မကွေးတိုင်းဒေသကြီး မြိုင် PDF က တီထွင်ထုတ်လုပ်လိုက်တဲ့ လက်နက်တွေကို ဒီဇင်ဘာ ၂၃ ရက်နေ့ ရက်စွဲနဲ့ ထုတ်ဖော်ပြသလိုက်ပါတယ်။
မြိုင် PDF တပ်ဖွဲ့အနေနဲ့ မြို့နယ်ထဲမှာရှိတဲ့ တော်လှန်ရေးအဖွဲ့တွေနဲ့ ပူးပေါင်းကာ လက်လုပ်ရှော့ဒုန်း၊ လက်လုပ် သေနတ်တွေတီထွင်ထုတ်လုပ်နိုင်ခဲ့ပြီး စစ်ကောင်စီတပ်တွေကို အဲဒီလက်နက်တွေအသုံးပြုပြီး တိုက်ခိုက်နေတယ်လို့ မြိုင် PDF ရဲ့ ပြန်ကြားရေးတာဝန်ခံ ဗိုလ်ခွင့်ချိန်က ပြောပါတယ်။
လက်ရှိအချိန်မှာ အဲဒီလက်နက်တွေတီထွင် ထုတ်လုပ်ထားတာကို မိဘပြည်သူတွေကို ချပြသင့်ပြီထင်တာကြောင့် မနေ့က ထုတ်ဖော်ပြသလိုက်တာလို့ ဆိုပါတယ်။
ပေါက်မြို့နယ်နဲ့ မြိုင်မြို့နယ်အစပ်မှာလည်း ဒီဇင်ဘာလ ၂၁ ရက်နဲ့ ၂၂ ရက်နေ့တွေမှာ စစ်ကောင်စီတပ်တွေကို မြိုင် PDF က တီထွင်ထုတ်လုပ်ထားတဲ့ ဆွဲမိုင်း၊ တိုက်မိုင်း၊ တာဝေးပစ်ရှော့ဒုန်းတွေနဲ့ ပစ်ခတ်တိုက်ခိုက်ခဲ့တာကြောင့် စစ်ကောင်စီတပ်သား ၂၃ ယောက်လောက် သေဆုံးခဲ့တပ်လို့ အဲဒီတပ်ဖွဲ့ကနေ သိရပါတယ်။
ပြီးခဲ့တဲ့ ရက်ပိုင်းကလည်း မြင်းခြံမြို့ PDF အဖွဲ့နဲ့ ရေစကြိုမြို့ ရေလယ်ကျွန်းဒေသက PDF အဖွဲ့နှစ်ဖွဲ့ပူးပေါင်းပြီး တာဝေးပစ် အဝေးထိန်းစိန်ပြောင်း ထုတ်လုပ်မှု အောင်မြင်ခဲ့တယ်လို့ သိရပါတယ်။
