ထိုင်းနိုင်ငံအလယ်ပိုင်း ပထုန်ဌာနီခရိုင် နဝနခွန်နယ်မြေရှိ အီလက်ထရောနစ် လျှပ်စစ်ပစ္စည်းစက်ရုံတရုံက မြန်မာအလုပ်သမား ၂၇၀ ဟာ ပြီးခဲ့တဲ့ စက်တင်ဘာ ၁၃ ရက်နေ့က ရုတ်တရက် အလုပ်ထုတ်ခံခဲ့ကြရပါတယ်။
အဲဒီနေ့မနက် ၈ နာရီကစ အလုပ်ဆင်းလာသူတိုင်းကို စက်ရုံမန်နေဂျာက ပစ္စည်းတွေ အော်ဒါမလာလို့ အလုပ်မခန့်နိုင်တော့ကြောင်း ပြောပြီး ရုတ်တရက် အလုပ်ဖြုတ်လိုက်တာကြောင့် အလုပ်သမားတွေ မကျေနပ်ဖြစ်ပြီး ဆန္ဒပြခဲ့ကြတာလို့ အလုပ်သမား ကူညီစောင့်ရှောက်ရေးမဟာမိတ်အဖွဲ့ AAC ခေါင်းဆောင် ကိုရဲမင်းက ဒီဗွီဘီကို ပြောပါတယ်။
“အလုပ်သမားတွေက ဆက်သွယ်လာလို့ ကျနော်တို့လည်း သက်ဆိုင်ရာ အလုပ်သမားကာကွယ် စောင့်ရှောက်ရေးရုံး၊ အလုပ်သမားရုံး၊ လဝက ရဲတွေနဲ့အတူ သွားပြီးညှိနှိုင်းဖြေရှင်းပေးခဲ့ပါတယ်။ ကျနော်တို့မရောက်ခင် မနက်ပိုင်းမှာ လုံးဝအဆင်မပြေပါဘူး၊ အလုပ်ရှင်က နစ်နာကြေးတွေ မပေးချင်ဘူးပေါ့။ အဲဒါနဲ့ အလုပ်သမားကိုယ်စားလှယ်၊ စက်ရုံကိုယ်စားလှယ်၊ အလုပ်သမားရုံး တာဝန်ရှိသူတွေရယ်၊ ပြီးတော့ ကျနော်တို့ အေအေစီအဖွဲ့ ၄ ပွင့်ဆိုင် ဆွေးနွေးညှိနှိုင်းကြပါတယ်။ ညနေ ၄ နာရီလောက်မှာ အားလုံး ပြေလည်မှုရခဲ့ကြတယ်ခင်ဗျ။”
ညှိနှိုင်းချက်အရ အလုပ်ရှင်ကနေပြီး အလုပ်သမား ၂၇၀ ဦးစလုံးရဲ့ ရသင့်ရထိုက်တဲ့ ၁ လစာ လုပ်အားခကိုရော၊ ကြိုတင်အကြောင်းမကြားဘဲ ရုတ်တရက်အလုပ်ထုတ်ပစ်လို့ နစ်နာကြေးအနေနဲ့ ၁၅ ရက်စာ လုပ်အားခတွေရော စုစုပေါင်း ဘတ် ၄ သန်းကျော်ကို ပေးဖို့နဲ့ အလုပ်သမားတွေရဲ့ စာရွက်စာတမ်း သက်သေအထောက်အထားဆိုင်ရာကိစ္စတွေလည်း ဒီလ ၁၉ ရက်နေ့အပြီး ဆောင်ရွက်ပေးဖို့ သဘောတူလိုက်တယ်လို့ ဆိုပါတယ်။
အဆိုပါစက်ရုံမှာ မြန်မာနဲ့ထိုင်းလုပ်သား ရာနဲ့ချီရှိပြီး ရုတ်တရက် အလုပ်ထုတ်ခံရတဲ့ထဲမှာ ထိုင်းအလုပ်သမားတွေလည်း ပါဝင်ကြောင်း၊ သူတို့လည်း သူတို့အစီအစဉ်နဲ့ ညှိနှိုင်းတောင်းဆိုလိမ့်မယ်လို့ ဆိုပါတယ်။
ဒီမတိုင်ခင် ပြီးခဲ့တဲ့ ၁၀ ရက်နေ့ကလည်း နခွန်းပထုံခရိုင် အုန်းယိုင်မြို့ရှိ အထည်ချုပ်စက်ရုံ ၁ ရုံမှာ မြန်မာလုပ်သား ၂၀၀ ကျော် အကြောင်းမဲ့အလုပ်ထုတ်ခံရပါသေးတယ်။
အဆိုပါကိစ္စကို သွားရောက်ဖြေရှင်းပေးရာမှာ အလုပ်သမားကတ် စာရွက်စာတမ်းတွေ အဆင်ပြေပေမယ့် နစ်နာကြေးကိစ္စတွေမှာ အဆင်မပြေလို့ ရဲစခန်းမှာ အမှုဖွင့်ထားကြောင်း၊ မနေ့ကတော့ စက်ရုံဘက်က တရားမစွဲဖို့လာပြောလို့ အလုပ်သမားတွေဘက်က ရသင့်ရထိုက်တာတွေ အကုန်ရဖို့ ပြန်ပြီးညှိနှိုင်းနေတယ်လို့ ကိုရဲမင်း AAC က ပြောသွားပါတယ်။
ထိုင်းနိုင်ငံအလယ်ပိုင်း ချာ့ချိန်းဆောဝ်းခရိုင် ဘန်နမ့်ပလျို့မြို့နယ်ရှိ Joinsoon လျှပ်စစ်ပစ္စည်းစက်ရုံမှာ မြန်မာရွှေ့ပြောင်းလုပ်သား ၁၉ ဦး အကြောင်းမဲ့ အလုပ်ထုတ်ခံရတဲ့အတွက် ကျန်ရှိအလုပ်သမားပေါင်း ၄၅၀ ကျော် ဒီကနေ့မနက်က ဆန္ဒထုတ်ဖော်ခဲ့ကြပါတယ်။
ဘာအကြောင်းပြချက်မှမရှိဘဲ သူတို့လုပ်ဖော်ကိုင်ဘက်ကို ရုတ်တရက်အလုပ်ဖြုတ်လိုက်တာ ကြောင့်ရော၊ နောက်နောင်လည်း မပြောမဆို အလုပ်ထုတ်ပစ်တာမျိုးတွေ ထပ်ဖြစ်လာမှာစိုးလို့ အလုပ်မဆင်းဘဲ ဒီနေ့မနက် ၆ နာရီခွဲလောက်ကစပြီး စက်ရုံရှေ့မှာ အချိန် ၃ နာရီကြာ ဆန္ဒပြခဲ့ကြတယ်လို့ စက်ရုံလုပ်သားတဦးဖြစ်သူ ကိုဇင်ဖြိုးအောင်က ဒီဗွီဘီကို ပြောပါတယ်။
“အလုပ်သမားမှာ ဘာအပြစ်မှမရှိဘဲ ဘာအကြောင်းပြချက်မှမရှိဘဲ အလုပ်ထုတ်ပစ်တာကို မကျေနပ်လို့ ဆန္ဒပြတာပါ။ ငြိမ်ခံနေရင် နောက်လည်း ဒီလိုအလုပ်ခံရမှာလေ။ အဲဒါကြောင့် ဒီကနေ့ ကျနော်တို့တယောက်မှအလုပ်မဆင်းဘဲ စက်ရုံရှေ့အပြင်ဘက်ကနေ ဆန္ဒပြတယ်။ ကျနော်တို့က အလုပ်ထုတ်ရတဲ့အကြောင်းရင်းကို ရှင်းပြဖို့၊ ကြိုတင်အကြောင်းမကြားဘဲ အလုပ်ထုတ်ခံရတဲ့ သူတွေအတွက် နစ်နာကြေး လစာ ၃ လစာ ပေးလျော်ဖို့ တောင်းဆိုတယ်။”
အလုပ်သမားတွေ အကြောင်းမဲ့အလုပ်ဖြုတ်ခံရတဲ့ကိစ္စ AAC အလုပ်သမားကူညီ စောင့် ရှောက်ရေးကွန်ရက်အဖွဲ့ကိုလည်း လှမ်းပြီးအကူအညီတောင်းခဲ့ကြောင်း၊ AAC အဖွဲ့မှ သူတို့ကို အချက်အလက်အတိအကျနဲ့ ကိုယ့်ဘက်ကပြင်ဆင်ထားပြီး ဘောင်ထဲကနေတောင်းဆိုဖို့၊ ညှိနှိုင်းခြင်းနဲ့အရင်ဖြေရှင်းပြီး မရတော့တဲ့အခါမှ ခရိုင်အလုပ်သမားကာကွယ်စောင့်ရှောက်ရေးရုံး၊ ထိုင်း-မြန်မာသံရုံး အလုပ်သမားသံအရာရှိတွေဆီ ဆက်သွယ်တိုင်ကြားဖို့ ကနဦးအကြံပြု ထားတယ်လို့ ဆိုပါတယ်။
မနက် ၉ နာရီကျော်လောက်မှာ စက်ရုံမန်နေဂျာရောက်လာပြီး သူတို့မှာ ပစ္စည်းအော်ဒါတွေ မလာတော့ အလုပ်လည်းမရှိလို့ အလုပ်သမားဦးရေလျှော့ဖို့ အလုပ်ကြီးကြပ်သူကို ပြောခဲ့တယ်လို့ ဆိုပါတယ်။ အဲဒီနောက် အလုပ်ဖြုတ်ခံရသူတွေအကုန်လုံးကို ပြန်ခန့်မယ်လို့ ပြောလို့ ပြေလည်မှုရခဲ့ကြောင်း၊ ဒီနေ့အတွက်တော့ သူတို့အလုပ်မဆင်းဘဲ မနက်ဖြန်မှ အားလုံးပြန်ဆင်းမယ်လို့ ကိုဇင်ဖြိုးအောင်က ပြောပါတယ်။
အလုပ်ကြပ်က သူနဲ့မတည့်တဲ့သူတွေ၊ သူ့ကိုအာခံဖူးတဲ့သူတွေကို အလုပ်ဖြုတ်မယ့် စာရင်းထဲ ထည့်ပေးလိုက်တာလို့ ဆိုပါတယ်။
စက်ရုံမှာ လုပ်အားခကို တနေ့ ၃၃၀ ဘတ်၊ အချိန်ပိုလုပ်ခ ၁ နာရီ ဘတ် ၅၀၊ နားရက်ကို ထိုင်းအစိုးရရုံးပိတ်ရက်တွေအတိုင်း ရရှိပေမယ့် နေမကောင်းလို့ ဆေးခန်းသွားရင် ကန်ထရိုက် တာက ဆေးဖိုးတဝက်ပဲ ပြန်ပေးကြောင်း၊ လူမှုဖူလှုံရေးရန်ပုံငွေကိုတော့ လစဉ်ကောက်ခံလို့ အဆိုပါလူမှုဖူလှုံရေးကတ်ပြား မိမိဘာသာကိုင်ဆောင်ခွင့်ပြုဖို့လည်း ကန်ထရိုက်တာအား တောင်းဆိုထားတယ်လို့ ဆိုပါတယ်။
အဆိုပါစက်ရုံမှာ အလုပ်သမားပေါင်း ၅၀၀ ကျော်ရှိပြီး ၄၀၀ ကျော်က မြန်မာပြည်နယ်စုံက လာတဲ့ ရွှေ့ပြောင်းလုပ်သားတွေလို့ သိရပါတယ်။
