စစ်ကိုင်းတိုင်း၊ ကသာခရိုင်၊ ထီးချိုင့်မြို့နယ်မှာ ပြည်သူ့ကာကွယ်ရေးတပ်ဖွဲ့ (HPDF) နဲ့ မဟာမိတ်တပ်ဖြစ်တဲ့ ကေအိုင်အေတို့ ပူးပေါင်းပြီး တိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၁၄ ဦးလောက် ကျဆုံးသွားတယ်လို့ သိရပါတယ်။
ထီးချိုင့်မြို့နယ်၊ မော်ကွန်းတောင်ရိုး လမ်းပိုင်းမှာ စစ်ကောင်စီတပ်တွေ စီးလာတဲ့ မော်တော်ကား ၃ စီးကို ဇွန်လ ၂၆ ရက်နေ့ ညနေ ၃ နာရီလောက်မှာ ဝင်ရောက်တိုက်ခိုက်ခဲ့ကြတယ်လို့ ပြည်သူ့ကာကွယ်ရေးတပ်ဖွဲ့ (ထီးချိုင့်မြို့) ရဲ့ ဇွန်လ ၂၇ ရက်နေ့ ထုတ်ပြန်ချက်မှာ ပါရှိပါတယ်။
HPDF နဲ့ ကေအိုင်အေ ဘက်က အထိအခိုက် အကျအဆုံး လုံးဝမရှိခဲ့ဘဲ စစ်ကောင်စီတပ်ဖွဲ့ဘက်ကတော့ ၁၄ ဦးထက်မနည်း ကျဆုံးကာ ၇ ဦးနဲ့ အထက် ဒဏ်ရာရရှိသွားတယ်လို့ ဆိုပါတယ်။
စစ်ကိုင်းတိုင်း ကသာခရိုင်အတွင်းမှာ အခု လပိုင်းအတွင်း စစ်ကောင်စီတပ်တွေဟာ လူနေထိုင်ရာနေရာတွေကို ဝင်ရောက်ပစ်ခတ်နေတယ်လို့ သိရပါတယ်။
ဓာတ်ပုံ -PDF (ထီးချိုင့်မြို့)
