တောင်ကိုရီးယားသမ္မတ ယွန်းဆွတ်ခ်ယိုးဟာ လုပ်ကြံသတ်ဖြတ်ခံခဲ့ရတဲ့ ဂျပန်ဝန်ကြီးချုပ်ဟောင်း ရှင်ဇိုအာဘေးကို နောက်ဆုံး ဂါရဝပြုဖို့ ဇူလိုင် ၁၂ ရက်က ဆိုးလ်မြို့တော် ဂျပန်သံရုံးကို ရောက်လာပါတယ်။
ဂျပန်ရဲ့ သက်တမ်းအရှည်ဆုံး ဝန်ကြီးချုပ်ဟောင်း အာဘေး လုပ်ကြံခံရအပြီး လေးရက်အကြာမှာ ရောက်လာတဲ့ သမ္မတကို အာဘေးအတွက် အထိမ်းအမှတ်စားပွဲရှေ့မှာ တောင်ကိုရီးယား နိုင်ငံဆိုင်ရာ ဂျပန်သံအမတ်ကြီး ခိုအိချိ အာ့အိဘိုရှိက ကြိုဆိုနှုတ်ဆက်ပါတယ်။
အဲဒီနောက် သမ္မတဟာ အာဘေးရဲ့ ဓာတ်ပုံရှေ့မှာ ငြိမ်သက်အလေးပြုခဲ့ပြီး စာနာကြောင်းကိုလည်း သံအမတ်ကြီး ကို ပြောခဲ့ပါတယ်။
အသက် ၆၇ နှစ်အရွယ် အာဘေးဟာ နိုင်ငံအနောက်ပိုင်း နရာမြို့က မဲဆွယ်ပွဲမှာ ဇူလိုင် ၈ ရက် က မိန့်ခွန်းပြောနေတုန်း သေနတ်သမားရဲ့ လုပ်ကြံ သတ်ဖြတ် ခံခဲ့ရတာပါ။
ဒါကြောင့် နိုင်ငံရေး အကြမ်းဖက်မှုနဲ့ သေနတ်ကိုင် ရာဇဝတ်မှု အင်မတန် ရှားပါးတဲ့ ဂျပန်နိုင်ငံမှာ ထိတ်လန့်တုန်လှုပ်ခဲ့ကြရပါတယ်။
ဂျပန်ဟာ တောင်ကိုရီးယားနိုင်ငံကို ဒုတိယကမ္ဘာစစ် မတိုင်ခင် ၃၅ နှစ်ကြာ ကိုလိုနီပြုခဲ့ဖူးပြီး ကျွန်းတချို့အတွက် ပြည်သူတွေကြား ပိုင်နက်အငြင်းပွားနေပါတယ်။
ဂျပန်မီဒီယာတွေ၊ ဂီတ၊ ကာတွန်းကားတွေနဲ့ ရုပ်သံဇာတ်လမ်းတွေ ထုတ်လွှင့်တာကိုလည်း တောင်ကိုရီးယားမှာ ကန့်သတ်ထားပါတယ်။
