တရုတ်အစိုးရဟာ တိုင်ဖွန်းမုန်တိုင်း အင်ဖှာက တရုတ်ပြည်မကြီး ကုန်းတွင်းပိုင်းကို မဝင်ရောက်မီ ဇူလိုင် ၂၅ ရက်မှာ ရထားလမ်းတွေနဲ့ သင်္ဘောဆိပ်တွေကို ပိတ်ချခဲ့ပြီး လေကြောင်း ခရီးစဉ်တွေကို ဖျက်သိမ်း လိုက်ပါတယ်။
ရွာသားတွေကိုလည်း ယာယီ ခိုလှုံရေးစခန်းတွေဆီ ဘေးကင်းအောင် ရွှေ့ပြောင်းခဲ့ပါတယ်။ မုန်တိုင်းဟာ တရုတ်နိုင်ငံ အရှေ့ဘက် ကမ်းရိုးတန်းက ကျဲ့ကျန်းပြည်နယ်နဲ့ ရှန်ဟိုင်းမြို့နားကနေ တနင်္ဂနွေနေ့ နှောင်းပိုင်းမှာ ကုန်းတွင်းပိုင်းကို ဝင်ရောက်မယ်လို့ ခန့်မှန်းထားပါတယ်။
နိုင်ငံရဲ့ တခြားအစိတ်အပိုင်းတွေမှာတော့ ဒီသီတင်းပတ် အစောပိုင်းက ရေဘေးကနေ ပြန်နာလန်ထဖို့ ကြိုးစား ရုန်းကန်နေဆဲပါ။
ရှန်ဟိုင်းလေဆိပ်အာဏာပိုင်အဖွဲ့က ပူဒေါင်နဲ့ ဟုံချောင် နိုင်ငံတကာ လေဆိပ်တွေက လေကြောင်းခရီးစဉ်တွေ အားလုံးကို တနင်္ဂနွေနေ့အတွက် ဖျက်သိမ်းကြောင်း ကြေညာခဲ့ပါတယ်။
မုန်တိုင်းအတွက် တရုတ်အာဏာပိုင်တွေက သတိပေးချက် တတိယ အမြင့်ဆုံးအဆင့် ထုတ်ပြန် ကြေညာထားပါတယ်။
ဒေသတွင်း ရထားစီးရေ ၁၀၀ ကျော်ကိုလည်း ခရီးစဉ် ဖျက်သိမ်းထားတယ်လို့ တရုတ် မီးရထားဌာနက ပြောပါတယ်။
