ထိုင်းနိုင်ငံမှာ ပြီးခဲ့တဲ့ရက်ပိုင်းက ဆူခိုထိုင်း ရေတပ်စစ်သင်္ဘောမုန်တိုင်း မိနစ်မြုပ်ခဲ့တဲ့အချိန်နဲ့ မရှေးမနှောင်းမှာဘဲ နောက်ထပ် ငါးဖမ်းလှေနဲ့ ကုန်တင်သင်္ဘောကြီးတွေပါ မုန်တိုင်းမိပြီး ပျက်စီးဆုံးရှုံးခဲ့တယ်လို့ ထိုင်းပင်လယ်ပြင် သဘာဝအရင်းအမြစ် ထိန်းသိမ်းကာကွယ်ရေးဌာနရဲ့ ထုတ်ပြန်ချက်ကို ကိုးကားပြီး Work point today ထိုင်းသတင်းမှာ ဖော်ပြပါတယ်။

ဒီဇင်ဘာ ၁၉ ရက် မနက် ၃ နာရီခွဲလောက်က ထိုင်းတောင်ပိုင်း ချွန်းဖွန်းခရိုင် ပတ်နမ့်ဆိပ်ကမ်းနဲ့ ရေမိုင် ၅ ဒသမ ၇ မိုင်အကွာမှာ ANUPHUM အမည်ရှိ ကွန်တိန်နာ ကုန်ပစ္စည်းတင်သင်္ဘော ၁ စီး မုန်တိုင်းမိပြီး ဘယ်ဘက်ကိုစောင်းသွားလို့ သင်္ဘောပေါ်တင်လာတဲ့ ကုန်သေတ္တာတွေ ပင်လယ်ထဲပြုတ်ကျသွားကြောင်း ကပ္ပတိန်ရဲ့ သတင်းပေးပို့ချက် ရခဲ့တယ်လို့ ဆိုပါတယ်။

အဆိုပါပင်လယ်ထဲမှာပဲ ဒီဇင်ဘာ ၁၉ ရက် မနက် ၈ နာရီခွဲက Patravarin 88 အမည်ရှိ  ငါးဖမ်းလှေ ၁ စီး မုန်တိုင်းမိကြောင်း အကူအညီတောင်းလာလို့ လှေပေါ်ပါလာတဲ့ လှေသား ၁၀ ယောက်လုံးကို သွားရောက်ကူညီ ကယ်တင်ခဲ့ရတယ်လို့ ဆိုပါတယ်။

ဒီမတိုင်ခင် ဒီဇင်ဘာ ၁၈ ရက် ညပိုင်းကလည်း ထိုင်းတောင်ပိုင်း စူရတ်ဌာနီခရိုင် စမွီဆိပ်ကမ်းနဲ့ ၃၅ မိုင်အကွာမှာ ရာဘာတွေတင်ဆောင်လာတဲ့ ကုန်တင်သင်္ဘော ၁ စီး မုန်တိုင်းမိကြောင်း အကြောင်းကြားလာလို့ သင်္ဘောပေါ်ပါလာသူ ၉ ဦးကို အသက်ဘေးက ကယ်တင်ခဲ့ကြောင်း၊ သင်္ဘောပေါ်က ကွန်တိန်နာအလုံးပေါင်း ၃၀ ကျော် ပင်လယ်ထဲ ပြုတ်ကျပြီး ရေစီးနဲ့အတူမျောကာ ချိုင်းယားမြို့နယ်က ကမ်းစပ်တခုမှာ သောင်တင်နေတယ်လို့ ဆိုပါတယ်။

တချိန်တည်းမှာပဲ ဆုန်ခလာခရိုင် ပတ်လောင့်ဆိပ်ကမ်းနဲ့ ၁၉ မိုင်အကွာမှာ ဆပ်ဖယားဆုနန် အမည်ရှိ ငါးဖမ်းလှေ ၁ စီး မုန်တိုင်းမိပြီး မြုပ်လုဆဲဖြစ်နေလို့ ကယ်ဆယ်ရေးအဖွဲ့က သွားရောက်ကူညီခဲ့ပြီး လှေသား ၅ ဦးလည်း အသက်ဘေးက လွတ်ကင်းခဲ့ပါတယ်။

ဒါ့အပြင် ဆုန်ခလာခရိုင် လောင်းနမ့်ပင်လယ်ဝနားမှာ ဖတ်ချရဖန်း အမည်ရှိ ဆီတင်သင်္ဘော ၁ စီး ဂီယာပျက်သွားပြီး ဆက်မခုတ်မောင်းနိုင်တော့ဘဲ အမြီးပိုင်းက ရေအောက်မြေကြီးထိကာ ခေါင်းပိုင်းက ရေပေါ်ဦးမော့နေကြောင်း၊ အဆိုပါသင်္ဘောကို ဆွဲတင်နိုင်ဖို့ နည်းလမ်းရှာဖွေနေတယ်လို့ ဆိုပါတယ်။

အဲဒီကာလမှာ အခြေအနေ အဆိုးရွားဆုံး ကြုံတွေ့ရတာကတော့ တပ်ဖွဲ့ဝင် ၁၀၀ ကျော် လိုက်ပါလာတဲ့ ဆူခိုထိုင်းအမည်ရှိ စစ်သင်္ဘောကြီး ပျက်စီးနစ်မြုပ်သွားတာ ဖြစ်ပါတယ်။ သင်္ဘောကြီးဟာ ည ၈ နာရီကျော်မှာ မုန်တိုင်းမိကာ ည ၁၁ နာရီကျော်မှာ လုံးဝ နစ်မြုပ်သွားပါတယ်။

အဆိုပါသင်္ဘောကြီးပေါ်ကနေ ရေတပ်ဖွဲ့ဝင် ၈၂ ဦး အသက်ရှင်ပြန်တွေ့ပြီး ၆ ဦးသေဆုံးကာ ၅ ဦး ဒဏ်ရာရထားပါတယ်။ နောက်ထပ်ကျန်ရှိနေတဲ့ ၂၃ ဦးကို ဆက်လက်ရှာဖွေနေဆဲ ဖြစ်ပါတယ်။

ရိုဟင်ဂျာဒုက္ခသည် ၁၆၀ လောက် လိုက်ပါလာတဲ့ စက်လှေတစင်း စက်ချွတ်ယွင်းကာ ထိုင်းပင်လယ်ပြင်ထဲမှာ မျောပါနေပြီး အကူအညီတွေ လိုအပ်နေတယ်လို့ ဒုက္ခသည်တွေနဲ့ အဆက်သွယ်ရတဲ့  ရိုဟင်ဂျာ လူငယ်လူ့အခွင့်အရေး တက်ကြွလှုပ်ရှားသူက  ဒီဗွီဘီကို ပြောပါတယ်

အဲဒီစက်လှေဟာ နိုဝင်ဘာနောက်ဆုံးအပတ်မှာ ဘင်္ဂလားဒေ့ရှ်နိုင်ငံရှိ ရိုဟင်ဂျာ  ဒုက္ခသည်စခန်းကနေ ထွက်ခွာလာတာာဖြစ်ပြီး ထိုင်းပင်လယ်ပြင်ကို ဖြတ်သန်းစဉ် စက်ချွတ်ယွင်းသွားလို့ ပင်လယ်ထဲမှာ မျောနေတာ ၁၀ ရက်လောက် ရှိနေပြီလို့ စက်လှေပေါ်မှာ လိုက်ပါလာတဲ့သူတွေက ဂြိုဟ်တုဖုန်းနဲ့ မိသားစု၀င်တွေဆီ ဆက်သွယ်ရာကနေတဆင့် သိရတာဖြစ်ပါတယ်။

စက်လှေပေါ်မှာ အစာရေစာ ပြတ်လို့ သေဆုံးသူ ၁၀ ယောက်လောက်ရှိနေပြီး ထိုင်းရေပိုင်နက်မှာ ဖြစ်တဲ့အတွက် ထိုင်းအစိုးရကိုအကူအညီတောင်းခံထားတယ်လို့ ရိုဟင်ဂျာ လူငယ်လူ့အခွင့်အရေး တက်ကြွလှုပ်ရှားသူ ကိုဇာနည်က ပြောပါတယ်။

ဒီဖြစ်စဉ်နဲ့ ပတ်သက်ပြီး လတ်တလောမှာ အမျိုးသားညီညွတ်ရေးအစိုးရ လူ့အခွင့်အရေးဌာနကို ဆက်သွယ်သတင်းပို့ အကူအညီတောင်းခံထားပါတယ်။

NUG အစိုးရအနေနဲ့လည်း နီးစပ်သူတွေ အကူအညီနဲ့ ထိုင်းအစိုးရကိုရော မလေးရှားအစိုးရကိုပါ ဆက်လက်အကူအညီတောင်းခံထားတယ်လို့ အမျိုးသားညီညွတ်ရေးအစိုးရ လူ့အခွင့်အရေးဝန်ကြီးဌာန အကြံပေး ဦးအောင်ကျော်မိုးက ဒီဗွီဘီကို ပြောပါတယ်။

ရိုဟင်ဂျာ ဒုက္ခသည်တွေဟာ ဘင်္ဂလားဒေ့ရှ်နိုင်ငံ ဒုက္ခသည်စခန်းကနေ ၃ ရက်ခြား စက်လှေ ၂ စီးထွက်ခဲ့တာဖြစ်ပြီး ကျန်တစ်စီးကတော့ အဆက်အသွယ် မရသေးဘူးလို့ သိရပါတယ်။

ပြီးခဲ့တဲ့ နိုဝင်ဘာလကလည်း လှည်းကူးမြို့နယ်မှာ ရိုဟင်ဂျာ ၆၆ ယောက် အဖမ်းခံခဲ့ရသလို ဒီဇင်ဘာလထဲမှာတော့ မုဒုံမြို့မှာ ရိုဟင်ဂျာ ၇၈ ယောက် အဖမ်းခံခဲ့ရကာ ဒီဇင်ဘာ ၅ ရက်နေ့က လှည်းကူးမြို့နယ်ထဲမှာပဲ ရိုဟင်ဂျာ ၁၃ ယောက်ရဲ့ အလောင်းတွေကို တွေ့ရှိခဲ့ပါတယ်။

ရိုဟင်ဂျာ ဒုက္ခသည်တွေဟာ ဒုက္ခသည်ခန်းတွေမှာ နေထိုင်ရတာ အဆင်မပြေတာကြောင့် စွန့်စားပြီး အခုလို ရေလမ်းခရီးကို ဖြတ်သန်းရင်း အသက်အန္တရာယ်တွေနဲ့ပါ မကြာခဏဆိုသလို ရင်ဆိုင်နေရတာဖြစ်ပါတယ်။

ဘင်္ဂလားဒေ့ရှ်နဲ့ မြန်မာနိုင်ငံက ဒုက္ခသည်တွေ ကပ္ပလီပင်လယ်ပြင်ကို စက်လှေတွေနဲ့ စွန့်စားဖြတ်ကူးမှုတွေ ပိုမိုများပြားလာတယ်လို့ ကုလသမဂ္ဂဒုက္ခသည်များဆိုင်ရာ အေဂျင်စီ (UNHCR) က ဒီဇင်ဘာ ၂ ရက်မှာ သတိပေးချက်ထုတ်ပြန်ထားပါတယ်။

အရှေ့တောင်အာရှ ရေလမ်းခရီးဟာ ကမ္ဘာ့အဆိုးရွားဆုံးရေလမ်းကြောင်းတစ်ခုဖြစ်ပြီး အခုနှစ် ဇန်နဝါရီလနောက်ပိုင်းမှာ ကပ္ပလီပင်လယ်ပြင်ကို စက်လှေတွေနဲ့ ဖြတ်ကူးခဲ့သူပေါင်း ၁၉၀၀ ကျော်ရှိခဲ့ကာ  ၂၀၂၀ ပြည့်နှစ်ထက်စာရင် ၆ ဆ ပိုများတဲ့အရေအတွက် ဖြစ်တယ်လို့ ဆိုပါတယ်။