ဧရာဝတီတိုင်း၊ ပုသိမ်ခရိုင်၊ သာပေါင်းမြို့နယ်မှာ ဧပြီလအတွင်း တောဆင်ရိုင်း ဖျက်ဆီးမှုကြောင့် နေအိမ်တွေ ပျက်စီးပြီး အမျိုးသားတဦး တောဆင်းရိုင်းနင်းခံရလို့ သေဆုံးခဲ့တယ်လို့ သစ်တောဌာနနဲ့ နီးစပ်သူတွေထံက သိရပါတယ်။
သာပေါင်းမြို့နယ်၊ ကွင်းကောက်ကျေးရွာအုပ်စု၊ ကွမ်းခြံကျေးရွာနဲ့ ရွှေဇံအိုးကျေးရွာ အုပ်စု၊ ကြက်ပေါင်စမ်းကျေးရွာမှာ တောဆင်ရိုင်း ဝင်ရောက်ဖျက်ဆီးခဲ့တဲ့အတွက် လူနေအိမ် အဆောက်အအုံတွေ ပျက်စီးခဲ့သွားပါတယ်။
ဒါ့အပြင် လှေကြီးတက်ကျေးရွာအုပ်စု၊ တပ်ကုန်းကျေးရွာမှာ ဧပြီ ၁ ရက်က ရွာသား ဦးကြည်လွင်ဟာ ရှောက်ချောင်း(ဒေသအခေါ်)အတွင်း ရေသွားချိုးချိန်မှာ တောဆင်ရိုင်းတွေနဲ့ တွေ့ပြီး လိုက်လံ နင်းချေ သတ်ဖြတ်ခံခဲ့ရတာပါ။
သစ်တောဌာနနဲ့ နီးစပ်သူ အမျိုးသားတဦးက “သာပေါင်းမြို့နယ်ထဲမှာပဲ ဧပြီလအတွင်း တောဆင်ရိုင်းက ကျေးရွာတွေထဲ ဝင်ရောက် ဖျက်ဆီးတာတွေ သုံးကြိမ်ရှိပြီ။ နှစ်ကြိမ်က လူနေအိမ်ကို ဖျက်ဆီးသွားတယ်။ တစ်ကြိမ်က တောဆင်းရိုင်းနင်းလို့ အမျိုးသားတစ်ဦး သေဆုံးခဲ့ပါတယ်။ ဒီတစ်ပတ်အတွင်းမှာကို ဖြစ်သွားတာပါ”လို့ ပြောပါတယ်။
သာပေါင်းမြို့နယ် ကွမ်းခြံကုန်းကျေးရွာမှာ ဧပြီ ၂ ရက်က တောဆင်ရိုင်း ဝင်ရောက်ဖျက်ဆီးခဲ့လို့ ဦးသန်းကြည်ရဲ့နေအိမ် ပျက်စီးခဲ့ပြီး ဧပြီ ၆ ရက်ကလည်း ကြက်ပေါင်စမ်းကျေးရွာမှာ တောဆင်ရိုင်း ဝင်ရောက်ဖျက်ဆီးလို့ ဦးမြင့်ထွေးရဲ့ နေအိမ်တစ်လုံး ပျက်စီးခဲ့ပါတယ်။
ရခိုင်ပြည်နယ်၊ဘူးသီးတောင်မြိုနယ် ကွန်တိုင်ကျေးရွာအုပ်စု ဝါချိလ့်မြောက်ကျေးရွာမှာ ဒီဇင်ဘာ ၃၁ ရက်နေ့ ည ၁၁ နာရီ ကျော်လောက် တောဆင်းရိုင်းနင်းခံရတာကြောင့် အသက် ၁၈ အရွယ် လူငယ်တဦးသေဆုံးသွားတယ်လို့ ဒေသခံတွေက ပြောပါတယ်။
စံညှင်းဝေရွာသားတဦးက "သူက ကွန်တိုင်ကျေးရွာအုပ်စု ဝါချိလ်မြာက်ရွာက စံညှင်းဝေ ကျေးရွာမှာ လယ်အငှား လာလုပ်နေတဲ့ လူငယ်ပါ။ လယ်တဲကနေ အိမ်ကိုလာတဲ့အချိန် ဆင်ရိုင်းနဲ့တွေ့ပြီး နင်းသတ်ခံလိုက်ရတာ" လို့ ပြောပါတယ်။
မာမတ်ဇာယက်တူဆောင်း (အသက် ၁၈ နှစ်) ဟာ ကွန်တိုင်ကျေးရွာအုပ်စု၊ ဝါချိလ့်မြောက်ကျေးရွာကနေ စံညှင်းဝေကျေးရွာမှာ လယ်အငှား လာရောက် လုပ်နေသူဖြစ်ပြီး လယ်တဲမှ ရွာအပြန်လမ်းမှာ ဆင်နင်းခံခဲ့ရတာပါ။
ဒီဇင်ဘာ ၃၀ ရက်ကလည်း ဘူးသီးတောင်မြို့နယ်၊ ကျောက်တော်ကြပ်ပြင်ချေကျေးရွာမှ အသက် ၅၀ ကျော် လူကြီးတယောက် တောဆင်ရိုင်း အလိုက်ခံရပြီး ဒဏ်ရာ အပြင်းအထန်ရခဲ့တယ်လို့ ဒေသခံတွေက ပြောပါတယ်။
ဘူးသီးတောင်မြို့နယေ နှန်းရာကုန်းကျေးရွာအုပ်စု၊ ကျောက်တော်ကြပ်ပြင်ချေကျေးရွာအုပ်စု၊ အုတ်ထောင်ကျေးရွာအုပ်စုနဲ့ စံညှင်းဝေကျေးရွာအုပ်စုတွေမှာ တောဆင်ရိုင်း အန္တရာယ် မကြာခဏ ကြုံတွေ့နေရတယ်လို့ ဒေသခံတွေက ပြောပါတယ်။
