ထိုင်း-မြန်မာနယ်စပ် တာ့ခ်ခရိုင်၊ ဖုပ်ဖရမြို့က အသက် ၁၆ နှစ်အရွယ် မြန်မာရွှေ့ပြောင်းလုပ်သား မိန်းကလေး ၁ ဦးဟာ အလုပ်ရှင်က ၇ လ ပိတ်လှောင်ထားပြီး အဓမ္မပြုကျင့်တာ ခံခဲ့ရတယ်လို့ Matichon ထိုင်းသတင်းမှာ ဖော်ပြပါတယ်။
ကေ (အမည်လွှဲ) လို့ခေါ်တဲ့ မြန်မာမိန်းကလေးဟာ ၁၀ နှစ်ခံ တောင်ပေါ်သားကတ် ကိုင်ဆောင်ထားပြီး ပြီးခဲ့တဲ့ ၂၀၂၂ မေလ ၁ ရက်နေ့ကစလို့ ဖုပ်ဖရမြို့ ချောင့်ခက်ပ်ရပ်ကွက်ရှိ နာမည်ကြီး ကွေ့သယို (ခေါက်ဆွဲ) ဆိုင် ၁ ဆိုင်မှာ အလုပ်ဝင်လုပ်ခဲ့ပါတယ်။
အဲဒီမှာလုပ်ကိုင်စဉ် အလုပ်ရှင် အမျိုးသားက ဘယ်မှသွားခွင့်မပြုဘဲ အိမ်မှာလှောင်ထားပြီး မကြာခဏ အဓမ္မပြုကျင့်ခဲ့ကြောင်း၊ သူမဟာ ထွက်ပြေးဖို့ အကြိမ်ကြိမ်ကြိုးစားခဲ့ပြီး ဒီ ၂၀၂၃ ခုနှစ် ဖေဖော်ဝါရီလထဲမှာမှ လွတ်မြောက်လာနိုင်ခဲ့တယ်လို့ ဆိုပါတယ်။
အပြင်ရောက်ပြီးတဲ့နောက် သူမက ဖုပ်ဖရမြို့နယ်ရဲစခန်းမှာ သွားရောက်တိုင်တန်းထားခဲ့ကြောင်း၊ ဒါကို အလုပ်ရှင်က သိသွားပြီးတဲ့နောက် အမှုပြန်ရုပ်သိမ်းဖို့ ကြားလူကနေတဆင့် ဘတ်ငွေ ၈ သောင်းနဲ့တကြိမ်၊ ၁ သိန်းနဲ့ ၁ ကြိမ် လာရောက် ညှိနှိုင်းခဲ့တယ်၊ ဒါပေမဲ့ မိန်းကလေးက လက်ခံလိုက်ရင် နောက်ထပ် တခြားမိန်းကလေးတွေကို သူ့လိုလုပ်မှာစိုးလို့ လက်မခံဘဲ ငြင်းခဲ့တယ်လို့ ဆိုပါတယ်။
ငွေပေးတာ လက်မခံတဲ့အတွက် အလုပ်ရှင်က သူတို့အသိ ရဲတွေနဲ့ပါ လာရောက် ခြိမ်းခြောက်ခဲ့ကြောင်း၊ ဒါကြောင့် မဲဆောက်ရှိ အလုပ်သမားကူညီရေးအဖွဲ့ ၁ ဖွဲ့နဲ့ ဆက်သွယ်မိပြီး အဆိုပါအဖွဲ့အစည်းနဲ့အတူ ပြီးခဲ့တဲ့ မေ ၉ ရက်က ဖုပ်ဖရမြို့နယ်ရဲစခန်းကို ထပ်မံတိုင်ကြားခဲ့ပါတယ်။
စခန်းမှူးကတော့ မိန်းကလေးဟာ လူငယ်ဖြစ်တဲ့အတွက် ထိရှလွယ်တဲ့အမှုဖြစ်လို့ အနည်းငယ် ကြန့်ကြာနေရကြောင်း၊ ဖြစ်စဉ်က ကြာခဲ့လို့ ဆေးစစ်ချက်တွေ ပြန်လုပ်နေရတယ်လို့ပဲ ပြန်ဖြေတယ်လို့ ဆိုပါတယ်။
အခုလို အဖွဲ့အစည်းတခုခုက ဝင်ရောက်ကိုင်တွယ်တယ် ဆိုရင်တော့ ကျူးလွန်သူ အလုပ်ရှင်ကို အရေးယူ အပြစ်ပေးနိုင်မယ်လို့ ယုံကြည်ကြောင်း သတင်းမှာ ဖော်ပြပါတယ်။
မိန်းကလေးကို အကူအညီပေးနေတဲ့ အဖွဲ့အစည်းကိုတော့ ဒီဗွီဘီက စုံစမ်းဆက်သွယ်လို့ မရသေးပါဘူး။
ကိုးကား - .msn.com
ထိုင်းနိုင်ငံအရှေ့ပိုင်း၊ ကမ္ဘောဒီးယားနယ်စပ် ဆာကယောက်မြို့ရှိ ကြက်သားစက်ရုံတခုက မြန်မာရွှေ့ပြောင်းလုပ်သား ၅၅ ယောက်ဟာ အလုပ်ရှင်က ဒေဝါလီခံရတယ်ဆိုပြီး အလုပ်နားလိုက်တဲ့အတွက် အခက်အခဲနဲ့ ကြုံတွေ့နေရပါတယ်။
သူတို့ဟာ အဆိုပါစက်ရုံမှာ လာရောက်လုပ်ကိုင်နေတာ ၄ လလောက်ပဲရှိသေးပြီး အလုပ်ရှင်က လျော်ကြေးမပေးဘဲ အလုပ်ဖြုတ်ခံလိုက်ရတာလို့ အလုပ်သမားတွေ အဆင်ပြေရေး လိုက်လံညှိနှိုင်းဆောင်ရွက်ပေးနေတဲ့ MHAC (Myanmar Humanitarian Action Center) မဟာမိတ်အဖွဲ့ စီမံအုပ်ချုပ်သူ ကိုရဲမင်းက ဒီဗွီဘီကို ပြောပါတယ်။
“သူတို့မှာ အပြစ်မရှိဘဲ အလုပ်ထုတ်ခံရတယ်ဆိုတာကို အလုပ်သမားတွေက ပြီးခဲ့တဲ့ ၂၆ ရက်နေ့က ဆက်သွယ်အကြောင်းကြားလာပါတယ်ခင်ဗျ။ အလုပ်သမားဥပဒေအရ အပြစ်မရှိဘဲ ရုတ်တရက် အလုပ်ဖြုတ်ခံရတယ်ဆိုရင် အလုပ်ရှင်က ထိုက်သင့်တဲ့ လျော်ကြေးငွေ ရရမှာဖြစ်တယ်။ ဒါပေမဲ့ သူတို့က လျော်ကြေးမရတဲ့အပြင် နောက်ထပ် အသစ်ရှာဖို့လည်း အခက်အခဲဖြစ်နေတယ်။ အဲဒါကြောင့် ကျနော်တို့က သူတို့ကို စေလွှတ်လိုက်တဲ့ မိုးမာန်အေဂျင်စီကိုရော ခရိုင်အလုပ်သမားကာကွယ်ရေးရုံးကိုပါ အကြောင်းကြားပြီး ရသင့်ရထိုက်တဲ့ အခွင့်အရေးတွေရဖို့ အလုပ်သမား သံအရာရှိဟောင်း ဦးဝေလင်းမောင် (CDM) နဲ့အတူ လိုက်လုပ်ပေးနေပါတယ်ခင်ဗျ။”
မိုးမာန်အေဂျင်စီက သူတို့အတွက် အလုပ်အကိုင်သစ် ရှာဖွေပေးနေဆဲဖြစ်ပြီး အလုပ်ရှင်ဆီကတော့ နစ်နာကြေးတွေပြန်ရဖို့ နားရက်တွေ၊ လစာနဲ့ ခံစားခွင့်တွေ ပြန်လည်တွက်ချက်နေတုန်းပဲလို့ သူက ဆက်ပြောပါတယ်။
အလုပ်ပြုတ်သွားပေမဲ့ စက်ရုံက သူတို့ကို ချက်ချင်းနှင်မထုတ်သေးဘဲ အလုပ်ရှာနေဆဲ ကာလအတောအတွင်း အရင်နေရာမှာ နေခွင့်ပြုထားလို့ တော်သေးတယ်လို့ ဆိုပါတယ်။
မြန်မာနိုင်ငံမှာ စစ်ကောင်စီက အာဏာသိမ်းပြီးတဲ့နောက်ပိုင်း ထိုင်းနိုင်ငံထဲကို တရားဝင်အနေနဲ့ရော၊ တရားမဝင်အနေနဲ့ပါ လာရောက်လုပ်ကိုင်နေတဲ့ အလုပ်သမားဦးရေတွေ နေ့စဉ်နဲ့အမျှ ပိုများလာတယ်လို့ MHAC အဖွဲ့က ပါတယ်။
အဓိကမှာ အလုပ်သမားအခွင့်အရေး ချိုးဖောက်ခံရတာ၊ MOU မှာ လက်မှတ်ထိုးခဲ့တဲ့ ကတိကဝတ်တွေ ဖောက်ဖျက်ခံရတာ၊ မြန်မာပြည်မှာတုန်းက အလုပ်ရမယ်ဆိုပြီး ပွဲစားက ငွေယူထားကာမှ ဒီရောက်တော့ အလုပ်မရှိတာ၊ စာချုပ်ထဲကအလုပ်နဲ့ တကယ်လာလုပ်ရတဲ့အလုပ် တခြားစီဖြစ်နေတာ စတဲ့အခက်အခဲတွေရှိကြောင်း၊ ဒါကြောင့် ထိုင်းကိုဝင်လာမယ့် အလုပ်သမားတွေ သေချာစိစစ်စဉ်းစားပြီးမှ ဝင်လာသင့်တယ်လို့ အကြံပြုထားပါတယ်။
