ရှမ်းပြည်နယ် မြောက်ပိုင်း၊ တရုတ် - မြန်မာ နယ်စပ်၊ မူဆယ်နဲ့ ၁၀၅ မိုင်ကြားမှာ နိုဝင်ဘာ ၁၁ ရက်နေ့ မနက်ပိုင်းက တွဲကားမှောက်ပြီး ကားပေါ်ပါလာတဲ့ သံချောင်းတွေပြန်ပိကာ ၁ ဦး သေဆုံး၊ ၁ ဦး ဒဏ်ရာရတယ်လို့ ပရဟိတအသင်းက ပြောပါတယ်။
"စပါယ်ယာတော့မသေဘူး။ ဒရိုင်ဘာသေသွားတယ်" လို့ အကူအညီပေးခဲ့သူတဦးက ပြောပါတယ်။
သေဆုံးသူမှာ နှဖူး၊ ဦးခေါင်းနဲ့ ဝမ်းဗိုက်၊ ခြေထောက်နဲ့ လက်တွေမှာ ပြင်းပြင်းထန်ထန် ဒဏ်ရာရပြီး သေဆုံးသွားတာလို့ ဆိုပါတယ်။
ဒဏ်ရာရာသူနဲ့ သေဆုံးသူကိုတော့ မူဆယ်နှလုံးလှ ပရဟိတအသင်းက မူဆယ်ဆေးရုံကို ကူညီ ပို့ဆောင်ခဲ့တယ်လို့ သိရပါတယ်။
"ဘယ်က ဘယ်သူမှန်းတော့ မသိရသေးဘူး။ သေဆုံးသွားသူကိုတော့ ဒီနေ့ သင်္ဂြိုဟ်မှာ" လို့ နှလုံးလှပရဟိတအသင်း တာဝန်ရှိသူတဦးက ပြောပါတယ်။
ကုန်တင်ယာဉ်မောင်း တဦးက "သံပိုက်တွေတင်တဲ့ကားဆိုရင် ဝမ်တိန်က ပဲ ထွက်လာမှာလေ။ ... Speed များလို့ထင်တယ်။ weight များလို့လဲရင် အသာလေးပဲ လဲမှာလေ" လို့ ရှင်းပြပါတယ်။
ယာဉ်မောင်းတွေအနေနဲ့ အမြဲ သတိ နဲ့ မောင်းနှင်စေချင်တယ်လို့ ဆိုပါတယ်။
သံထည်ပစ္စည်းတွေက တရုတ်ဘက် ဝမ်တိန်ဘက်ကနေ မြန်မာဘက်ကို တင်သွင်းနေတာလည်း ဖြစ်ပါတယ်။
ကချင်ပြည်နယ်၊ ဝိုင်းမော်မြို့နယ်၊ တန်ဘောင်ကျေးရွာမှာ ဇွန်လ ၁၀ ရက်ညနေပိုင်းက တရုတ်တစ်သျှူးငှက်ပျောတင်တွဲကားတစ်စီး တိမ်းမှောက်သွားပါတယ်။
ညနေ ၅ နာရီကျော် ၆ နာရီလောက်မှာ တန်ဘောင်ကျေးရွာအ၀င်လမ်းအကွေ့ ချောက်မှာ သူ့ဘာသာသူ မှောက်သွားတာဖြစ်တယ်လို့ မျက်မြင် ဒေသခံတွေက ပြောပါတယ်။ ကားမောင်းသမားက အရက်သောက်ထားပုံရတယ်လို့လည်းဆိုပါတယ်။
“ကျနော်ပြန်လာတာ ည ၈ နာရီကျော်လောက်ထိ ကားကလမ်းဘေးမှာ ပက်လက်လန် နေတော့ လန့်သွားတာ။ ပြီးမှ နောက်ကားတစ်စီးကနေ ငှက်ပျောဖာတွေ ပြန်သယ်နေကြတာ တွေ့တယ်။ ဘေးနားမှာတော့ ကားသမားထင်တယ် ခြေထောက်တွေမှာပက်တီးတွေနဲ့ ရဲတွေနဲ့ စကားပြောနေခဲ့တယ်”လို့ ဒေသခံလူငယ်တစ်ဦးက ပြောပါတယ်။
ပြီးကတဲ့မေလ ဒုတိယပတ်ကလည်း ဝိုင်းမော် ဂေါ်ဆက်ယန်ရွာမှာ ငှက်ပျောတွဲကားတစ်စီး လမ်းချော်တိမ်းမှောက်ခဲ့သေးပါတယ်။
ဝိုင်းမော်မြို့နယ်ရှိ တရုတ်-မြန်မာနယ်စပ် ကန်ပိုက်တီဂိတ်ကို ကိုဗစ်ကြောင့် ပိတ်ထားပေမဲ့ ငှက်ပျောကားတွေ အသွားအလာမပျက်ဘဲ ယာဉ်မောင်းနဲ့ ကားလဲပြီး တရုတ်ပြည်ဘက်သို့ ကုန်သွယ်သယ်ယူနေကြဆဲဖြစ်တယ်လို့ ကန်ပိုက်တီမြို့ခံတွေထံကနေသိရပါတယ်။
တရုတ်စီးပွားရေးသမားတွေက ကချင်ပြည်နယ် ဝိုင်းမော်မြို့နယ်မှာ တရုတ်တစ်သျှူးငှက်ပျောကို ဧကသိန်းနဲ့ချီ စိုက်ပျိုးထားတာဖြစ်ပါတယ်။
