မန္တလေးမြို့ အမရပူရမြို့နယ်ရှိ ဦးပိန်တံတားအနီး တောင်သမန်အင်းရေပြင်အတွင်း မတ်လ ၂၉ ရက် မနက် ၁၁ နာရီဝန်းကျင်က ရေဆင်းကူးရာကနေ အမျိုးသားတဦး ရေနစ်သေဆုံးမှု ဖြစ်ခဲ့ပါတယ်။

သေဆုံးသူ အမျိုးသားဟာ အမရပူရမြို့နယ်အတွင်း နေထိုင်သူ အသက် ၁၆ နှစ်အရွယ်ဖြစ်ပြီး မြန်မာနိုင်ငံလှုမှုကယ်ဆယ်ရေးအဖွဲ့ (မန္တလေးတိုင်းရုံး)က နယ်မြေခံအသင်းတွေနဲ့ ပူးပေါင်းကာ ရှာဖွေကယ်ဆယ်ရေးလုပ်ငန်းတွေ လုပ်ဆောင်ခဲ့ပါတယ်။

“အိမ်ကို ဘောလုံးကန်သွားလိုက်ဦးမယ်ဆိုပြီး ထွက်သွားတာတဲ့။ ရေဆင်းကူးတော့ ရေနစ်ပြီး အလောင်းပဲ ဆယ်လို့ရတယ်” လို့ ကယ်ဆယ်ရေးမှာ ပါဝင်ခဲ့သူတဦးက ပြောပါတယ်။

မန္တလေးမြို့မှာ နေ့အပူချိန် မြင့်တက်လာတာနဲ့အမျှ မြစ်ချောင်းတွေမှာ အပန်းဖြေ အပူရှောင်သွားရင်း ရေနစ်တဲ့ ဖြစ်စဉ်တွေ ဖြစ်တက်ပါတယ်။

မတ်လ ၁၂ ရက်နဲ့ ၁၆ ရက်နေ့တုန်းကလည်း ဒုဋ္ဌဝတီမြစ်အတွင်း ရေဆင်းကူးရာကနေ ရေနစ် သေဆုံးတာတွေ ဖြစ်ခဲ့တယ်လို့ မြန်မာနိုင်ငံလှုမှုကယ်ဆယ်ရေးအဖွဲ့ (မန္တလေးတိုင်းရုံး)က သိရပါတယ်။

မြန်မာနိုင်ငံလှုမှုကယ်ဆယ်ရေးအဖွဲ့ (မန္တလေးတိုင်းရုံး)အနေနဲ့လည်း ရေပြင် ရေအောက် ရှာဖွေကယ်ဆယ်ရေး လေ့ကျင့်မှုတွေကို လုပ်ဆောင်နေပါတယ်။

မန္တလေးမြို့၊ အမရပူရမြို့နယ်၊ တောင်သမာန်အင်းအနီး ရောင်းချနေတဲ့ စာအုပ်ဆိုင်ကို နိုဝင်ဘာ ၁၇ ရက်  ဒီမနက် ၁၁ နာရီလောက်က စစ်ကောင်စီတပ်သားတွေ လက်နက်နဲ့ လာရောက် ခြိမ်းခြောက် လူစုခွဲခဲ့တယ်လို့  သိရပါတယ်။

စာအုပ်အမျိုးမျိုးကို တစ်ပိဿာ ၂၀၀၀ ကျပ်နဲ့ ရောင်းချနေတာဖြစ်ပြီး စစ်ကောင်စီတပ်သားတွေဟာ အရပ်ဝတ်တွေနဲ့လာကာ သေနတ်ပြ လူစုခွဲခိုင်းတာဖြစ်တယ်လို့ မျက်မြင်တွေ့သူ တစ်ဦးက ဆိုပါတယ်။

“စာအုပ်ရောင်းတာ ကြိုက်တာယူ တစ်ပိဿာ နှစ်ထောင်ဆိုပြီး ရောင်းတာ။ ဒါကို လူတွေက စိတ်ဝင်တစားဝယ်နေတာ။ လူအယောက် သုံးဆယ် လေးလောက် ရှိတာ။ ဒါကို အရပ်ဝတ်နဲ့ သေနတ်တွေနဲ့လာပြီး ဘယ်သူ့ခွင့်ပြုချက်နဲ့ရောင်းတာလည်း ဘာလဲ လာခြိမ်းခြောက်တော့ ဝယ်သူတွေလည်း ပြေးကုန်ကြတယ်။” လို့ မျက်မြင်တွေ့သူ စာပေလောကသား တစ်ဦးက ပြောပါတယ်။

စာအုပ်ရောင်းတာကို နိုဝင်ဘာ ၁၇ ရက်မှ ၁၉ ရက်အထိ ၃ ရက်တိုင်ရောင်းချပေးဖို့ အသိပေးထားပေမဲ့ အခုလို အကြမ်းဖက်စစ်ကောင်စီတပ်သားတွေ လက်နက်နဲ့ လာရောက်ခြိမ်းခြောက်တဲ့အတွက် နောက်ရက်တွေမှာ ရောင်းချသွားမှာမဟုတ်ဘူးလို့ သိရပါတယ်။