ပြီးခဲ့တဲ့ရက်ပိုင်းက တိုက်ပွဲ ၃ ကြိမ်ဖြစ်ခဲ့ပြီး စစ်ကောင်စီတပ်သား ၁၀ ယောက်သေဆုံးခဲ့တယ်လို့ ချင်းပြည်ကာကွယ်ရေးတပ်-မတူပီ (CDF-Matupi) က ထုတ်ပြန်ပါတယ်။
ဧပြီ ၉ ရက်နေ့က မတူပီ-ပလက်ဝလမ်းဘက်ကို စတင်ထွက်ခွာလာတဲ့ စစ်ကြောင်းဟာ ဧပြီ ၁၀ ရက်နေ့မှာ CDF(Matupi) နဲ့ တိုက်ပွဲဖြစ်ပွားပြီး စစ်ကောင်စီဘက်က ၂ ယောက် ဒဏ်ရာရခဲ့တယ်လို့ ဆိုပါတယ်။
ဧပြီ ၁၀ ရက်ကနေ ၁၄ ရက်အတွင်း စစ်ကောင်စီတပ်တွေနဲ့ CDF-Matupi တို့ တိုက်ပွဲတွေဖြစ်ခဲ့ပြီး စစ်ကောင်စီတပ်ဖွဲ့ဝင် ၁၀ ယောက်သေဆုံး၊ ၅ ယောက်အပြင်းအထန် ဒဏ်ရာရခဲ့တယ်လို့ ဆိုပါတယ်။
စစ်ကောင်စီတပ်ဖွဲ့ဝင်တွေဟာ ဧပြီ ၁၂ ရက်နေ့မှာ ဝလံပီကျေးရွာ၊ ၁၃ ရက်နေ့မှာ ကလားကျေးရွာ၊ ၁၄ ရက်နေ့မှာ ဝလံသဲကျေးရွာတို့ကိုရောက်ပြီး ဒေသခံပြည်သူတွေရဲ့ ကြက်၊ ဝက်၊ ဆိတ်တွေကို ယူသွားတယ်လို့ ဆိုပါတယ်။
ဒါ့အပြင် ဝလံပီကျေးရွာက ပြည်သူတွေရဲ့ စပါးကျီတွေကိုလည်း မီးရှို့ဖျက်ဆီးခဲ့ကြတယ်လို့ ထုတ်ပြန်ချက်မှာ ဖော်ပြထားပါတယ်။
တိုက်ပွဲတွေကြောင့် မတူပီ-ပလက်ဝလမ်းမပေါ် ကျေးရွာတွေက ပြည်သူ ၁၀၀၀ လောက် တောတောင်တွေထဲမှာ စစ်ဘေးရှောင်နေကြရပြီး စစ်ကောင်စီတပ်ကလည်း မတူပီမြို့နယ်နေရာအနှံ့ကို စစ်ကြောင်းထိုးလာနေတယ်လို့ ဆိုပါတယ်။
CDF-Matupi နဲ့ စစ်ကောင်စီတပ်တို့ဟာ ပြီးခဲ့တဲ့ တနှစ်အတွင်း တိုက်ပွဲပေါင်း ၆၀ ကျော်ဖြစ်ခဲ့ပါတယ်။
ကရင်ပြည်နယ်အတွင်း ဒီဇင်ဘာ ၃၀ ရက်နေ့က စစ်ကောင်စီတပ် နဲ့ KNLA ပူးပေါင်းတပ်တို့ တိုက်ပွဲ ၃ ကြိမ်ဖြစ်ပွားခဲ့ပြီး စစ်ကောင်စီတပ်က အနည်းဆုံး ၁၀ ဦးသေဆုံးပြီး ၂၀ ကျော် ထိခိုက်ဒဏ်ရာရရှိကာ ၇ ဦး အရှင်ဖမ်းမိတယ်လို့ KNLA တာဝန်ရှိသူတစ်ဦးက ပြောပါတယ်။
ကရင်အမျိုးသားအစည်းအရုံး ကေအန်ယူ ထိန်းချုပ်နယ်မြေ တပ်မဟာ ၁ မှာတော့ စစ်ကောင်စီအသုံးပြုတဲ့ လမ်းကြောင်းကို KNLA ဘက်က ရှေ့ထွက်မိုင်း ၂ လုံးနဲ့ တိုက်ခိုက်ရာမှာ စစ်ကောင်စီတပ်သား ၂ ယောက် သေဆုံးခဲ့တယ်လို့ ဆိုပါတယ်။
အလားတူ ကေအန်ယူ တပ်မဟာ ၆ နယ်မြေ ကော့ကရိတ်မြို့အရှေ့ဘက် နှစ်မိုင်ခန့်အကွာ မနွယ်တောင် ဘုရားကုန်မှာ ထိုးစစ်လာဆင်လာတဲ့ စစ်ကောင်စီတပ်ကို ဒီနေ့မနက်ပိုင်းက ကရင်အမျိုးသားလွတ်မြောက်ရေးတပ်မတော် (KNLA) နဲ့ PDF ပူးပေါင်းတပ်တို့က ပစ်ခတ်တိုက်ခိုက်ခဲ့ရာမှ နှစ်ဖက်အပြန်အလှန် ဒီနေ့ညနေအထိ တိုက်ပွဲဖြစ်ပွားခဲ့ပြီး တပ်ကောင်စီတပ်က ၁၀ ယောက် သေဆုံးပြီး ၂၀ လောက် ဒဏ်ရာရရှိခဲ့တယ်လို့ တာဝန်ရှိသူက ပြောပါတယ်။
တိုက်ပွဲအတွင်း သေဆုံးသွားတဲ့ တပ်သားတွေကို ဒီနေ့ညနေပိုင်းအထိ စစ်ကောင်စီတပ်ဘက်က လာရောက်မယူနိုင်သေးဘူးလို့ ကေအန်ယူ တာဝန်ရှိသူက ပြောပါတယ်။
ကရင်ပြည်နယ်၊ မြဝတီမြို့တောင်ဘက် ၆ မိုင်လောက် ကေအန်ယူနယ်မြေထဲမှာလည်း ဒီဇင်ဘာ ၃၀ ရက်မနက်ပိုင်းက ကျူးကျော်ဝင်ရောက် တိုက်ခိုက်လာတဲ့ စစ်ကောင်စီတပ်ဖွဲ့ဝင် ၇ ယောက်ကို KNLA နဲ့ PDF ပူးပေါင်းတပ်ဖွဲ့တွေက အရှင်ဖမ်းဆီးရမိခဲ့ပါတယ်။
တပ်ခွဲမှူး ဗိုလ်ကြီး ၁ ဦးအပါအဝင် ၇ ဦးကို လက်နက်ခဲယမ်းတွေနဲ့အတူ ဖမ်းဆီးရမိခဲ့ပြီး သူတို့ကို ယာယီထိန်းသိမ်းထားကာ ကရင်အမျိုးသားအစည်းအရုံး (KNU) ရဲ့ ညွှန်ကြားချက်အတိုင်း လုပ်ဆောင်သွားမယ်လို့ KNLA တာဝန်ရှိသူက ပြောပါတယ်။
လေးကေ့ကော်ဒေသနဲ့ အနီးပတ်ဝန်းကျင်မှာ စစ်ကောင်စီတပ်တွေက ဒီနေ့ ထိုးစစ်ဆင်နေတဲ့အပြင် လက်နက်ကြီးတွေ အလွန်အကျွန်အသုံးပြု ပစ်ခတ်တာရှိနေတယ်လို့ ဒေသခံတွေက ပြောပါတယ်။
ကရင်ပြည်နယ်အတွင်း တိုက်ပွဲဖြစ်ပွားမှုကြောင့် သေဆုံးဒဏ်ရာရမှုနဲ့ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။
