မန္တလေးတိုင်း၊ စဉ့်ကူးမြို့မှာ နိုဝင်ဘာ ၉ ရက် နေ့လယ်ပိုင်း ပြည်ထောင်စုကောင်းကျိုးဆောင်ပါတီ (UBP) ကနေ တိုင်းဒေသကြီးလွှတ်တော်အမတ်လောင်းအဖြစ် ဝင်ပြိုင်ဖူးသူတစ်ဦး သေနတ်နဲ့ ပစ်သတ်ခံခဲ့ရတယ်လို့ သိရပါတယ်။

သူရရွှေမန်းရဲ့ UBP ပါတီမှာ ဝင်ရောက်ပြီး တိုင်းဒေသကြီး လွှတ်တော်ကိုယ်စားလှယ်နေရာက ဝင်ပြိုင်ဖူးတဲ့   ဦးဘချစ်(ခ)ဦးအောင်ကျော်စိုးဟာ ဆိုင်ကယ်စီးလာစဉ် သေနတ်နဲ့ ပစ်သတ်ခံတာလို့ ဒေသခံတွေက ပြောပါတယ်။

“ဆိုင်ကယ်နဲ့ နှစ်ယောက်က ပစ်သွားတာ ဘယ်သူလဲဆိုတာတော့ မသိလိုက်ရဘူး။  လည်ပင်းကို သေနတ်မှန်ပြီးသေသွားတာ" လို့ ဒေသခံတစ်ဦးက ပြောပါတယ်။

ဦးဘချစ်ဟာ ဒေသခံ PDF တွေရဲ့ စခန်းများကိုစုံစမ်းပြီး စစ်ကောင်စီကို သတင်းပေးနေတဲ့အတွက် ရှင်းလင်းလိုက်တာလို့ စဉ့်ကူးအခြေစိုက် Singu Guerrillas Force -SGF  လူမှုကွန်ရက်စာမျက်နှာမှာ ထုတ်ပြန်ထားပါတယ်။

နိုဝင်ဘာလအတွင်းမှာပဲ စဉ့်ကူးမြို့နယ်ထဲက ကျဉ်တောက်ပေါက်ကျေးရွာအုပ်ချုပ်ရေးမှူး ဦးမောင်ငယ်နဲ့ ဟင်္သာမကျေးရွာအုပ်ချုပ်ရေးမှူး ဦးခင်မောင်သန်းတို့နှစ်ဦးလည်း သေနတ်နဲ့ ပစ်သတ်ခံရလို့ သေဆုံးခဲ့ပါတယ်။

မကွေးတိုင်း၊ တောင်တွင်းကြီးမြို့မှာ၊ မောင်တိုင် ၁ ရပ်ကွက်အတွင်းမှာ ရှိတဲ့ NLD ပါတီမှာ တိုင်းဒေသကြီးလွှတ်တော်ကိုယ်စားလှယ်အဖြစ် တာဝန်ထမ်းဆောင်ခဲ့တဲ့ ဦးဝင်းမြင့်လှိုင် (ခေါ်) ကိုလှိုင်လှိုင် ရဲ့ နေအိမ် စက်တင်ဘာလ ၇ ရက်နေ့မနက် ၅ နာရီဝန်းကျင်လောက်က ဖျက်ဆီးခံလိုက်ရတယ်လို့ သိရပါတယ်။

ဒေသခံမျက်မြင်တဦးက “သူ့အိမ်မှာ လူမနေတာကြာပြီ။ ဒီနေ့မနက်စော ၅ နာရီကျော်လောက်က ဆိုင်ကယ် ၁ စီးနဲ့လူ ၂ ယောက်ရောက်လာပြီး ခြံဝင်းတံခါးသော့ကို ဖျက်တာမရလို့ ခြံစည်းရိုးကျော်ပြီး အိမ်တံခါးမှန်တွေကို ရိုက်ခွဲသွားပြီး ပြန်ထွက်သွားတယ်” လို့ ပြောပါတယ်။

ဦးဝင်းမြင့်လှိုင်ရဲ့ နေအိမ်နဲ့ စစ်ကောင်စီတပ်တွေ တပ်စွဲထားတဲ့ လူမှုကူညီရေးအသင်းရုံးဟာ ကိုက် ၁၀၀ မျှသာ ဝေးကွာပြီး အခုဖြစ်စဉ် ဖြစ်ပွားတဲ့အချိန်ဟာ အများပြည်သူအပြင်ထွက်ဖို့ သတ်မှတ်ထားတဲ့ မနက် ၆ နာရီကနေ မွန်းတည့် ၁၂ နာရီကြားမှာ ဖြစ်တာမဟုတ်တဲ့အတွက် ရည်ရွယ်ချက်ရှိရှိ လာရောက်ဖျက်ဆီးသွားတာဖြစ်လို့ တရားဥပဒေအရ ဆောင်ရွက်ဖို့ ရဲစခန်းကို ဆက်သွယ်အကြောင်းကြားထားတယ်လို့ ဦးဝင်းမြင့်လှိုင်က ပြောပါတယ်။

ပြီးခဲ့တဲ့ သြဂုတ်လ ၂၅ ရက်နေ့ကလည်း အိမ်ကို စစ်ကောင်စီတပ်တွေက ဝင်ရောက်ရှာဖွေသွားပြီး CCTV အတိုင်စက်ကိုလည်း သူတို့တွေ ဖြုတ်ယူသွားကြတယ်လို့ ဦးဝင်းမြင့်လှိုင်က ဆက်လက်ပြောပြပါတယ်။

ဦးဝင်းမြင့်လှိုင်ဟာ NLD ပါတီကနေ ၂၀၁၅ ကနေ ၂၀၂၀ ဒုတိယအကြိမ် မကွေးတိုင်းဒေသကြီးလွှတ်တော်ရဲ့ အမှတ် ၂ တိုင်းဒေသကြီးလွှတ်တော်ကိုယ်စားလှယ်အဖြစ် တာဝန်ထမ်းဆောင်ခဲ့သူလည်း ဖြစ်ပါတယ်။