မန္တလေးတိုင်း၊ သပိတ်ကျင်းမြို့နယ်အတွင်းက စစ်ကောင်စီလက်အောက်ခံ ဝန်ထမ်းတွေနဲ့ ဒလန်သတင်းပေးတွေ အချိန်မီ ရပ်တန့်ကြဖို့နဲ့ လက်ရှိ တာဝန်ထမ်းဆောင်နေတဲ့ ရာထူးကနေ နုတ်ထွက်ကြဖို့ TBK တောဆင်ရိုင်း ပြောက်ကျားတပ်ဖွဲ့က မတ် ၁ ရက်နေ့မှာ သတိပေးချက် ထုတ်ပြန်ထားပါတယ်။
စစ်ကောင်စီ လက်အောက်ခံ ရပ်ကျေးအုပ်ချုပ်ရေးမှူးတွေ၊ Non CDM ဆရာ ဆရာမတွေ၊လျှပ်စစ်ဝန်ထမ်းတွေ၊ လျှပ်စစ်မီတာကြေး လိုက်လံကောက်ပေးနေသူတွေ၊ ဒလန်သတင်းပေးတွေ ဌာနဆိုင်ရာဝန်ထမ်းတွေထံ လိုင်းကြေးပေး ပြုလုပ်နေတဲ့ လောင်းကစားဝိုင်းတွေ အခုလို သတိပေးချက် ထုတ်ပြန်လိုက်တာပါ။
စစ်ကောင်စီ အာဏာသိမ်းပြီးနောက်ပိုင်း သပိတ်ကျင်းမြို့နယ်အတွင်း တရားဥပဒေစိုးမိုးမှုနဲ့ လုံခြုံမှု မရှိတော့ဘဲ ကျေးရွာတချို့မှာ နယ်ထိန်းတွေ၊ ရဲတွေက ဆက်ကြေးယူ လောင်းကစားဝိုင်းတွေ ခွင့်ပြုထားကြသလို ချဲဒိုင်၊ နှစ်လုံးထီဒိုင် လောင်းကစားတွေကအစ ဆက်ကြေးကောက်ယူနေကြပြီး လူငယ်တွေအနေနဲ့ မူးယစ်ဆေးဝါးသုံးစွဲတာ၊ ခိုးဆိုး လုယက်တာတွေ များပြားလာနေပါတယ်။
သပိတ်ကျင်းနယ်ခံတဦးက "လက်ရှိမြင်တွေ့နေရတာကတော့ လူငယ်တွေ မူးယစ်ဆေးဝါး လုပ်နေတာတွေက အစပေါ့၊ စစ်ကောင်စီအုပ်ချုပ်မှ မူးယစ်ဆေးဝါးတွေနဲ့ ကျနော်တို့မြို့နယ်ထဲမှာ တော်တော်လေး ပေါ်ပေါ်ထင်ထင် လုပ်လာကြတာကို မြင်တွေ့ရတာပေါ့။ လောင်းကစားဝိုင်းတွေဆိုလည်း နေရာတိုင်းလိုလို ရွာတိုင်းလိုလို တော်တော်များများ ဒါတွေချည်းပဲ လုပ်ကိုင်နေကြတာ။ အဲ့ဒါတွေနဲ့ပတ်သက်ပြီး ဘာတွေဖြစ်လာလဲဆိုတော့ ခိုးဆိုးလုနှိုက်တွေကလည်း ပေါလာတယ်၊ ဆိုင်ကယ်ပျောက်တာတွေက အစ၊ ပျောက်တာတွေ အတော်များလာတာပေါ့" လို့ ပြောပါတယ်။
သတိပေးချက်အပေါ် လိုက်နာမှုမရှိဘဲ ဆက်လက် တာဝန်ထမ်းဆောင်နေကြပါက အသက်အာမခံမှု လုံးဝပေးမှာ မဟုတ်ဘူးလို့ TBK တောဆင်ရိုင်းပြောက်ကျားတပ်ဖွဲ့က သတိပေးထားပါတယ်။
စစ်ကောင်စီလက်အောက်ခံ အုပ်ချုပ်ရေးမှူးတွေကလည်း မီတာကြေးကောက်ခံတာတွေ၊ မီတာကြေး မဆောင်ပါက ရွာလုံးကျွတ် လျှပ်စစ်မီးဖြတ်တောက်တာတွေ၊ ရွှေလုပ်ငန်း လုပ်ကိုင်ကြတဲ့ဒေသ ဖြစ်တဲ့အလျောက် ရွှေလုပ်ငန်းရှင်တွေထံကနေ အင်းအလိုက် ဆက်ကြေးကောက်ယူတာ၊ လုပ်ကိုင်ခွင့်ပြုတာတွေ ရှိနေတယ်လို့ သိရပါတယ်။
ပြည်သူတွေအနေနဲ့လည်း စစ်ကောင်စီ ဂိတ်စခန်း၊ ယာဉ်တန်းတွေနဲ့ နီးနီးကပ်ကပ် မနေကြဖို့ TBK တောဆင်ရိုင်းပြောက်ကျားတပ်ဖွဲ့က အသိပေးချက် ထုတ်ပြန်ထားပါတယ်။
ပြောက်ကျားတပ်ဖွဲ့ရဲ့ အခုလို ထုတ်ပြန်ချက်အပေါ် အမြန်ဆုံး အကောင်အထည်ဖော် အရေးယူပေးစေချင်တယ်လို့ သပိတ်ကျင်း နယ်ခံတွေက ပြောပါတယ်။
သပိတ်ကျင်း နယ်ခံတဦးက "တောဆင်ရိုင်းက သတိပေးစာ ထုတ်ထားတဲ့ အတိုင်းအတာပေါ်မှာတော့ အားလည်းအားရတယ်၊ ကျေလည်းကျေနပ်တယ်၊ ဝမ်းလည်းသာတယ်၊ ဂုဏ်လည်းယူတယ်ပေါ့ဗျာ၊ မြန်မြန်လေး အကောင်အထည် ဖော်စေချင်တာပေါ့။" လို့ ပြောပါတယ်။
