တောင်ကိုရီးယားကုမ္ပဏီနှစ်ခုက တင့်ကားတွေနဲ့ ဟောင်ဝစ်ဇာအမြောက်တွေ တင်ပို့ဖို့ ပိုလန်အစိုးရနဲ့ အမေရိကန်ဒေါ်လာ ၅ ဒသမ ၇၆ ဘီလီယံတန် သဘောတူညီချက် ရခဲ့တယ်လို့ တောင်ကိုရီးယားအစိုးရရဲ့ လက်နက်ဝယ်ယူရေးအေဂျင်စီက ပြောပါတယ်။
ရုရှားအစိုးရနဲ့ တင်းမာမှုတွေကြားမှာ လက်နက်တင်သွင်းမှု အရှိန်မြှင့်ဖို့ ပိုလန်အစိုးရက သဘောတူခဲ့တာပါ။
အိမ်နီးချင်း ယူကရိန်းကို ရုရှားက ကျူးကျော်လို့ စစ်ရင်ဆိုင်ရချိန်မှာ သြဂုတ် ၂၆ ရက်က ပိုလန်နိုင်ငံမှာ လက်မှတ်ရေးထိုးခဲ့တဲ့ စာချုပ်တွေဟာ ပြီးခဲ့တဲ့လမှာ ချုပ်ဆိုခဲ့တဲ့ အကြီးမားဆုံး လက်နက်သဘောတူညီချက်ရဲ့ တစ်စိတ်တစ်ပိုင်း ဖြစ်ပါတယ်။
ဟွန်ဒိုင်းရိုတမ် ကုမ္ပဏီဟာ K2 Black Panther တင့်ကားတွေကို ပိုလန်ဆီတင်ပို့မှာဖြစ်ပြီး ဟန်းဝှါ ကော်ပိုရေးရှင်းရဲ့ ကာကွယ်ရေးယူနစ်ဟာ ပိုလန်နိုင်ငံဆီ K9 ဟောင်ဝစ်ဇာအမြောက်တွေကို ပေးပို့မယ်လို့ ကာကွယ်ရေးပစ္စည်းအစီအစဉ်စီမံဌာန (DAPA) က ပြောပါတယ်။
ပိုလန်ဟာ သဘောတူညီချက်အရ K2 တင့်ကား ၁၈၀၊ သတ်မှတ်ထားတဲ့ အရေအတွက် မဖော်ပြတဲ့ ဟောင်ဝစ်ဇာအမြောက်တွေနဲ့ FA-50 တိုက်လေယာဉ် ၄၈ စင်းတို့ကို ဝယ်ဖို့ သဘောတူခဲ့တာပါ။
သောကြာနေ့က ချုပ်ဆိုတဲ့ စာချုပ်ဟာ ပထမအရစ် တစ်ခုအတွက် အကျုံးဝင်တယ်လို့ DAPA က ပြောပါတယ်။
ဂျက်လေယာဉ်တွေအတွက် သဘောတူညီချက်ကို လာမယ့်လမှာ ချုပ်ဆိုဖို့ မျှော်လင့်ထားပါတယ်။ သဘောတူညီချက်တရပ်လုံးရဲ့ တန်ဖိုးကို နှစ်ဖက်အစိုးရတွေက မကြေညာထားပေမဲ့ ကိုရီးယား ဝမ် ၂၀ ထရီလီယံ (ဒေါ်လာ ၁၅ ဘီလီယံ) အထိရှိမယ်လို့ တောင်ကိုရီးယားမီဒီယာတွေက ခန့်မှန်းပါတယ်။
ရုရှားရဲ့ ယူကရိန်းကျူးကျော်စစ်ဟာ အရှေ့ဥရောပနိုင်ငံအများအပြားကြားမှာ လုံခြုံရေးကို စိုးရိမ်စေခဲ့တာပါ။
နေတိုးအဖွဲ့ဝင် ပိုလန်နိုင်ငံဟာ စစ်အသုံးစရိတ်ကို ပြည်တွင်းအသားတင်ထုတ်ကုန်ရဲ့ ၃ ရာခိုင်နှုန်းအထိ တိုးမြှင့်မှာဖြစ်ပြီး တိုက်ခိုက်မှုမှန်သမျှကို ဟန့်တားဖို့ စစ်တပ် အရွယ်အစားကို နှစ်ဆကျော်အထိ တိုးမြှင့်သွားမယ်လို့ ကတိပြုထားပါတယ်။
