ထိုင်းနိုင်ငံ ဘန်ကောက်မြို့တော်က ကိုဗစ်-၁၉ ကပ်ရောဂါထိန်းချုပ်ရေး ကွာရန်တင်း ထားရှိတဲ့ ဟိုတယ်ကနေ ထွက်ပြေးတဲ့ အစ္စရေးနိုင်ငံသား ကမ္ဘာလှည့် ခရီးသည် တယောက်ကို ထိုင်းရဲတွေက ဒီဇင်ဘာ ၂၂ ရက်မှာ ဖမ်းဆီးလိုက်ပါတယ်။

သူဟာ အိုမီခရွန် ဗီဇမျိုးကွဲ ကူးစက်ခံ ထားရသူအဖြစ် စစ်ဆေး တွေ့ရှိထားတယ်လို့လည်း ဆိုပါတယ်။

အသက် ၂၉ နှစ်အရွယ် အိုဟဒ် ဘာရွတ်ခ်ဟာ ဘန်ကောက်မြို့တော်ကို ဒီဇင်ဘာ ၁၇ ရက်က ရောက်လာတာပါ။ သူဟာ ရောဂါခြေချုပ် ဟိုတယ်ကနေ နောက်နေ့မှာ ဆေးစစ်ချက် ရလဒ်ကို မစောင့်ဘဲ ထွက်သွားခဲ့တာပါ။

အဲဒီနောက် ထိုင်းနိုင်ငံတောင်ပိုင်း ကော့စမွေကျွန်းကို ခရီးသွားခဲ့ပြီး ဗုဒ္ဓဟူးနေ့ မွန်းလွဲချိန်မှာ အဲဒီကျွန်းက ထိုင်းရဲတွေဆီ လာရောက် အဖမ်းခံခဲ့ပါတယ်။

သူ့ကို ထပ်မံ စမ်းသပ်ရာမှာတော့ ကူးစက်ခံ မဟုတ်ကြောင်း ထပ်တွေ့ခဲ့ပေမဲ့ သူ့ကို ကော့စမွေ ဆေးရုံမှာ ရောဂါခြေချုပ်နဲ့ ဆယ်ရက် ထားဖို့ အမိန့်ချ ထားပါတယ်။

အစ္စရေးခရီးသည်ရဲ့ ဆေးစစ်ချက် ရလာဒ်က အချိန်ပေါ် မူတည်ပြီး ကူးစက်ခံ ဖြစ်လိုက် မဖြစ်လိုက် ပြသနေတယ်။

“သူက နေပြန်ကောင်းခါနီးနေပြီ ဒါကြောင့် သူ့ကိုယ်ထဲမှာ ဗိုင်းရပ်စ် နည်းနည်း ကျန်သေးတယ်” လို့  ပြည်သူ့ ကျန်းမာရေးဝန်ကြီးဌာန အမြဲတမ်း အတွင်းဝန် ကီယတ်တီဖမ် ဝုန်ရာဂျစ်က ပြောပါတယ်။

ဘာရွတ်ခ်ဟာ ရောဂါ ထိန်းချုပ်ရေး လုပ်ဆောင်ချက်တွေကို လိုက်နာဖို့ ပျက်ကွက်မှုနဲ့ တရားစွဲ ခံထားရပါတယ်။

ထိုင်းနိုင်ငံတောင်ပိုင်း စူရတ်ဌာနီခရိုင်ထဲမှာ ယမန်နေ့ညက မှန်လုံကားနဲ့ ခရီးထွက်လာတဲ့ မြန်မာနိုင်ငံသား ၁၆ ဦး ဖမ်းဆီးခံခဲ့ရတယ်လို့ ချနယ်လ် ၇ ထိုင်းတီဗွီသတင်းမှာ ဖော်ပြပါတယ်။

နယ်မြေထဲမှာ ရွှေ့ပြောင်းအလုပ်သမားတွေကို ခရိုင်ကျော်ရွှေ့လျားသယ်ဆောင်မှုတွေ ရှိနေကြောင်း ကြိုတင် သတင်းရတဲ့အတွက် ခရိုင်လဝက ရဲတပ်ဖွဲ့ နဲ့ အုပ်ချုပ်ရေးရုံးဘက်က တာဝန်ရှိသူတွေဟာ ဖေဖော်ဝါရီလ ၂၄ ရက် ည ၇ နာရီလောက်က  စူရတ်ဌာနီခရိုင် ထာ့ချန်းမြို့နယ် ခလောင်းဆိုင်းအုပ်စု အဝေးပြေးကားလမ်းဘေးရှိ ဓာတ်ဆီဆိုင်ထဲမှာ ဝင်နားနေတဲ့ မှန်လုံကား ၂ စီးကို ဝင်ရောက်စစ်ဆေးခဲ့ပါတယ်။ 

စစ်ဆေးချက်အရ အဆိုပါကား ၂ စီးပေါ်မှာ  ၅ လသားကလေးအရွယ်ပါ မိခင် ၁ ဦး ၊ ၁၂ နှစ်သား ကလေးငယ် ၁ ဦး ၊ နောက်ထပ် အမျိုးသား ၁၂ ဦး အမျိုးသမီး ၂ ဦးတို့ လိုက်ပါစီးနင်းခဲ့ပြီး အားလုံးမှာ မြန်မာအလုပ်သမားတွေဖြစ်ကာ သက်သေအထောက်အထားမပြည့်စုံဘူးလို့ ဆိုပါတယ်။

သူတို့ထဲမှာ ၈ ဦးက ပတ်စပို့ရှိပေမယ့် အိုဗာစတေး ( နေထိုင်ခွင့်ရက်လွန် ) နေကြပြီး ၇ ဦး ကတော့ ဘာအထောက် အထား မှမရှိလို့  ထိုင်းနိုင်ငံထဲ တရားမဝင် ဝင်ရောက်နေထိုင်မှု ၊ ကိုဗစ်-၁၉ ဥပဒေအရ  ခရိုင်ကျော်ခရီးသွားလာခွင့်ကို ချိုးဖောက်မှုတွေနဲ့ အရေးယူခံရမယ်လို့ စူရတ်ဌာနီ ရဲတပ်ဖွဲ့က ပြောပါတယ်။ 

ဒါ့အပြင် သူတို့တွေကို တင်ဆောင်လာတဲ့ ထိုင်းနိုင်ငံသား ၂ ဦးဟာလည်း တရားမဝင်အလုပ်သမားတွေကို ခိုလှုံခွင့်ပြုမှု ၊ တရားမဝင်သူတွေအဖမ်းမခံရအောင် ကူညီကာကွယ်ပေးမှုတွေနဲ့ အရေးယူခံရမယ်လို့ ဆိုပါတယ်။ 

ကားသမား ၂ ဦး ထွက်ဆိုချက်အရ သူတို့ဟာ အဆိုပါ မြန်မာနိုင်ငံသားတွေကို ဟတ်ယိုင် ၊ ကရပီ ၊ ဖူးကစ် ၊ ဖန်ငါး နဲ့ စူရတ်ဌာနီ စတဲ့နေရာအသီးသီးကနေ တင်ဆောင်ခဲ့ကြောင်း ၊ တချို့က  မလေးရှားက ပြန်လာကာ ဘန်ကောက် နဲ့ စမွတ်ဆာခွန်းမှာ အလုပ်လာလုပ်မယ့်သူတွေရှိသလို  တချို့က နေရပ်မြန်မာပြည်ပြန်မယ့်သူတွေလည်းပါတယ်လို့ ဆိုပါတယ်။ 

သူတို့နဲ့အတူ တရားမဝင်အလုပ်သမားတွေကို တင်ဆောင်လာတဲ့ နောက်ထပ်ကား ၁ စီးရှိသေးကြောင်း ၊ ဒါပေမဲ့ အဲဒီကားကတော့ ထွက်ပြေးလွတ်မြောက်သွားတယ်လို့  တာဝန်ကျ ရဲဝန်ထမ်းက ပြောပါတယ်။