စစ်ကိုင်းတိုင်း၊ ပုလဲမြို့နယ်ရှိ ဇီးဖြူကုန်းကျေးရွာကို စစ်တပ်က ပျူစောထီးရွာအဖြစ် သတ်မှတ်လိုက်လို့ လက်မခံနိုင်ဘဲ ထွက်ပြေးလာတဲ့ ရွာသား ၄၀၀ ကျော်ကို ဖေဖော်ဝါရီ ၁၉ ရက်က ပြည်ပအလှူရှင်တွေနဲ့ ပုလဲပအဖက ထောက်ပံ့ကူညီဆောင်ရွက်ပေးခဲ့တယ်လို့ ပုလဲ ပအဖ က ထုတ်ပြန်ပြောဆိုပါတယ်။
ထိုင်းရောက် မြန်မာနိုင်ငံသားများ စည်းလုံးညီညွတ်ရေးအဖွဲ့က လှူဒါန်းတဲ့ အလှူငွေ ၅၂၀,၀၀၀ ကျပ်ကို ပုလဲမြို့နယ်၊ ဇီးဖြူကုန်းရွာက ထွက်ပြေးလာခဲ့တဲ့ စစ်ဘေးရှောင်ပြည်သူ ၄၀၀ ကျော်အတွက် သွားရောက် ထောက်ပံ့ပေးအပ်ခဲ့ပါတယ်လို့ ပုလဲမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူကပြောပါတယ်။
ရွာကို စွန့်ခွာခဲ့ကြတာ ၁ နှစ်ကျော်ကြာခဲ့ပြီး စားဝတ်နေရေး အခက်အခဲတွေ ရှိနေကြလို့ ပုလဲမြို့နယ် ပြည်သူ့အုပ်ချုပ်ရေးအဖွဲ့က ဇီးဖြူကုန်း စစ်ဘေးရှောင်ပြည်သူတွေကို ဆန် အိတ် ၂၀၊ အဝတ်အထည်၊ ဆီ ၅ ပုံးနဲ့ မင်းတိုင်ပင်ရွာက မီးရှို့ခံခဲ့ရတဲ့ အိမ်ထောင်စု ၈ စုကို ဆန် ၈ အိတ် ထောက်ပံ့ခဲ့တယ်လို့ ပုလဲပအဖ တာဝန်ရှိသူက ဆိုပါတယ်။
ပြီးခဲ့တဲ့ ဖေဖော်ဝါရီ ၁၉ ရက်ကလည်း ပုလဲမြို့နယ်၊ နွယ်အင်းရွာက ကျေးလက်ကျန်းမာရေး ဆေးပေးခန်းကို စစ်ကောင်စီတပ်သားတွေက မီးရှို့ဖျက်ဆီးသွားခဲ့တယ်လို့ ဒေသခံတွေထံက သိရပါတယ်။
ထိုင်းနိုင်ငံ၊ စူလတ်မြို့မှာ တော်လှန်လောင်းလုံးရန်ပုံငွေ ဘောလုံးပြိုင်ပွဲကို နိုဝင်ဘာ ၆ ရက်မှာ စတင် ကျင်းပသွားမယ်လို့ လောင်းလုံးမြို့နယ် ပြည်သူအုပ်ချုပ်ရေးအဖွဲ့က သိရပါတယ်။
ရန်ပုံငွေ ဘောလုံးပြိုင်ပွဲကို ဖန်ငါး၊ စူလတ်၊ နန်းစံ၊ ဒေါင်းစပ်၊ ခနို၊ ထက်ခမ်း၊ ထူးယိုင်၊ ဘန်ဝမ်း စတဲ့မြို့အသီးသီးက လာရောက်ယှဉ်ပြိုင်ကစားကြမှာဖြစ်ပြီး နဂိုစုဖွဲ့မှုရှိပြီးသား အသင်းတွေ ပါဝင်သလို တော်လှန်ရေးအတွက် အခုမှ စုဖွဲ့ပြီး တက်ကြွစွာပါဝင်လာတဲ့အသင်းတွေလည်း ရှိတယ်လို့ ဆိုပါတယ်။
လောင်းလုံးမြို့နယ်ပြည်သူ့အုပ်ချုပ်ရေးအဖွဲ့တာဝန်ရှိသူ တဦးက “လောင်းလုံးမြို့နယ်အတွင်း တော်လှန်ရေးလုပ်ငန်းတွေမှာ သုံးနိုင်ဖို့နဲ့ ကာကွယ်ရေးလုပ်ငန်းတွေမှာ သုံးဖို့ ဒီဘောလုံးပြိုင်ပွဲကို ကျင်းပတာပါ။ ဒီပြိုင်ပွဲက ထိုင်းနိုင်ငံရောက် မြန်မာရွှေ့ပြောင်းအလုပ်သမားတွေကြား တော်လှန်ရေးနဲ့ပတ်သက်ပြီး ပိုမိုပူးပေါင်းပါဝင်လာစေဖို့ အထောက်ကူဖြစ်စေမယ်”လို့ ပြော ပါတယ်။
အသင်း တသင်းမှာ ၁၅ ဦး ပါဝင်ယှဉ်ပြိုင်ကစားကြမှာ ဖြစ်ပြီး ပြိုင်ပွဲကို ထိုင်းနိုင်ငံရောက် မြန်မာရွှေ့ပြောင်းအလုပ်သမား ဘောလုံးအသင်းပေါင်း ၂၈ သင်း၊ လူဦးရေ ၄၂၀ က ပါဝင်ယှဥ်ပြိုင်မယ့်ပွဲလည်း ဖြစ်ပါတယ်။
ဂုဏ်ပြုဆုအနေနဲ့ အကောင်းဆုံး ၄ သင်းကို စီစဉ်ပေးထားကာ ပ/ဒု/တ ရတဲ့အသင်းတွေကို ဖလားနဲ့ဆွဲပြား၊ စတုတ္ထရတဲ့အသင်းကို ဖလားပေးအပ်သွားမှာဖြစ်ပြီး တယောက်ချင်းအနေနဲ့ အကောင်းဆုံးဂိုးသမားဆု၊ ဂိုးသွင်းအများဆုံးဆုနဲ့ ပွဲစဉ်တလျှောက်အကောင်းဆုံးဆုတွေကို ချီးမြှင့်သွားမယ်လို့ သိရပါတယ်။
အရင်က တော်လှန်ရေးရန်ပုံငွေအတွက် လောင်းလုံးမြို့နယ်ပြည်သူ့အုပ်ချုပ်ရေးအဖွဲ့က တော်လှန် လောင်းလုံး ကျပ်သိန်း ၁၀၀ ရန်ပုံငွေ ကမ်ပိန်းလုပ်ခဲ့ပေမဲ့ အခုလို ရန်ပုံငွေ ဘောလုံးပြိုင်ပွဲ ကျင်းပတာဟာ ပထမဆုံးဖြစ်ပါတယ်။
