တိုက်ဖွန်းမုန်တိုင်း တိုက်ခတ်လို့ ဂျပန်နိုင်ငံ ရှိဇုအိုခါ့မြို့မှာ စက်တင်ဘာ ၂၄ ရက်က မိုးသည်းထန်ပြီး လေပြင်းတိုက်ခဲ့တာကြောင့် အဆောက်အအုံတွေရဲ့ မြေညီထပ်တွေနဲ့ ကားတွေ ရေနစ်မြုပ်ခဲ့တယ်လို့ မီဒီယာတွေက ဖော်ပြပါတယ်။
မနက်စောစော ရိုက်ကူးထားတဲ့ ဗွီဒီယိုဖိုင်မှာ ကားခေါင်မိုးထိ ရေမြုပ်နေခဲ့တာပါ။
လျှပ်စစ်မီးနဲ့ ရေ ပြတ်လပ်နေတယ်လို့ ဒေသခံတွေက ပြောပါတယ်။
မြို့တော် တိုကျိုရဲ့ အနောက်တောင်ဘက်က ရှိဇုအိုခါ့မြို့မှာ စက်တင်ဘာ ၂၃ ရက်ကတည်းက စံချိန်တင် မိုးရွာသွန်းခဲ့ပြီး မိုးရေချိန် ၁၆ ဒသမ ၄၂ လက်မ ရှိခဲ့တယ်လို့ ဂျပန်မိုးလေဝသအေဂျင်စီ (JMA) က ပြောပါတယ်။
တိုက်ဖွန်း တာလက်စ်ရဲ့ဗဟိုချက်မှာ လေတိုက်နှုန်း တစ်နာရီ မိုင် ၄၀ နှုန်းနဲ့ တိုက်ခတ်နေပြီး အမြင့်ဆုံး လေတိုက်နှုန်းမှာ တစ်နာရီ ၅၆ မိုင် ရှိနေခဲ့ပါတယ်။
အိမ်ထောင်စု ၁ သိန်း ၂ သောင်းလောက် လျှပ်စစ်မီး ပြတ်တောက်ခဲ့တယ်လို့ ချုဘု လျှပ်စစ်ဓာတ်အားလိုင်းကုမ္ပဏီက ပြောပါတယ်။
မြေပြိုလို့ လျှပ်စစ် ဓာတ်တိုင် နှစ်တိုင် ပြိုကျခဲ့ပေမဲ့ မွန်းလွဲပိုင်းမှာ အိမ်ထောင်စုအများစု လျှပ်စစ်မီး ပြန်ရခဲ့ပါတယ်။
ချိဘုလျှပ်စစ်ဓာတ်အားလိုင်း ကုမ္ပဏီက ဓာတ်တိုင်တွေကို ပြန်စိုက်ဖို့ လနည်းနည်း ကြာမယ်လို့ ကျိုဒိုသတင်းဌာနက ခန့်မှန်းထားပါတယ်။
JMA က တိုက်ဖွန်းတာလက်စ်ကို စက်တင်ဘာ ၂၄ ရက် မနက်ပိုင်းမှာ အပူပိုင်းဆိုင်ကလုန်းအဖြစ် အဆင့်လျှော့ချလိုက်ပေမဲ့ ရှိဇုအိုခါ့မြို့မှာ နောက်ထပ် မိုးသည်းသည်းမည်းမည်း ရွာဦးမယ်လို့ ခန့်မှန်းရပြီး မြေပြိုမှုနဲ့ ရေကြီးမှုတွေအတွက် သတိထားဖို့ တိုက်တွန်းထားပါတယ်။
