တနင်္သာရီတိုင်း ထားဝယ်မြို့နယ် အရှေ့တောဒေသရှိ ထားဝယ်-မေတ္တာလမ်းပိုင်းမှာ ထီးခီးနယ်စပ်မှ ထားဝယ်ကို ထွက်ခွာလာတဲ့ စစ်ကား ၇ စီးပါ စစ်ကောင်စီယာဉ်တန်းကို ပြည်သူ့ကာကွယ်ရေးမဟာမိတ်ပူးပေါင်းတပ်တွေက နှစ်ကြိမ် ကြားဖြတ်တိုက်ခိုက်ခဲ့ပါတယ်။

နိုဝင်ဘာ ၁၁ ရက်နေ့ မနက် ၉ နာရီခွဲလောက်က ထားဝယ်-မေတ္တာလမ်းပိုင်း ၂၅ မိုင်တိုင်အလွန်မှာ ယာဉ်တန်းမှာ အင်အား ၇၀ လောက်ပါ စစ်ကြောင်းကို ထားဝယ်အရှေ့တော ပြည်သူ့ကာကွယ်ရေးအင်အားစု DEF-PDF (ပကဖ-ထားဝယ်)၊ သံမဏိပြောက်ကျားတပ်ဖွဲ့ (ပကဖ-ထားဝယ်)နဲ့ Kawthoolei Army ဆာကဆော တပ်မဟာ တပ်ခွဲ (၃)တို့ပူးပေါင်းပြီး ကြားဖြတ်တိုက်ခိုက်ခဲ့တယ်လို့ DEF-PDF က ဒီနေ့ ထုတ်ပြန်ပါတယ်။

မိနစ် ၃၀ လောက် အပြန်အလှန်ပစ်ခတ်တိုက်ပွဲဖြစ်ပွားခဲ့ပြီး စစ်ကောင်စီဘက်က ကျောက်မဲတောင်ရွာအနီး လမ်းကင်းယူထားတဲ့အဖွဲ့က စစ်ကူလာပြီး ဝိုင်းဝန်းပိတ်ဆို့ တိုက်ခိုက်တာကြောင့် ပြန်လည်ဆုတ်ခွာခဲ့ရတယ်လို့ DEF-PDF တာဝန်ရှိသူက ဆိုပါတယ်။

"အဲနေ့က အတည်ပြုလို့ရတာ ၃ လောင်းထက် မနည်းဘူး။ ၀ကုန်းရွာ အနောက်ပိုင်းအိမ်တွေမှာ ဆေးဘူးကြီးတွေ ချိတ်ထားတာမြင်ရသလောက်ဆို ဒဏ်ရရသူလည်း များပါတယ်။ အနည်းဆုံး ၅ ဦးလောက်ရှိမယ်" 

အဲဒီညမှာ စစ်ကောင်စီက ဝကုန်းကျေးရွာမှာ စခန်းချနားနေခဲ့ပြီး နောက်ရက်မနက်ပိုင်းမှာ ထားဝယ်ကို ဆက်လက်ထွက်ခွာခဲ့ပါတယ်။

စစ်ကောင်စီစစ်ကြောင်း ဘဲ့မဲ့တက်တောင်အနီးရောက်ရှိချိန် မနက် ၉ နာရီခွဲခန့်မှာ  ပြည်သူ့ကာကွယ်ရေးပူးပေါင်းတပ်ဖွဲ့က စောင့်ကြိုတိုက်ခိုက်ရင် သင်္ကန်းတုံးဘက်မှာ လမ်းကင်း လာယူတဲ့ စစ်ကောင်စီတပ်ဖွဲ့ရှိနေလို့ နှစ်ဖက်ညှပ်တိုက်ခိုက်ခံ ရနိုင်တာမို့ အနောက်မှ လိုက်လံ ပစ်ခတ်တိုက်ခိုက်ခဲ့တယ်လို့ DEF-PDF တာဝန်ရှိသူက ရှင်းပြပါတယ်။

အဆိုပါတိုက်ခိုက်မှုကို (T1-PDF + ထားဝယ်ပကဖ) ဥဩစစ်ကြောင်းနဲ့ ကော်သူးလေအာမီ ဆာကဆောတပ်မဟာတပ်ခွဲ(၃) ပူးပေါင်းတပ်ဖွဲ့တို့က တိုက်ခိုက်ခဲ့တာဖြစ်ပြီး ၁၀ မိနစ်ခန့် အပြန်အလှန်ပစ်ခတ်တိုက်ခိုက်ခဲ့တယ်လို့ DEF-PDF ထုတ်ပြန်ချက်အရ သိရပါတယ်။

အဆိုပါတိုက်ပွဲတွေမှာ စစ်ကောင်စီဘက်က ၅ ယောက်ထက် မနည်းသေဆုံးနိုင်ပြီး အများအပြား ထိခိုက်ဒဏ်ရာ ရခဲ့ကာ ပြည်သူ့ကာကွယ်ရေးတပ်ဖွဲ့တွေမှာတော့ ထိခိုက်မှုတစုံတရာ မရှိဘဲ အောင်မြင်စွာဆုတ်ခွာနိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ထားဝယ်မှ ထီးခီးကို ရိက္ခာပို့တဲ့ စစ်ကောင်စီယာဉ်တန်းမှာ အခုနောက်ပိုင်း ခြေကျင် ဝင်ထွက် သွားလာလျက်ရှိပြီး ဝကုန်းရွာနဲ့ သင်္ကန်းတုံးရွာဝန်းကျင်တဝိုက်မှာ ပြည်သူ့ကာကွယ်ရေးတပ်ဖွဲ့ တွေက မကြာခဏကြားဖြတ်တိုက်ခိုက်လေ့ရှိတာကြောင့် ယာဉ်တန်းဖြတ်သန်းချိန်တွေမှာ ဒေသခံပြည်သူတွေ ကြိုတင်တိမ်းရှောင်နေရလေ့ရှိပါတယ်။

တနင်္သာရီတိုင်းဒေသကြီး ထားဝယ်မြို့နယ် အရှေ့တောဒေသ ထားဝယ်-မေတ္တာလမ်းပိုင်းမှာ စစ်ကောင်စီစစ်ကြောင်းတွေကို ပြည်သူ့ကာကွယ်ရေးတပ်ဖွဲ့တွေက ၃ ရက်ဆက်တိုက် ကြားဖြတ်တိုက်ခိုက်ခဲ့တာကြောင့် စစ်ကောင်စီဘက်က ဗိုလ်ကြီးအဆင့်အပါအဝင် ၃၀ ကျော် သေဆုံးခဲ့တယ်လို့ ပြည်သူ့ကာကွယ်ရေးအဖွဲ့တွေက ထုတ်ပြန်ထားပါတယ်။

စက်တင်ဘာ ၁ ရက်နေ့က ထားဝယ်မှ မေတ္တာဘက်ကို ခြေကျင်စစ်ကြောင်းထိုးလာတဲ့ စစ်ကောင်စီတပ်ဖွဲ့ကို သရက်ငုတ်ရွာအနီးမှာ က္လားသစ္ဏတ်အဖွဲ့နဲ့ Dawei Guerilla Revolutionary Force (DGRF) အဖွဲ့တို့ ပူးပေါင်းတိုက်ခိုက်ခဲ့ရာမှာ ဗိုလ်ကြီးအဆင့်အပါအဝင် ၈ ဦးသေဆုံးခဲ့ပြီး ၅ ဦးထက်မနည်း ထိခိုက်ဒဏ်ရာရခဲ့တယ်လို့ က္လားသစ္ဏတ်ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။

စက်တင်ဘာ ၂ ရက်နေ့မှာ ထားဝယ်ဘက်ကတက်လာတဲ့ ယာဉ်တန်းနဲ့ ကျောက်မဲတောင်ဘက်က ဆင်းလာတဲ့ စစ်ကောင်စီယာဉ်တန်းတို့ကို ကော်သူလေးအာမီ (Kaw Thoo Lei army) နဲ့ Eastern Defense Force EDF(Local)၊ PDF ပူးပေါင်းတပ်တို့က သင်္ကန်းတုံးရွာနဲ့ ဝကုန်းရွာတို့မှာ တိုက်ခိုက်ရာမှ ထိတွေ့တိုက်ပွဲဖြစ်ပွားခဲ့ပြီး စစ်ကောင်စီတပ်သား ၁၀ ဦးထက်မနည်း သေဆုံးပြီး ထိခိုက်ဒဏ်ရာရသူ အများအပြားရှိတယ်လို့ EDF က ထုတ်ပြန်ပါတယ်။

အလားတူ စက်တင်ဘာ ၂ ရက်နေ့မှ မနက် ၁၀ နာရီခွဲလောက်မှာလည်း သင်္ကန်းတုံးရွာဘက်ကနေ လက်နက်ကြီးလက်နက်ငယ်တွေနဲ့ ပစ်ခတ်ကာ၀င်ရောက်လာတဲ့ အင်အား ၁၀၀ ၀န်းကျင်လောက်ပါ စစ်ကောင်စီစစ်ကြောင်းကို Kawthoolei Army၊ ထား၀ယ်အရှေ့တော ပြည်သူ့ကာကွယ်ရေးအင်အားစု (ထားဝယ်-ပ.က.ဖ)၊ ထား၀ယ်ခရိုင်ပြည်သူ့ကာကွယ်ရေးတပ်ဦး (DDPDF) နဲ့ သံမဏိပြောက်ကျားတပ်ဖွဲ့(နဘယံ) ပူးပေါင်းတပ်ဖွဲ့မှ ကြားဖြတ်တိုက်ခဲ့လို့ စစ်ကောင်စီမှ ၄ ဦးသေဆုံးပြီး ၇ ဦးလောက် ထိခိုက်ဒဏ်ရာရခဲ့တယ်လို့ ထား၀ယ်အရှေ့တောပြည်သူ့ကာကွယ်ရေးအင်အားစု (ထားဝယ်-ပ.က.ဖ) အဖွဲ့က ထုတ်ပြန်ထားပါတယ်။

“ဒီနေ့တော့ တိုက်ပွဲ အတော်ပြင်းထန်တယ်။ သင်္ကန်းတုံးရွာနဲ့ ကျောက်မဲတောင်အကြား တောက်လျှောက် တစ်နေကုန်ဖြစ်နေတာ” လို့ ထားဝယ် ပ.က.ဖ တာဝန်ရှိသူတဦးက ပြောပါတယ်။

စက်တင်ဘာ ၃ ရက်နေ့ မနက် ၉း၄၅ မိနစ်လောက်မှာလည်း ပခပ်ရွာအနီး Dawei Defense Team - DDT (ထားဝယ် - ပကဖ)နဲ့ Kaw Thoo Lei Army ပူးပေါင်းတပ်ဖွဲ့က စစ်ကောင်စီ ခြေလျင်စစ်ကြောင်းနဲ့ကားတန်းကို ကြားဖြတ်ပစ်ခတ်တိုက်ခိုက်ခဲ့ရာမှာ စစ်ကောင်စီ ၁၀ ဦးထက်မနည်း သေဆုံးခဲ့ပြီး အများအပြားထိခိုက်ဒဏ်ရာရခဲ့တယ်လို့ DDT တပ်ဖွဲ့က ထုတ်ပြန်ထားပါတယ်။

စစ်ကောင်စီတပ်ဖွဲ့တွေကို ပြည်သူ့ကာကွယ်ရေးအဖွဲ့ ၉ ဖွဲ့ထက်မနည်း ပူးပေါင်းတိုက်ခိုက်ခဲ့တာဖြစ်ပြီး သုံးရက်တာတိုက်ပွဲအတွင်း ပြည်သူ့ကာကွယ်ရေးတပ်ဖွဲ့တွေဘက်က ထိခိုက်ကျဆုံးဒဏ်ရာရသူ မရှိဘဲ ဘေးကင်းစွာ ပြန်လည်ဆုတ်ခွာနိုင်ခဲ့တယ်လို့ ထုတ်ပြန်ချက်တွေအရ သိရပါတယ်။

ထားဝယ်အရှေ့တောဒေသ ထားဝယ်-မေတ္တာ-ထီးခီး လမ်းကြောင်းမှာ စစ်ကောင်စီယာဉ်တန်းတွေကို ပြည်သူ့ကာကွယ်ရေးတပ်ဖွဲ့တွေက မကြာခဏ ကြားဖြတ်တိုက်ခိုက်လေ့ရှိပါတယ်။