လာမယ့် ကာတာကမ္ဘာ့ဖလား ဘောလုံးပြိုင်ပွဲမှာ တိုက်စစ်မှူးနေမာ မပါဝင်နိုင်အောင် တူနီးရှားအသင်းက လုပ်ဆောင်ခဲ့တယ်လို့ ဘရာဇီးနည်းပြ ထိထီက ပြောကြားလိုက်ပါတယ်။
ပြင်သစ်နိုင်ငံ ပဲရစ်မှာကစားခဲ့တဲ့ ဘရာဇီးနဲ့ တူနီးရှားအသင်းတို့ရဲ့ ခြေစမ်းပွဲစဉ်မှာ နေမာကို တူနီးရှားကစားသမားတွေက ပစ်မှတ်ထားပြီး ခပ်ကြမ်းကြမ်း ဖျက်ထုတ်ကစားခဲ့တာနဲ့ ပတ်သက်ပြီး နည်းပြက ပြောကြားလိုက်တာ ဖြစ်ပါတယ်။
အဲဒီပွဲစဉ်မှာ ဘရာဇီးက ၅ ဂိုး ၁ ဂိုးနဲ့ အနိုင်ရခဲ့ပြီး ပွဲချိန် ၄၃ မိနစ်မှာ နေမာကို တူနီးရှားနောက်ခံလူ ဘရွန်းက ကြမ်းတမ်းစွာဖျက်ထုတ်ခဲ့လို့ တိုက်ရိုက်အနီကတ်နဲ့ ထုတ်ပယ်ခံခဲ့ရပါတယ်။
တူနီးရှားကစားသမားတွေဟာ နေမာကို ဒဏ်ရာရရှိအောင် လုပ်ဆောင်ခဲ့ကြပြီး ခြေစမ်းပွဲစဉ်မှာ စိတ်ပိုင်းဆိုင်ရာ ခံစားချက်တွေနဲ့ ပြိုင်ပွဲကြီးအသွင် ကစားခဲ့ကြောင်း ဘရာဇီးနည်းပြ ထိထီက ပွဲအပြီးမှာ ပြောပါတယ်။
အဲဒီပွဲစဉ်မှာ ပရိသတ်တွေက ဘရာဇီးကစားသမားတွေကို လေဆာမီးနဲ့ ထိုးခဲ့ကြသလို ရစ်ချာလီဆန် ဂိုးသွင်းယူအပြီးမှာလည်း ငှက်ပျောသီးအခွံနဲ့ ပစ်ပေါက်ခဲ့ကြပါသေးတယ်။
