နွေဦးတော်လှန်ရေး အောင်မြင်ဖို့ ငွေအင်အား အဓိကကူညီပံ့ပိုးပေးနေတဲ့ Click2donate အဖွဲ့ဟာ သူတို့ရဲ့ ယူကျုချန်နယ်မှာ ဗွီဒီယိုလာရောက်တင်ပေးဖို့ တော်လှန်ရေးအင်အားစုတွေကို ဇန်နဝါရီ ၁၉ ရက်နေ့မှာ အကြံပြု ဖိတ်ခေါ်လိုက်ပါတယ်။
တော်လှန်ရေးအဖွဲ့တွေအနေနဲ့ ယူကျုချန်နယ်တွေထောင်ပြီး အစကနေ ဗွီဒီယိုတွေ တင်နေမယ့်အစား Subscribe အများကြီးရှိပြီးသား Click2donate ချန်နယ်မှာ ဗွီဒီယိုတွေ လာတင်ဖို့နဲ့ ဗွီဒီယိုမှာတော့ ဖန်တီးထားတဲ့ အဖွဲ့နာမည်နဲ့ ဖန်တီးသူနာမည် ထည့်ပေးမှာဖြစ်ပြီး အဲဒီဗွီဒီယိုက ရသမျှ ဝင်ငွေအကုန်လုံးကို ပြန်တွက်ပြီး ပိုက်ဆံ ပြန်ပို့ပေးမှာဖြစ်တယ်လို့ သူတို့ရဲ့ လူမှုကွန်ရက်စာမျက်နှာကနေ ရေးသားဖော်ပြထားပါတယ်။
Click2Donate အဖွဲ့ရဲ့ Weclick Channel ဟာ Subscribers ပေါင်း 346 K အထိ ရရှိထားပြီး တခြား Raungni, WECLICK4MM ချန်နယ်တွေလည်း ရှိသေးတဲ့အပြင် App တွေအနေနဲ့ လက်ဆောင် (Lattsaung)၊ သပြေခက်၊ အောင်ပွဲ (Aungpwel) နဲ့ စီတူးဒီ (C2D) အက်ပလီကေးရှင်းတွေလည်း ထွက်ရှိထားပါသေးတယ်။
Click2donate ရဲ့ ၂၀၂၂ ခုနှစ် ရငွေစာရင်းတွေအရ စင်ကာပူဒေါ်လာ ၂ ဒသမ ၁၁၉ မီလီယံ၊ မြန်မာကျပ်ငွေနဲ့ သိန်းပေါင်း ၄၀,၀၀၀ ကျော်နဲ့ အမေရိကန်ဒေါ်လာ ၅၀,၀၀၀ ကျော် ရရှိခဲ့ပါတယ်။
ရရှိတဲ့ဝင်ငွေတွေကို တော်လှန်ရေးအဖွဲ့ပေါင်း ရာနဲ့ချီ ထောက်ပံ့ပေးထားပြီးဖြစ်ကာ စစ်ကောင်စီကတော့ အခုလိုမျိုး ငွေအင်အားအများအပြား ထောက်ပံ့ပေးနေတဲ့ အဖွဲ့တွေရဲ့ အက်ပလီကေးရှင်းတွေကို သုံးစွဲတာမပြုလုပ်ဖို့နဲ့ သုံးစွဲမယ်ဆိုရင် အရေးယူမယ်လို့လည်း ထုတ်ပြန်ထားပါတယ်။
စစ်ကောင်စီက နိုဝင်ဘာ ၂၅ ရက် ဒီနေ့မနက် ၁၀ နာရီမှာ ပြုလုပ်တဲ့ အမျိုးသမီးများအပေါ် အကြမ်းဖက်မှုပပျောက်ရေး ၁၆ ရက်တာလှုပ်ရှားမှု အထိမ်းအမှတ် အခမ်းအနားကို တော်လှန်ရေးအဖွဲ့တခုက အွန်လိုင်းကနေ ဝင်ရောက်ဆန္ဒပြနိုင်ခဲ့ပါတယ်။
ဒီအခမ်းအနားကို လူကိုယ်တိုင်နဲ့ အွန်လိုင်းကတက်ရောက်တဲ့ ပုံစံနှစ်မျိုး ပေါင်းလုပ်ထားတဲ့ Hybrid ပုံစံ အခမ်းအနားဖြစ်ပြီး တော်လှန်ရေးရဲဘော်တွေက စစ်ကောင်စီရဲ့ Zoom အစည်းအဝေးထဲကို ဝင်ရောက်ဆန္ဒပြခဲ့တာပါ။
ဒီအခမ်းအနားဟာ စစ်ကောင်စီလက်အောက်ခံ လူကယ်ပြန်ဝန်ကြီး ဒေါ်သက်သက်ခိုင် တက်ရောက်ပြီး မိန့်ခွန်းပြောတဲ့ပွဲလည်း ဖြစ်ပါတယ်။
အခမ်းအနားအတွင်းမှာ “လုံးဝအုပ်ချုပ်ခွင့်မရစေရ”၊ “မုဒိမ်းစစ်တပ်အမြစ်ဖြတ်” စာသားနှစ်ခုပါတဲ့ Zoom နောက်ခံပုံတွေပြောင်းကာ ပြသခဲ့တာဖြစ်ပါတယ်။
တော်လှန်ရေးရဲဘော်တွေအနေနဲ့ စစ်ကောင်စီရဲ့ လူကယ်ပြန်ဌာနထဲက တော်လှန်ရေးဘက်တော်သားတွေရဲ့ ကူညီမှုနဲ့ အခမ်းအနားအတွင်းကို ဝင်ရောက်နိုင်ခဲ့တာဖြစ်ပြီး ၅ မိနစ်ကြာ ဆန္ဒပြနိုင်ခဲ့ပါတယ်။
စစ်ကောင်စီဆန့်ကျင်ရေး ဗီဒီယိုဖွင့်တာ၊ အသံနဲ့ ဆန္ဒထုတ်ဖော်တာတွေ ပြုလုပ်ဖို့ ရည်ရွယ်ထားပေမဲ့ Zoom Setting မှာ အဆိုပါလုပ်ဆောင်ချက်တွေကို ပိတ်ထားတဲ့အတွက် စစ်ကောင်စီဆန့်ကျင်ရေး နောက်ခံပုံပြောင်းပြီးပဲ ဆန္ဒထုတ်ဖော်နိုင်ခဲ့ပါတယ်။
