ထိုင်းနိုင်ငံက ဒီမိုကရက်ပါတီဒုဥက္ကဋ္ဌ နိုင်းပရင်းဖားနစ်ချဖတ်ဟာ အမျိုးသမီးတွေပေါ် လိင်ပိုင်းဆိုင်ရာ နှောင့်ယှက်မှု၊ အရွယ်မရောက်သေးတဲ့ မိန်းကလေးတွေပေါ် ဖြားယောင်း သွေးဆောင်မှု၊ မုဒိမ်းမှုတွေနဲ့ စွပ်စွဲခံရလို့ ပါတီကနေ နုတ်ထွက်ပြီး   အမှုရင်ဆိုင်နေရပါတယ်။ 

ထိုင်းနာမည်ကြီးနိုင်ငံရေးပါတီတစ်ခုက ထိပ်တန်းပုဂ္ဂိုလ်တစ်ဦးဟာ အသက် ၁၈ နှစ်ရွယ် မိန်းကလေး ၁ ဦးကို စားသောက်ဆိုင်မှာ ချိန်းတွေ့ပြီး အလိုမတူဘဲ ပွေ့ဖက်ကိုင်တွယ်တာ၊ လိင်ပိုင်းဆိုင်ရာ နှောင့်ယှက်မှုတွေ ပြုခဲ့ကြောင်း မိန်းကလေးနဲ့ သူ့ရဲ့ မိခင်က လာရောက်တိုင်ကြားထားတယ်လို့ ထိုင်းလူ့အခွင့်အရေးရှေ့နေ ထနိုင်းသမ့် ခေါ် ဆစ်ထားပျိန့်ဘန်ကစ်က ပြီးခဲ့တဲ့ ဧပြီ ၁၃ မှာ သူ့ရဲ့လူမှုကွန်ရက်ကနေ ထုတ်လွှင့်ခဲ့ပါတယ်။

အဆိုပါပုဂ္ဂိုလ်ရဲ့အမည်ကို ရှေ့နေက ထုတ်ဖော် ပြောကြားခြင်းမရှိပေမဲ့ နိုင်ငံရေးပါတီခေါင်းဆောင် ဂုဏ်သရေရှိလူကြီးတယောက်အနေနဲ့ ဒီလို မဖြစ်သင့်ဘူးဆိုတဲ့ ရှုထောင့်ကနေ ဝေဖန်ပြောကြားခဲ့ပါတယ်။ 

သူဟာ ဖေ့စ်ဘုတ်လိုက်ဖ်လွှင့်ပြီး ၂၄ နာရီအတွင်းမှာဘဲ နောက်ထပ် လိင်ပိုင်းဆိုင်ရာ စော်ကားခံရသူ ၆ ဦးလောက်က အဆိုပါရှေ့နေထံ  တိုင်တန်းလာကြပါတယ်။ အတိုင်ခံရသူမှာလည်း အဆိုပါနိုင်ငံရေးပါတီ ခေါင်းဆောင်ပိုင်း ဆိုတဲ့ ပုဂ္ဂိုလ်တစ်ဦးတည်း ဖြစ်နေပါတယ်။ 

ရှေ့နေက သူ့အမည်ကို ထုတ်ဖော်ပြောကြားခြင်းမရှိပေမဲ့ လူမှုကွန်ရက်က ဖြစ်နိုင်ခြေရှိသူကို ခန့်မှန်းဖော်ထုတ်ရာမှာ အဆိုပါပုဂ္ဂိုလ်ဟာ ဒီမိုကရက်ပါတီရဲ့ ဒုဥက္ကဋ္ဌလည်းဖြစ်၊ လက်ရှိ ဘန်ကောက် မြို့တော်ဝန်ရွေးကောက်ပွဲမှာ ဝင်ရောက်အရွေးခံမယ့် အသက် ၄၅ နှစ်ရွယ်ရှိ  နိုင်းပရင်းဖားနစ်ချဖတ် ဖြစ်တယ်လို့ စွပ်စွဲနေကြပါတယ်။ 

စော်ကားခံရတယ်ဆိုတဲ့ အမျိုးသမီးတွေထဲက မြို့တော်ဝန်အဖြစ် အရွေးခံမယ့်သူတစ်ဦးပါ ပါရှိပြီး သူကတော့ ရှေ့နေကိုမတိုင်ဘဲ ရဲစခန်းမှာ လွန်ခဲ့တဲ့ ၂ နှစ်က လိင်ပိုင်းဆိုင်ရာ စော်ကားခံရကြောင်း တိုင်ထားတဲ့ အမှုကိစ္စ နောက်ဆက်တွဲကို သွားမေးခဲ့တာပါ။

ရွေးကောက်ပွဲပြိုင်ဘက်မို့ တမင်သက်သက် နာမည်ဖျက်တာလားလို့ စွပ်စွဲခံရတဲ့အပေါ်မှာ သူက  ရာထူးနဲ့မဆိုင်ကြောင်း၊ အမှန်တရားကို ဖော်ထုတ်လိုတာဖြစ်ကြောင်း၊ သူ့အနေနဲ့လည်း ရွေးကောက်ပွဲ ဝင်ပြိုင်တော့မှာမဟုတ်ဘဲ မဲဆွယ်ခြင်းအလုပ်တွေလည်း ရပ်နားလိုက်ကြောင်း သတင်းထောက်တွေကို ပြောခဲ့ပါတယ်။

နိုင်းပရင်းဟာ အင်္ဂလန်နိုင်ငံမှာ ကျောင်းတက်စဉ် မိန်းကလေး ၂ ဦးကို လိင်ပိုင်းဆိုင်ရာ စော်ကားမှုနဲ့ အမှုရင်ဆိုင်ခဲ့ရကြောင်း၊ ဖခင်ရဲ့အရှိန်အဝါနဲ့ သူဟာ အခုထိ အရေးယူမခံရဘဲ လွတ်နေတဲ့ အကြောင်းလည်း လူမှုကွန်ရက်မှာ ဖော်ပြလာကြပါတယ်။ 

နိုင်းပရင်းကတော့ သူ့ကို လူမှုကွန်ရက်မှာ တိုက်ခိုက်နေတာ တွေ့ရတော့ အထိတ်တလန့်ဖြစ်ရ ကြောင်း၊ ရှေ့နေကို တိုင်တန်းထားတဲ့ မိန်းကလေးတွေနဲ့လည်း မသိကျွမ်းကြောင်း၊ သူဟာ ဒီလိုလူစား မဟုတ်လို့ တရားဥပဒေလမ်းကြောင်းကနေ ပြန်လည်ရင်ဆိုင်သွားမယ့်အကြောင်း၊ သူ့ကြောင့် ပါတီရဲ့ပုံရိပ် ထိခိုက်မှာစိုးတဲ့အတွက် ပါတီဒုဥက္ကဋ္ဌရာထူးကနေ နုတ်ထွက်ကြောင်း၊  ဘန်ကောက် မြို့တော်ဝန်ရွေးကောက်ပွဲဝင်မှု အပါအဝင် ပါတီရဲ့ တခြားလုပ်ငန်းတာဝန် အရပ်ရပ်ကနေ ရပ်နားလိုက်ကြောင်း ဧပြီ ၁၄ ရက်နေ့က သတင်းစာရှင်းလင်း ပြောကြားလိုက်ပါတယ်။ 

ဘန်ကောက်ရဲစခန်းကတော့ သူ့ကို လိင်ပိုင်းဆိုင်ရာနှောင့်ယှက်မှု၊ အရွယ်မရောက်သေးတဲ့ မိန်းကလေးတွေပေါ် ဖြားယောင်းသွေးဆောင်မှု၊ မုဒိမ်းမှုတွေနဲ့ အရေးယူထားပြီး လောလောဆယ် သူဟာ နိုင်ငံခြားထွက်ခွာခြင်းမပြုရ ဆိုတဲ့ ခံဝန်ချက်နဲ့ ပြင်ပကနေ အမှုရင်ဆိုင်ဖို့ အာမခံကြေး ၇ သိန်းနဲ့ လွတ်မြောက်နေပါတယ်။ 

ဧပြီ ၁၈ ရက်နေ့ထိ သူ့ရဲ့စော်ကားမှုကို ခံခဲ့ရကြောင်း တိုင်ကြားထားသူ ၁၄ ဦးရှိသွားပြီဖြစ်ပြီး တရားဝင် မတိုင်ကြားတာတွေနဲ့ပါ ထည့်တွက်ရင် ၂၀ လောက်ရှိမယ်။ ဒီအမှုတွေထဲမှာ လွန်ခဲ့တဲ့ ၅ နှစ်ကျော်က ဖြစ်ပျက်ခဲ့တာတွေလည်း ပါတယ်။ ခံရသူတွေဟာ ကျူးလွန်သူရဲ့ အရှိန်အဝါ၊ ခြိမ်းခြောက်ခံရမှုနဲ့ အရှက်ရမှာစိုးလို့ မတိုင်တန်းရဲတာတွေလည်း ရှိတယ်လို့ ရှေ့နေ ထနိုင်းသမ့်က ပြောပါတယ်။

သူ့အနေနဲ့ ကျူးလွန်သူရဲ့ ရာထူးအရှိန်အဝါ၊ ချမ်းသာကြွယ်ဝမှုနဲ့ ခြိမ်းခြောက်ခံရတာတွေကို ဂရုစိုက်မှာမဟုတ်ဘဲ နစ်နာသူတွေဘက်ကနေ အမှန်တရားကို ဦးတည်ဆောင်ရွက်သွားမယ်လို့ ရှေ့နေက ပြောပါတယ်။

ဒီကိစ္စနဲ့ပတ်သက်ပြီး ထိုင်းဒုဝန်ကြီးချုပ်လည်းဖြစ်၊ ဒီမိုကရက်ပါတီဥက္ကဋ္ဌလည်း ဖြစ်တဲ့ နိုင်းကျူရင်းရတ်စနဝိဆစ်က ပါတီရဲ့မူဝါဒမှာ အမျိုးသမီးနဲ့ကလေးသူငယ်အခွင့်အရေးကို ကာကွယ်ဖို့၊ လိင်ကွဲပြားမှုအပေါ် မူတည်ပြီး ခွဲခြားဆက်ဆံခြင်း၊ အကြမ်းဖက်ခြင်း၊ စော်ကားခြင်းတွေ ဆန့်ကျင်ကြောင်း ချမှတ်ထားကြောင်း၊ ဒီဖြစ်ရပ်ဟာ ပါတီရဲ့ ပုံရိပ်အပေါ် များစွာသက်ရောက်မှုရှိပြီး လွန်စွာဝမ်းနည်းရပါကြောင်း၊ နစ်နာသူများအား တောင်းပန်ကြောင်း ဒီကနေ့ မနက်မှာ သတင်းစာ ရှင်းလင်းပြောကြားပါတယ်။

နိုင်းပရင်းရဲ့ အမှုကိစ္စအဆင့်တိုင်းကို ပါတီအနေနဲ့ လုံးဝ ဝင်ရောက်စွက်ဖက်မှာ မဟုတ်ဘဲ ပြည်သူတွေ ယုံကြည်အားထားတဲ့ တရားဥပဒေနဲ့ တာဝန်ရှိသူတွေ ဆောင်ရွက်ချက်အတိုင်းသာ ဖြစ်ကြောင်း၊ နိုင်းပရင်းသည် ပါတီမှ နုတ်ထွက်သွားပေမဲ့ ပါတီအနေနဲ့ ဒီကိစ္စကို လျစ်လျူရှုနေမှာ မဟုတ်ဘဲ အမှန်တရားနဲ့ နစ်နာသူတွေကို ပေးလျော်ဖို့ အရေးပေါ်ကော်မတီတရပ်ဖွဲ့ပြီး စုံစမ်းဖော်ထုတ် အရေးယူသွားမှာ ဖြစ်ကြောင်း၊ နောက်နောင် ဒီလိုဖြစ်ရပ်တွေ မပေါ်ပေါက်ဖို့ ပါတီဝင်ဖြစ်ခြင်းဆိုင်ရာ စည်းကမ်းချက် ၂၁ ချက်ကို ပြန်လည်သုံးသပ်ပြင်ဆင်သွားမယ်လို့ ပါတီဥက္ကဋ္ဌက ပြောပါတယ်။

သူ့အနေနဲ့ ပါတီခေါင်းဆောင်အဖြစ်ကနေ နုတ်ထွက်ခြင်းမပြုတာကတော့ ဖြစ်လာတဲ့ ပြဿနာအပေါ် တာဝန်ယူမှု၊ တာဝန်ခံမှုနဲ့ ဆက်လက်ဖြေရှင်းသွားဖို့ ဖြစ်တယ်လို့ သတင်းထောက်တွေကို ပြောပါတယ်။ 

ကိုးကား-Thairath