စစ်ကောင်စီက ၄၀ မမ ၃ လုံးနဲ့ ပစ်ခတ်လို့ ကျနော်တို့ရွာက အသက် ၅၀ ကျော်အရွယ်နဲ့ အသက် ၄၀ ကျော် အမျိုးသမီးတွေ ဒဏ်ရာရတာတွေရှိတယ်ဗျ။ အသက်အန္တရာယ်ကတော့ မစိုးရိမ်ရဘူး” လို့ ချောင်းရိုးရွာ ဒေသခံ ကာကွယ်ရေးခေါင်းဆောင်က ပြောပါတယ်။

စစ်ကောင်စီကတော့ ချောင်းရိုးရွာအပါဝင် ရေဦးမြို့နယ်အတွင်းက ဘုန်ကြီးကျောင်းတကျောင်းကိုလည်း မီးရှို့သွားတယ်လို့ ဒေသခံတွေက ပြောပါတယ်။

စစ်ကောင်စီရဲ့စစ်ကြောင်းဟာ  စစ်ကိုင်းတိုင်း ပုလဲမြို့နယ်ဘက် ထွက်သွားပြီး အင်းကန်ရွာအနီးမှာ ဒီနေ့မနက် ၈ နာရီကျော်လောက်ကစတင်ပြီး ဒေသခံပြည်သူ့ကာကွယ်ရေးတပ်တွေ ၁ နာရီလောက်ကြာ တိုက်ပွဲဖြစ်ပွား‌ခဲ့တယ်လို့ ဒေသခံတွေက ပြောပါတယ်။

အင်းကန်ရွာသားတဦးက “ဒီနေ့မနက်ခင်း အင်မထီးရွာကနေ အင်အား ၂၀၀ ကျော်နဲ့ စစ်ကြောင်းထွက်လာပြီလို့ ကာကွယ်ရေးကင်းအဖွဲ့ ပြောတာနဲ့ ကျနော်တို့ဒေသခံတွေ အကုန်ထွက်ပြေးရတယ်။ ကျနော်တို့ ရွာထဲကနေ ထွက်လာပြီး  ခဏနေတော့  ပစ်သံ၊ ခတ်သံတွေ ကြားရတယ်။ အသေအဆုံးကတော့ မသိရသေးဘူး။ ကျနော်တို့လည်း အခုအချိန်အထိ ရွာထဲမဝင်ရသေးတော့ (-) တွေ ရွာထဲကနေ ဘာတွေယူလို့၊ ဘာတွေ ဖျက်ဆီးသွားမယ်ဆိုတာကတော့ အတိကျမသိရသေးဘူး” လို့ ပြောပါတယ်။

အင်မထီးရွာကနေထွက်လာတဲ့ စစ်ကောင်စီတပ် အင်အား ၂၀၀ ကျော်ဟာ ကိုင်းကန်၊ အင်းကန် စတဲ့ကျေးရွာတွေက စားနပ်ရိက္ခာတွေကို လုယူကာ နွားလှည်း ၃၀ ကျော်ပေါ်တင်ပြီး ယူဆောင်သွားကြတယ်လို့ ဒေသခံပြည်သူကာကွယ်ရေးအဖွဲ့တွေက ပြောပါတယ်။

“သူတို့ အင်မထီးပျူရွာကနေ ထွက်မယ်လို့ သတင်းကြားထားလို့ မိုင်းကွင်းထောင်ပြီး ၃ ရက်ရှိပြီ စောင့်နေတာ။ စခတွေက ကျနော်တို့ ခင်းထားတဲ့ မိုင်းကွင်းတွေရှောင်ပြီး အင်းကန်ရွာထဲဝင်ပြီး ပြည်သူတွေရဲ့ ပစ္စည်းတွေ လှည်းပေါ်တင်တာတွေ လုပ်တယ်။ သူတို့ရွာထဲကနေထွက်လာပြီး အင်းကန်တောင်ဘက်၊ ကိုင်းတွင်းရွာအနောက်ဘက်မှာ ကျနော်တို့ တော်လှန်ရေးအင်အားစုနဲ့ နာရီဝက်‌ခန့် တိုက်ပွဲဖြစ်ကြသေးတယ်။ အကျအဆုံးကတော့ နှစ်ဖက်လုံးမရှိလောက်ဘူး။ ကျနော်တို့လည်း လက်နက်အင်အားမမျှလို့ နောက်ဆုတ်ခဲ့တယ်” လို့ ပေါက်မြို့နယ်ရပ်ကျေး ပြည်သူ့ကာကွယ်ရေးတပ်ဖွဲ့ ဗိုလ်စကားပြောက်ကျားတပ်ဖွဲ့မှ ‌ထွေးညိုက ပြောပါတယ်။

အခုတိုက်ပွဲကို ပုလဲမြို့နယ်အတွင်းက တပ်ရင်းတပ်ဖွဲ့တွေ၊ ဒေသခံပြည်သူကာကွယ်ရေးအဖွဲ့တွေ ပါဝင်ပူးပေါင်းတိုက်ခိုက်ခဲ့တယ်လို့ ဆိုပါတယ်။

စစ်ကောင်စီတပ်ဟာ ညနေပိုင်းမှာ  ပုလဲမြို့နယ် မင်တိုင်ပင်ရွာမှာ ရောက်ရှိ တပ်စွဲနေတယ်လို့ ဒေသခံတွေက ပြောပါတယ်။

စစ်ကောင်စီ စစ်ကြောင်းဦးတည်ရာတလျှောက်က ကျေးရွာတွေကတော့ အရေးပေါ် နေရပ်စွန့်ခွာနေကြရတယ်လို့ ဒေသခံတွေက ပြောပါတယ်။

ရှမ်းပြည်နယ်မြောက်ပိုင်း၊ လားရှိုး - မူဆယ် ပြည်ထောင်စုလမ်း၊ မြောက်ပိုင်းလမ်းမအနီး တလျှောက် ဖေဖော်ဝါရီ ၉ ရက်နေ့ တရက်တည်း ကချင်လွတ်မြောက်ရေတပ်မတော် (ကေအိုင်အေ) နဲ့ စစ်ကောင်စီတို့အကြား တိုက်ပွဲ ၄ နေရာလောက် ဖြစ်ပွားပြီး အရပ်သားတဦး ဒဏ်ရာရခဲ့တယ်လို့ ဒေသခံတွေက ပြောပါတယ်။ 

ထိခိုက်ဒဏ်ရာရသူမှာ ကွတ်ခိုင်နဲ့ နမ့်ဖတ်ကာကြား၊ နမ့်ဖလွန်ရွာက အသက် ၉၁ နှစ်အရွယ် အရပ်သားအမျိုးသားတဦး ဖြစ်တယ်လို့ ဆိုပါတယ်။ 

"အခု ဒီ ကွတ်ခိုင်ဆေးရုံဘက် သယ်လာနေတယ်။ ... မစိုးရိမ်ရရင်တော့ ဒီမှာ ရောက်လာမှာ မဟုတ်ဘူး" လို့ မျက်မြင်တဦးက ပြောပါတယ်။ 

ဒေသခံ အမျိုးသမီးတဦးက "ဦးဖော်ဒါတန်။ လက်နက်ပြီး ကျည်စ စင်လာထိတာ ကျောကုန်းမှာ လာထိတာ" လို့ ပြောပါတယ်။

ဒီနေ့ မနက် ၈ နာရီ မိနစ် ၂၀ လောက်စပြီး သိန္နီဘက်ကနေ ကွက်ခိုင်ဘက် တက်လာတဲ့ စစ်ကောင်စီတပ်ကို ကေအိုင်အေ တပ်မဟာ ၄ ခြေမြန်တပ်ရင်း ၉ က ကွတ်ခိုင်နဲ့ ၃၈ မိုင် မန်ပြိန်းကြား ကောင်းခမ်းရွာအနီးမှာ ဆီးကြိုတိုက်ခိုက်ရာမှ တိုက်ပွဲပြင်းထန်ခဲ့တာလို့ ဒေသခံတွေက ပြောပါတယ်။ 

"ကွတ်ခိုင်မှာတော့ မဟုတ်ဘူး။ ဟို ပုန်းထွန်အထက် အကွေ့ကြီးတလျှောက် ဟုတ်တယ်။ အခု အသံကြားနေတယ်" လို့ ဒေသခံတဦးက ပြောပါတယ်။ 

ဒီနေ့ မနက် ၁၁ ဝန်းကျင်လောက်ကလည်း ကွတ်ခိုင်ကနေ နမ့်ဖတ်ကာဘက် တက်လာတဲ့ စစ်ကောင်စီတပ်ဖွဲ့ကို KIA တပ်မဟာ ၆၊ တပ်ရင်း ၉ နဲ့ တပ်မဟာ ၄ တပ်ရင်း ၈ ပူးပေါင်းအဖွဲ့တို နမ့်ဖလွန် ဆုတောင်းတောင်တဝိုက် စောင့်ကြို တိုက်ခိုက်ခဲ့ရာက တနာရီကျော်ကြာ ပြင်းပြင်းထန်ထန် တိုက်ပွဲဖြစ်ပွားခဲ့တာလို့ ဆိုပါတယ်။ 

မွန်းလွဲပိုင်း ၂ နာရီ ကျော်လောက်ကလည်း ကွတ်ခိုင်အကျော် လွယ်ဆမ်ဆစ်အနီးမှာလည်း စစ်ကောင်စီနဲ့ ကေအိုင်အေ တပ်မဟာ ၄ တို့ ထိတွေ့တိုက်ပွဲ ဖြစ်ပွားတယ်လို့ ကွတ်ခိုင် ဒေသခံတဦးက ပြောပါတယ်။ 

"လက်ရှိ အင်အား အကြီးကြီးနဲ့ ပြင်းပြင်းထန်ထန်ချနေကြတယ်။ ကွတ်ခိုင် လွယ်ဆမ်ဆစ် မြေပြန့်ကွင်းမှာ တကြိမ် ပြန်ဖြစ်နေပြီ။ ပွဲအကြီးကြီးပြန်ဖြစ်ပြီ။ စစ်ကောင်စီတပ် တပ်မ ၉၉ နဲ့။” 

ပြီးခဲ့တဲ့ ဖေဖော်ဝါရီ ၆ ရက်နေ့ည ၁၀ နာရီခွဲလောက်ကလည်း ရှမ်းပြည်နယ်မြောက်ပိုင်း မူဆယ်မြို့နယ်၊ ကြူကုတ် (ပန်ဆိုင်း) မြို့နယ်ခွဲ၊ မုံးပေါ်ဈေးရွာ အထက်ရှိ ပြည်သူ့စစ်စခန်းမှာ စခန်းချထားတဲ့ စစ်ကောင်စီတပ်ကို ကေအိုင်အေ တပ်မဟာ ၆ တပ်ရင်း ၃၆ က ဗုံးနဲ့ သွားရောက် ပစ်ခတ်ခဲ့ပါသေးတယ်။