close

ထိုင်းသရုပ်ဆောင်တိုင်မိုသေဆုံးမှု

close

March 5, 2022

ထိုင်းသရုပ်ဆောင်တိုင်မိုသေဆုံးမှု မိခင်က ဘတ်သန်း ၃၀ ဖြင့် ကျေအေးဖွယ်ရှိသဖြင့် ပရိသတ်များ ဒေါသထွက်

ထိုင်းအလယ်ပိုင်း နွန်ထပူရီခရိုင် ကျောက်ဖရားမြစ်ထဲမှာ ထိုင်းနာမည်ကြီးသရုပ်ဆောင်မင်းသမီး လှေပေါ်ကပြုတ်ကျ ရေနစ်သေဆုံးရတာနဲ့ပတ်သက်လို့ မိခင်ဖြစ်သူက ဘတ်သန်းပေါင်း ၃၀ ရရင် အမှုကျေအေးမယ့်အခြေအနေရှိတာကြောင့် အနုပညာအသိုင်းအဝိုင်းမှာကော ပရိသတ်တွေကပါ သူ့မိခင်ကို ဒေါသထွက်နေကြပါတယ်။ 

တိုင်မိုရဲ့မိခင်ဖြစ်သူ ဖနိဒါဆီရယုဒ်ယိုးထင်းဟာ  မတ် ၄ ရက်က  ချနယ်လ် ၃ ထိုင်း တီဗွီအင်တာဗျူးတစ်ခုမှာ -  သမီးနဲ့အတူလှေပေါ်ပါလာတဲ့ လှေပိုင်ရှင်သူဌေးက  သူ့ကို နစ်နာကြေးနဲ့ပတ်သက်လို့ မေးမြန်းခဲ့ကြောင်း ၊ သူကလည်း သမီးသာ မသေဘူးဆိုရင် နောက်ထပ်နှစ်ပေါင်း ၃၀ အထိ မိခင်ကို ရှာဖွေလုပ်ကျွေးနိုင်မှာဖြစ်ပြီး သမီးဝင်ငွေက ၁ နှစ်ကို ဘတ် ၁ သန်းလောက်ရှိတဲ့အတွက် ဘတ်သန်း ၃၀ လောက်အဆိုပြုခဲ့တယ်လို့ ပြောပါတယ်။ 

လှေပိုင်ရှင်သူဌေးက ပေးနိုင်မယ့်အခြေအနေရှိပြီး လှေပေါ်ပါလာတဲ့တခြားသူတွေဆီကလည်း နစ်နာကြေး ရရင်ယူမှာဖြစ်ကြောင်း ၊ သူ့ကိုယ်ရံတော် ကသစ် ကတော့ တတ်နိုင်မယ့်ပုံမရှိသလို ပြောကြားသွားတာပါ။ 

ဒါ့အပြင်  ဒီအမှုမှာ လိုင်စင်သက်တမ်းကိုလှေအသုံးပြုမှု၊ လိုင်စင်မရှိဘဲလှေမောင်းမှုနဲ့ အရေးယူခံ ထားရတဲ့ လှေပိုင်ရှင်သူဌေးနဲ့ ရောဘတ် ဆိုသူ အမျိုးသား ၂ ဦးကို  တိုင်မိုရဲ့မိခင်က စိတ်ရင်းစေ တနာကောင်းသူ၊ ဆက်ဆံရေးကောင်းသူ၊ သမီးဆုံးတဲ့ကိစ္စ ကောင်းစွာဝန်ချတောင်းပန်ပြီး သူ့ကိုလည်းအမေတယောက်လို ကြည့်ရှုစောင့်ရှောက်မယ်လို့ ပြောတဲ့အတွက် သူတို့ ၂ ယောက်လုံးကို ၁၀၀ ရာခိုင်နှုန်းခွင့်လွှတ်တယ်လို့ ပြောခဲ့ပါတယ်။ 

ဒါပေမဲ့ နောက်ထပ်လှေပေါ်ပါတဲ့ အမျိုးသမီး ၂ ဦးနဲ့ တိုင်မိုရဲ့အမှုမှာတောက်လျှောက်လိုက်ပါ ဆောင်ရွက်နေတဲ့  တိုင်မိုရဲ့ အသုဘအခမ်းအနားဖြစ်မြောက်ရေး ဆောင်ရွက်နေတဲ့ ဟစ်ပိုနဲ့ အဲင်နာ တို့ ၂ ယောက်ကိုတော့ ၅၀ ရာခိုင်နှုန်းသာ ခွင့်လွှတ်ကြောင်း ၊ သူတို့ဟာ မိခင်ကို ခွင့်မတောင်းဘဲ တီဗွီမှာအင်တာဗျူးဖြေခဲ့တဲ့အပြင် အဲန်နာကလည်း အသုဘအခမ်းအနားနေရာပြောင်းမယ့်ကိစ္စ လာမတိုင်ပင်လို့ အပြည့်အဝခွင့်မလွှတ်နိုင်ဘူးလို့ ပြောခဲ့တာပါ။ 

ဒီကိစ္စနဲ့ ပတ်သက်ပြီး အစီအစဉ်တင်ဆက်သူက အဲန်နာထံတိုက်ရိုက်ဖုံးခေါ်ရာမှာ အဲန်နာက သူ ငယ်ချင်းရဲ့အသုဘအလှပဆုံးဖြစ်အောင် ကြိုးစားနေကြောင်း၊ နေရာပြောင်းမယ်ဆိုတာ အချင်းချင်းတိုင်ပင်တာပဲဖြစ်ပြီး ဘယ်နေရာမှတရားဝင်မပြောခဲ့သလို ဘာလုပ်လုပ် မိခင်ရဲ့ဆုံးဖြ တ်ချက်နဲ့ပဲလုပ်တာဖြစ်တယ် ၊ နေရာပြောင်းရင်လည်း  မိခင်ဆီခွင့်တောင်းမှာပဲ၊ အခုမသေချာ တော့ မပြောသေးတာ ၊ ဒါပေမဲ့ နောက်ဆိုဘာမှဝင်မစွက်ဖက်တော့ပါဘူး၊ အသုဘကူညီရေးတွေ လည်း ရပ်လိုက်တော့မယ် ၊ အမေ့ကိုတော့ လေးစားပါတယ်လို့ ငိုယိုပြီးပြောသွားပါတယ်။

ဒါ့အပြင် တိုင်မိုမှ သူ့မွေးစားသမီး ( ကသစ်ရဲ့သမီးရင်း ) အတွက် အာမခံကြေး ၁ သန်းလုပ်ထားရာမှာ အဲဒီကလေးကို တိုင်မိုကတရားဝင်မွေးစားတာမဟုတ်ကြောင်း ၊ ကလေးက လည်း ငယ်သေးလို့  အမေ့အနေနဲ့ အမွေကိုစီမံကိုင်တွယ်ခွင့်ရှိပြီး ကလေးအရွယ်ရောက်မှ ခွဲပေး မယ်လို့ အင်တာဗျူးမှာ ပြောပါတယ်။

ဒီဖြေကြားချက်တွေအပေါ်မှာ လူမှုကွန်ရက်မှာ ထိုင်းပရိသတ်တွေက တိုင်မိုရဲ့မိခင်ဟာ သမီးအသက်ထက်ငွေပိုမက်သူလို့ ယူဆပြီး နဂိုက ကသစ်နဲ့ လှေပေါ်ပါသူတွေကို ပြစ်တင်နေရာက  သူ့အမေဘက်ကိုလှည့်သွားပြီး  ပြစ်တင်ရှုတ်ချနေကြပါတယ်။ 

ဒီကိစ္စနဲ့ပတ်သက်ပြီး သနေရှင်းသတင်းထောက်က နာမည်ရရှေ့နေတစ်ဦးကို မေးကြည့်ရာမှာတော့ တိုင်မိုမိခင်အနေနဲ့ လှေပေါ်ပါသူတွေဆီက ငွေတွေယူပြီး ဗွေမယူဘဲခွင့်လွှတ်လို့ရချင်ရပေမဲ့ ရဲ တပ်ဖွဲ့ဘက်ကတော့ အမှုမှန်ကို ဖော်ထုတ်ရမယ့်ဝတ္တရားရှိလို့ သူတို့အလုပ် သူတို့ဆက်လုပ်မှာ ဖြစ်တယ်လို့ ဆိုပါတယ်။ 

တိုင်မိုကမွေးစားသမီးကို အာမခံငွေ ၁ သန်းလွှဲတဲ့ကိစ္စဟာ ဥပဒေအရ တရားဝင်မွေးစား သမီးဖြစ်မဖြစ်နဲ့ မသက်ဆိုင်ကြောင်း ၊ အာမခံ ခံစားခွင့်ရှိသူဟာ ဆွေမျိုးတော်စပ်တာ/ သွေးသားတော်စပ်တာတွေနဲ့ မဆိုင်ဘဲ စာချုပ်ထဲမှာပါ နာမည်ပါတဲ့သူသာ ရရမှာဖြစ်တယ် ၊ တိုင်မိုရဲ့ မိခင်အနေနဲ့လည်း စွက်ဖက်ခွင့်မရှိ ၊ ခံစားခွင့်မရှိဘူးလို့  ရှေ့နေက ပြောပါတယ်။ 

မိခင်ဖြစ်သူက အင်တာဗျူးမှာခုလိုဖြေကြားတာနဲ့ပတ်သက်ပြီး တိုင်မိုရဲ့အစ်ကိုဖြစ်သူက သူ့ရဲ့လူမှု ကွန်ရက်မှာ အသည်းကွဲပုံနဲ့ ဝမ်းနည်းကြောင်းဖော်ပြခဲ့ပါတယ်။ 

တိုင်မိုရဲ့ ဖခင်နဲ့ မိခင်တို့ဟာ တိုင်မို ၃ နှစ်သမီးအရွယ်ကတည်းက အိမ်ထောင်ကွဲခဲ့ပြီး တိုင်မိုက ဖခင်ရဲ့လက်ထဲမှာကြီးပြင်းလူလားမြောက်ခဲ့တာဖြစ်ပါတယ်၊ အဖေတစ်ခု သမီးတစ်ခု ဘဝနဲ့ အလုပ်မျိုးစုံ ဘဝမျိုးစုံမှာ ပင်ပန်းစွာရှာဖွေကျွေးမွေးခဲ့ပြီး သူ့မိခင်ကတော့ သမီးနာမည်ကြီးမှ ပြန်လည်ဆက်သွယ်ကာ ဖခင်သေဆုံးတဲ့နောက် သမီးနဲ့အတူတူပြန်နေတာဖြစ်ပါတယ်။ 

မိခင်က တီဗွီအင်တာဗျုးမှာ ငွေကိစ္စပြောပြီးတဲ့နောက် လူမှုကွန်ရက်နဲ့ သတင်းဌာနတွေက သူတို့ မိခင်ဖခင်ရဲ့ အိမ်ထောင်ရေးပြဿနာ၊ တိုင်မိုရဲ့ ဖခင်အင်တာဗျူးဟောင်းတွေ ပြန်လည်ဖော်ထုတ်တင်ဆက်လာကြပါတယ်။

55 seconds Ago
Up