မန်ယူအသင်းမှာ ကျောနံပါတ် ၂၇ ဝတ်ဆင်ဖို့အတွက် နောက်ခံလူ တဲလက်စ်ဆီ ခွင့်တောင်းခဲ့ကြောင်း တိုက်စစ်မှူး ဗက်ဟော့စ်က ပြောပါတယ်။
နောက်ခံလူ တဲလက်စ်ဟာ ဆီဗီလာအသင်းဆီကို အငှားထွက်ကစားနေတာဖြစ်ပြီး မန်ယူမှာ ကစားစဉ်က ကျောနံပါတ် ၂၇ ၀တ်ဆင်ကစားခဲ့သူပါ။
ယူနိုက်တက်အသင်းဆီ ပြောင်းရွှေ့ခဲ့ပြီးနောက် ကျောနံပါတ်ယူဖို့ စဉ်းစားရာမှာ ၂၇ ကို ဝတ်ဆင်ဖို့ ဆုံးဖြတ်ခဲ့ကြောင်း ၂ နဲ့ ၇ ပေါင်းရင် ၉ ရတာကြောင့် တိုက်စစ်မှူးနံပါတ်ဖြစ်လာတယ်လို့ ဗက်ဟော့စ်က ပြောပါတယ်။
“ပထမဆုံးအနေနဲ့ တဲလက်စ်ကို အရင်ခွင့်တောင်းပြီး အဆင်ပြေမှ အသင်းဆီကို ပြောခဲ့တာပါ။ ဝတ်ဆင်ခွင့်ပေးတဲ့ တဲလက်စ်နဲ့ အသင်းကို ကျေးဇူးတင်ပါတယ်။ ကျောနံပါတ် ၂၇ က ကျနော့်အတွက် ကောင်းမွန်တဲ့ခံစားမှု ရှိတာကြောင့်လည်း ဖြစ်တယ်”လို့ ဗက်ဟော့စ်က ပြောပါတယ်။
အသက် ၃၀ နှစ်ရှိ ဟော်လန်တိုက်စစ်မှူးကို ရာသီကုန်ဆုံးချိန်အထိပဲ စာချုပ်ချုပ်ဆိုခဲ့တာဖြစ်ပြီး အပြီးသတ်ခေါ်ယူခွင့် မပါဝင်ဘူးလို့ သိရပါတယ်။
ကမ္ဘာ့ဖလားပြိုင်ပွဲဝင် ဘရာဇီးအသင်းရဲ့ တိုက်စစ်မှူး ဂျေဆူနဲ့ နောက်ခံလူ တဲလက်စ်တို့ဟာ ဒဏ်ရာအခြေအနေတွေကြောင့် အသင်းရဲ့ လက်ကျန်ပွဲစဉ်အားလုံးကို လွဲချော်တော့မှာပါ။
အဲဒီကစားသမားနှစ်ဦးဟာ ကင်မရွန်းကို ၁ ဂိုး ဂိုးမရှိနဲ့ရှုံးနိမ့်ခဲ့တဲ့ အုပ်စုနောက်ဆုံးပွဲစဉ်မှာ ဒူးဒဏ်ရာအသီးသီးရရှိခဲ့ကြတာပါ။
တနင်္လာနေ့က ဒဏ်ရာအခြေအနေကို စစ်ဆေးခဲ့ပြီးနောက် လက်ကျန်ပွဲစဉ်တွေအမီ ပြန်လည်ကောင်းမွန်လာဖို့ မဖြစ်နိုင်တော့ကြောင်း ဘရာဇီးအက်ဖ်အေက သတင်းထုတ်ပြန်ခဲ့ပါတယ်။
ဘရာဇီးအသင်းမှာ အဓိက တိုက်စစ်မှူး နေမာလည်း ဒဏ်ရာရနေသလို ဘယ်ညာအစွန်တွေက နောက်ခံလူတွေဖြစ်တဲ့ ဒယ်နီလိုနဲ့ ဆန်ဒရိုတို့ဟာလည်း ဒဏ်ရာအသီးသီးရရှိနေပါတယ်။
