ပင်လယ်ထဲနစ်မြုပ်သွားတဲ့ ထိုင်းရေတပ်စစ်သင်္ဘောထဲက ပျောက်ဆုံးနေတဲ့ ရေတပ်သားတွေကို ကယ်ဆယ်ရေးအဖွဲ့တွေက မရပ်မနား လိုက်လံရှာဖွေနေရာမှာ ဒီဇင်ဘာ ၂၀ ရက် မနေ့ညက နောက်ထပ် ၇ ဦးကို တွေ့ရှိဆယ်ယူခဲ့တယ်လို့  Channel 7 ထိုင်းသတင်းမှာ ဖော်ပြပါတယ်။ 

ဒါပေမဲ့ ဆယ်ယူနိုင်ခဲ့တဲ့ သင်္ဘာသား  ၇ ဦးထဲမှာ ၁ ဦးသာ အသက်ရှင်ပြီး ကျန် ၆ ဦးကို အလောင်းအနေနဲ့ဘဲ ပြန်ရတယ်လို့ ဆိုပါတယ်။

အဆိုပါသင်္ဘောသား ၆ ဦးရဲ့ ရုပ်အလောင်းတွေကို ဒီဇင်ဘာ ၂၀ ရက်နဲ့ ၂၁ ရက် မနက်ပိုင်းက ရဟတ်ယာဉ်နဲ့ ကုန်းပေါ် ပြန်ပို့ပြီးနောက် သင်္ဘောသားတွေရဲ့ ရုပ်အလောင်းတွေကို ခွဲစိတ်စစ်ဆေးဖို့နဲ့ အချက်အလက်ဖော်ထုတ်ဖို့ လူနာတင်ယာဉ်နဲ့ ဆေးရုံဆီ ပို့ခဲ့ပါတယ်။

စစ်သင်္ဘာ စတင်နစ်မြုပ်တဲ့ ဒီဇင်ဘာ ၁၈ ရက်ညကနေ မနေ့ည ၉ နာရီအထိ ပင်လယ်ထဲက ရေတပ်သားစုစုပေါင်း ၈၂ ဦးကို တွေ့ရှိပြီး ကျန်တဲ့ ပျောက်ဆုံးနေဆဲ ၂၃ ဦးကိုလည်း ရေတပ်သင်္ဘောကြီး ၄ စီး၊ ရဟတ်ယာဉ် ၂ စီးအပြင် ကယ်ဆယ်ရေးလှေတွေနဲ့ပါ ရာသီဥတု ဆိုးဝါးနေတဲ့ကြားက ၂၄ နာရီ မရပ်မနား အစွမ်းကုန်ရှာဖွေနေတယ်လို့ ဆိုပါတယ်။

ထိုင်းရေတပ်မှ HTMS ဆူခိုထိုင်း စစ်သင်္ဘောဟာ ရေကြောင်းတိုက်ခိုက်ရေးအတွက် စီမံဆောက်လုပ်ထားတာဖြစ်ကြောင်း၊ အမေရိကန်နိုင်ငံမှ လွန်ခဲ့တဲ့နှစ်ပေါင်း ၃၆ နှစ်က ဝယ်ယူခဲ့ပြီး သက်တမ်းအနှစ် ၄၀ ရှိပြီဖြစ်ကာ မကြာသေးခင်ကမှ သင်္ဘောကျင်းကနေ စစ်ဆေးပြုပြင်ခဲ့တာလို့ ထိုင်းရေတပ်ဗိုလ်ချုပ် ချိန်းချိုင်းချူမ်းချိန်းက မနေ့ည သတင်းစာရှင်းပွဲမှာ ပြောပါတယ်။ 

သင်္ဘောပျက်ရတဲ့ အကြောင်းရင်းဟာ လေပြင်းမုန်တိုင်းမိကာ လှိုင်းလုံးကြီးတွေ ရိုက်ခတ်မှုကြောင့် ရေတွေ အဆမတန်ဝင်လာပြီး ရေစုပ်စက် အလျဉ်မမီကြောင်း၊ လျှပ်စစ်ဓာတ်အားပေးတဲ့စက်ပါ ပျက်သွားတဲ့အတွက် လုပ်ငန်းလည်ပတ်မှုရပ်သွားပြီး နစ်မြုပ်သွားခဲ့ရကြောင်း၊ ဒါပေမဲ့ အကြောင်းရင်း အလုံးစုံသိရဖို့ စုံစမ်းရေးကော်မတီတရပ်ဖွဲ့ပြီး ထပ်မံစစ်ဆေးသွားမယ်လို့ ဆိုပါတယ်။ 

အသက်ကယ်အင်္ကျီကိစ္စနဲ့ပတ်သက်ပြီး ရှင်းလင်းရာမှာ အသက်ဘေးမှ ပြန်လွတ်လာသူတွေထဲမှာ အသက်ကယ်အင်္ကျီဝတ်မထားတဲ့သူတွေပါ ပါရှိကြောင်း၊ ရေထဲကျန်ရှိနေတဲ့သူတွေမှာလည်း အသက်ကယ်အင်္ကျီဝတ်ထားသူတွေပါတယ်လို့ ပြောသွားပါတယ်။ 

ဒီပြောကြားချက်ပေါ်မှာ လူတော်တော်များများ ဝေဖန်နေကြပါတယ်။ ပျောက်ဆုံးနေဆဲ ရေတပ်သား တယောက်ရဲ့ မိခင်က လှေစောင်းစပြုချိန် သားဖြစ်သူနဲ့ အဆက်အသွယ်ရကြောင်း၊ သူ့မှာ အသက်ကယ်အင်္ကျီမရှိဘဲ ဘောကွင်းတခုပဲ ရှိတယ်လို့ ဆိုပါတယ်။ သူ့သားဟာ အဲဒီလှေ ပေါ်မှာအိပ် လှေပေါ်မှာစားတဲ့ အမြဲတမ်းဝန်ထမ်းဖြစ်ပြီး ရေကူးလည်း ကျွမ်းကျင်၊ ကိုယ်ခန္ဓာလည်း ကြံ့ခိုင်သူဖြစ်တယ်၊ အသက်ကယ်အင်္ကျီသာရှိရင် ခုထိ ပျောက်ဆုံးနေမှာ မဟုတ်ဘူးလို့ ငိုကြွေးရင်း သတင်းထောက်ကို ပြောပါတယ်။

အသက်ဘေးက လွတ်မြောက်လာသူ ရေတပ်ဗိုလ် ၁ ဦးကတော့ သူ့ရဲ့အသက်ကယ်အင်္ကျီကြောင့်သာ အသက်ရှင်ခဲ့ကြောင်း၊ အဲဒီအင်္ကျီနဲ့ ရေစီးအတိုင်းမျောကာ အားအင်ချွေတာရင်း အိမ်မှာကျန်ခဲ့တဲ့မိခင်အိုကို ဆက်လက်လုပ်ကျွေးပြုစုခွင့်ရဖို့ ဆုတောင်းနေခဲ့တယ်လို့ ဆိုပါတယ်။

ကယ်ဆယ်ရေးရဟတ်ယာဉ် ၁ စီးဖြတ်လာတော့ အသက်ကယ်အင်္ကျီက ဝီစီကိုမှုတ်ပြီး လက်ပြခဲ့ ကြောင်း၊ ဒါပေမဲ့ ရဟတ်ယာဉ်က မမြင်ဘဲကျော်သွားပြီး ကရပူရီလှေကို တွေ့တဲ့အခါမှ ထပ်မံ အချက်ပြအကူအညီတောင်းရာ လှေအမြီးပိုင်းရှိ လူတစ်ဦးကတွေ့ရှိပြီး လာကယ်ခဲ့တာလို့ ပြောပါ တယ်။

ပျောက်ဆုံးနေဆဲရေတပ်သားရဲ့ မိသားစုဝင်တွေဟာ မျှော်လင့်ချက်တွေနဲ့ နေ့ရောညပါ ဆိပ်ကမ်းနားမှာ လာရောက်စောင့်ဆိုင်းနေကြပြီး တချို့က ငိုရင်းသတိလစ်သွားသူတာလည်းရှိလို့ အဲဒီမှာ ကျန်းမာရေးဌာနက စိတ်ကျန်းမာရေးဆရာဝန်တွေပါ လာရောက်ပြုစုကုသပေးနေပါတယ်။

ဒဏ်ရာရလို့ ဆေးရုံမှာတက်ရောက်ကုသနေသူတွေအတွက်ရော၊ ပြန်လည်ထူထောင်ရေးစခန်းမှာ အားအင်ပြန်ဖြည့်နေသူတွေအတွက် ထိုင်းဘုရင်ကြီးနဲ့မိဖုရားက ကုန်ကျစရိတ်အားလုံးတာဝန်ယူ ထောက်ပံ့ပေးထားတယ်လို့ ဆိုပါတယ်။ 

သေဆုံးသွားသူတွေအတွက် လျော်ကြေးငွေ  ၁ ဦးလျှင် ဘတ် ၁ သန်းကျော်မှ ၂ သန်းထိ ထောက်ပံ့ ငွေရရှိမှာဖြစ်တယ်လို့ သတင်းမှာ ဖော်ပြသွားပါတယ်။

Ref:- Ch7/ WorkPointtoday

ပြီးခဲ့တဲ့ ဒီဇင်ဘာ ၁၈ ရက်ညက ထိုင်းပင်လယ်အော်မှာ ရေတပ်စစ်သင်္ဘောတစီး ပျက်စီး နစ်မြုပ်သွားလို့  ရေထဲကူးခတ်နေတဲ့ ရေတပ်သားတွေကို ကယ်ဆယ်ရေးအဖွဲ့က လိုက်လံရှာဖွေနေရာမှာ ၇၈ ဦးသာ ကမ်းပေါ်ရောက်လာပြီး ကျန်တဲ့ ၂၈ ဦး ပျောက်ဆုံးနေဆဲပဲလို့ ထိုင်းသတင်းတွေမှာ ဖော်ပြပါတယ်။ 

မနေ့မနက်ပိုင်းအထိ ၇၅ ဦး ကယ်တင်ခဲ့ပြီး ည ၉ နာရီလောက်မှာ နောက်ထပ် ၃ ဦး ရှာဖွေ တွေ့ရှိကြောင်း၊ သူတို့ကို ထိုင်းအမှတ် ၁ ရေတပ်ဦးစီးချုပ် ဗိုလ်မှူးချုပ် ဝိချိုင်းလော့ချု စကွန်း ကိုယ်တိုင် ဘန်ဆဖန်းမြို့နယ်လေဆိပ်မှာ သွားရောက်ကြိုဆိုခဲ့တယ်လို့ ထိုင်းရတ်သတင်းမှာ ဖော်ပြ ပါတယ်။

ရေထဲပျောက်ဆုံးနေသူတွေကို ရေတပ်က အကြီးစားသင်္ဘောကြီး ၃ စီးအပြင် ကယ်ဆယ်ရေး လှေ တွေရော၊ ရဟတ်ယာဉ်နဲ့ပါ  ရေကြောင်းအကွာအဝေး မိုင် ၃၀ ပတ်ပတ်လည်မှာ ရာသီဥတု ဆိုးရွားနေတဲ့ကြားက  ၂၄ နာရီ အပူတပြင်းရှာဖွေနေတာပါ။ 

မနေ့ညနေပိုင်းက သင်္ဘောမှောက်တဲ့နေရာနဲ့ ၄ မိုင်လောက်အကွာမှာ အသက်ကယ်အင်္ကျီ တစု ကိုတွေ့တယ်လို့ ရဟတ်ယာဉ်ပေါ်က အကြောင်းကြားလာတာကြောင့် သွားရောက်ခဲ့ကြောင်း၊  အဝေးကနေ အသက်ကယ်အင်္ကျီ ၄ ခုလှမ်းမြင်ရပြီး အနီးရောက်တော့ မေ့မြောနေသူ ၁ ဦးသာ တွေ့ကာ ကျန်တာတွေက အင်္ကျီသာရှိပြီး လူမပါဘူးလို့ ကရပူရီသင်္ဘောတာဝန်ရှိသူက ပြောပါတယ်။ 

မေ့မျောနေသူမှာ ဦးခေါင်းမှာ ထိခိုက်ဒဏ်ရာရထားကြောင်း၊ ကရပူရီသင်္ဘောပေါ်မှာ ရှေးဦးသူနာပြုစုပေးပြီး သတိပြန်လည်လာပေမယ့် နုံးခွေနေတယ်လို့ ဆိုပါတယ်။ 

ကျန် ၂ ဦးကို တခြားတနေရာက ကယ်ဆယ်ခဲ့ပြီး ဒဏ်ရာမရှိပေမယ့် ရေထဲ နာရီပေါင်းများစွာ ကူး ခတ်ရတာကြောင့် ပင်ပန်းနွမ်းလျနေကြတယ်လို့ ဆိုပါတယ်။ 

အသက်ဘေးကလွတ်လာသူစုစုပေါင်း ၇၈ ဦးရှိပြီး ၅ ဦးမှာ ဒဏ်ရာတွေရထားတဲ့အတွက် ဆေးရုံတင်ထားရပါတယ်။

နစ်မြုပ်သွားတဲ့သင်္ဘောပေါ်မှာ တပ်သားတွေအတွက် လုံလောက်တဲ့ အသက်ကယ်အင်္ကျီ ပါမသွားဘူးလို့ သတင်းတွေ ထွက်ပေါ်နေတဲ့အပေါ် အမှတ် ၁ ရေတပ်ဗိုလ်ချုပ်ကတော့ အသက်ကယ်အင်္ကျီ လုံလောက်မှုရှိကြောင်း၊ သွားကယ်ဆယ်တဲ့ ကရပူရီသင်္ဘောကြီးကလည်း နောက်ထပ်ချပေးခဲ့သေးတယ်လို့ ပြောပါတယ်။

အသက်ဘေးမှ လွတ်မြောက်လာသူရေတပ်သား ၁ ဦးကတော့ သင်္ဘောကြီးနစ်မြုပ်စပြုလို့ ရေထဲ ခုန်ချကြတဲ့အချိန်မှာ အယောက်တိုင်းစေ့ အသက်ကယ်အင်္ကျီ မဝတ်ထားကြောင်း၊ သူကိုယ်တိုင်လည်း မဝတ်ရဘဲ ဝတ်ဆင်ထားသူ ၁ ဦးနောက် လိုက်ဆွဲကာ ကူးခတ်ခဲ့ရပြီး ကယ်ဆယ်ရေးလှေနဲ့တွေ့တာလို့ ပြောပါတယ်။ 

သူတို့ဟာ လှိုင်းပုတ်တဲ့ဒဏ်ကို ၃ ကြိမ်ခံရခဲ့ကြောင်း၊ အသက်ကယ်အင်္ကျီလည်း မဝတ်ရ၊ ရေလည်း မကူးတတ်တဲ့ သူငယ်ချင်းတယောက် သူ့မျက်စိရှေ့မှောက်မှာတင် ပင်လယ်ထဲနစ် စုံးစုံးနစ်မြှုပ်သွားတာကို ရင်နာနာနဲ့ကြည့်ခဲ့ရတယ်လို့  ငိုကြွေးရင်း သတင်းထောက်ကို ပြောပါတယ်။ 

အရင်က ပင်လယ်ထဲ ခဏခဏသွားပေမယ့် ဒါလောက်ပြင်းထန်တဲ့အန္တရာယ်မျိုး မကြုံဖူးကြောင်း၊ မိမိ ကိုယ်ကိုယ်လည်း မလွတ်တော့ဘူး ထင်ထားကြောင်း၊ ကံအားလျော်စွာလွတ်မြောက်လာပေမဲ့ စိတ်တွေ တုန်လှုပ်ချောက်ချားနေတုန်းပဲလို့ သတင်းထောက်ကို ပြောပါတယ်။ 

ကယ်ဆယ်လာသူတွေကို လာချထားတဲ့  ဘန်ဆဖန်းမြို့နယ်သင်္ဘောဆိပ်ကမ်းမှာ ရေတပ်သားရဲ့ မိဘဆွေမျိုးတွေတပုံကြီး လာရောက်စောင့်မျှော်နေကြပါတယ်။ မိခင်ကြီးတယောက်ဟာ  တွေ့သူတိုင်း အယောက်တိုင်းကို သူ့သားကို တွေ့ပြီလားလို့ အရူးတယောက်သဖွယ် လိုက်လိုက်မေးနေတာဟာလည်း မြင်သူတိုင်းကို ရင်ဆို့စေတယ်လို့  နယ်မြေထဲ သတင်းသွားယူနေတဲ့ ထိုင်းရတ်သတင်းထောက်က ပြောပါတယ်။ 

အသက်ကယ်အင်္ကျီဟာ ၂ ရက်သာ ခံကြောင်း ပြောဆိုနေကြတာကြောင့် ဆွေမျိုးမိဘတွေရဲ့ ပူပင် သောကတွေလည်း တရိပ်ရိပ်တက်နေတယ်လို့ ဆိုပါတယ်။ 

နစ်မြုပ်သွားတဲ့ စစ်သင်္ဘောပေါ်မှာ တပ်သားပေါင်း ၁၀၆ ဦး ပါလာတယ်လို့ ကနဦးသတင်းတွေမှာ ဖော်ပြပေမယ့် တာဝန်ရှိသူတွေက အမည်နဲ့ ထပ်မံစစ်ဆေးရာမှာ တပ်သား ၁ ဦးက သင်္ဘော ထွက်ခါနီးမှာ အရေးပေါ်ခွင့်ယူလိုက်ရလို့ မလိုက်ဖြစ်တော့ကြောင်း၊ ဒါကြောင့် လှေပေါ်မှာ တပ်သား ၁၀၅ ဦးသာ ပါရှိကြောင်း ထိုင်းရတ်သတင်းမှာ ဖော်ပြပါတယ်။ 

HTMS ဆူခိုထိုင်း စစ်သင်္ဘောဟာ အင်ဂျင်ချို့ယွင်းလို့ ကမ်းရိုးတန်းကနေ ရေမိုင် ၃၇ ကီလိုမီတာအကွာမှာ နစ်မြုပ်သွားခဲ့တာပါ။

၁၉၈၇ ခုနှစ်ကတည်းက အမေရိကန်နိုင်ငံမှာ တည်ဆောက်ထားတဲ့ ဆူခိုထိုင်း ရေတပ်သင်္ဘောဟာ ဒီဇင်ဘာ ၁၈ ရက်မှာ လှိုင်းပြင်းတွေ ရိုက်ခတ်လို့ တဖက်ကို တိမ်းစောင်းသွားခဲ့တယ်လို့ ရေတပ် ပြောရေးဆိုခွင့်ရှိသူ ရေတပ်ဗိုလ်ချုပ် ပေါ့ခရွန် မွန်သာပလင်က ပြောပါတယ်။