ရှမ်းပြည်နယ်။ တောင်ကြီးမြို့မှာ ညပိုင်းအချိန် အပြင်ထွက် သွားလာတဲ့ လူငယ်တွေကို စစ်ကောင်စီတပ်က ဖမ်းဆီးပြီး ငွေညှစ်နေတယ်လို့ မြို့ခံတွေက ပြောပါတယ်။
မတ်လနောက်ဆုံးပတ်က ည ၈ နာရီကျော်လောက်မှာ လမ်းပေါ်မှာ ဂစ်တာတီးနေတဲ့ လူငယ်တွေကို စစ်တပ်က ဖမ်းဆီးပြီး ငွေနဲ့ ပြန်ရွေးခိုင်းခဲ့တယ်လို့ နီးစပ်သူ တဦးက ပြောပါတယ်။
"သူတို့တွေ ပိုက်ဆံရှာနေကြပုံပဲ။ ဂီတာ မတီးလည်း ဒီတိုင်းကို ပတ်ဖမ်းနေတာ။ ဖမ်းချင်တဲ့အချိန် ဖမ်းတာ။ ည ၈ နာရီလည်း ဖမ်းတာပဲ။"
မတ် ၂၈ ရက်ကလည်း ည ၁၁ နာရီက ဘားကနေ ပြန်လာတဲ့သူတွေကို လှည့်ကင်းရဲတွေ ဖမ်းပြီး အချုပ်ထဲ တညထည့်ကာ ငွေကျပ် ၂ သိန်းတောင်းတာကြောင့် ငွေကျပ် တသိန်းခွဲပေးခဲ့ရတယ်လို့ ရပ်ကွက်ထဲက အမျိုးသမီးတဦးက ပြောပါတယ်။
ဒေသခံ အမျိုးသားတဦးက "ခေတ်အခြေအနေ မကောင်းတော့ နေတတ်မှ တော်ကာကျမယ်"လို့ ပြောပါတယ်။
မတ်လ နောက်ဆုံးအပတ်အတွင်း အဖမ်းခံရပြီး ငွေနဲ့ ပြန်ရွေးရတဲ့ လူငယ်တွေဟာ အသက် ၂၀ အရွယ် လူငယ် ၁၀ ယောက်မက ရှိနေတယ်လို့ ဆိုပေမဲ့ အရေအတွက်အတိအကျကိုတော့ သီးခြားအတည်ပြုနိုင်ခြင်း မရှိပါဘူး။
တောင်ကြီးမြို့မှာ ညမထွက်ရအမိန့် (မာရှယ်လော) ထုတ်ပြန်ထားတာမျိုး မရှိဘဲ စစ်ကောင်စီတပ်က ကြုံသလို ဖမ်းဆီးပြီး ငွေနဲ့ပြန်ရွေးခိုင်းနေတာဖြစ်ပါတယ်။
ရှမ်းပြည်နယ်တောင်ပိုင်း၊ တောင်ကြီးမြို့တော်ရဲ့ အထင်ကရ ပွဲတော်တခုဖြစ်တဲ့ ရိုးရာမီးပုံးပျံပွဲနဲ့ တန်ဆောင်တိုင်ပွဲတော်ကို စည်ကားစေဖို့ စစ်ကောင်စီက နည်းမျိုးစုံနဲ့ ဖိအားပေးနေတယ်လို့ မြို့ခံတွေက ပြောပါတယ်။
တန်ဆောင်တိုင် မီးပုံးပျံလွှတ်တင်ပွဲမှာ မီးပုံးအရေအတွက် နည်းပါးတဲ့အတွက် ရပ်ကွက်တခုကို မီးပုံးပျံတခု ကိုယ်စားပြုပြီး မဖြစ်မနေ လုပ်ဆောင်ရမယ်လို့လည်း စစ်ကောင်စီက ရပ်ကွက်ရုံးတွေကို အမိန့်ပေးထားတယ်လို့ မီးပုံးပျံလုပ်တဲ့ အဖွဲ့အစည်းတွေက ဆိုပါတယ်။
မီးပုံးပျံပွဲတော်ကို နိုဝင်ဘာ ၇ ရက်ကနေ ၉ ရက်နေ့အထိ ပြုလုပ်မှာဖြစ်ပြီး မြို့ခံတွေက ဝေဖန်နေကြသလို လူမှုကွန်ရက်စာမျက်နှာတခုမှာလည်း မီးပုံးပျံပွဲနဲ့ပတ်သက်ပြီး သဘောထား မှတ်ချက်ရေးခဲ့သူ မြို့ခံအမျိုးသမီးတယောက်ကို စစ်ကောင်စီက နိုဝင်ဘာ ၂ ရက်မှာ ဖမ်းဆီးခဲ့ပါတယ်။
