မကွေးတိုင်း ထီးလင်းမြို့နယ်၊ အကြည်ဘန်းရွာကို မေ ၆ ရက် မနက်မှာ စစ်ကောင်စီ စစ်ကြောင်းက မီးရှို့ဖျက်ဆီးခဲ့တာကြောင့် ရွာလုံးကျွတ်နီးပါး မီးလောင်ဆုံးရှုံးကာ ပြည်သူတချို့ပိတ်မိပြီး ဖမ်းဆီးခံရတာတွေလည်း ရှိနိုင်တယ်လို့ ဒေသခံတွေက ပြောပါတယ်။

အောင်းရွာဘက်ကနေ အကြည်ဘန်းရွာကို ဒီနေ့ မနက် ထွက်လာတဲ့ စစ်ကောင်စီစစ်ကြောင်းက မီးရှို့ဖျက်ဆီးခဲ့တာကြောင့် ရွာလုံးကျွတ်နီးပါး မီးလောင်ဆုံးရှုံးခဲ့တယ်လို့ ထီးလင်းမြို့နယ် ဒေသခံ တဦ်က ပြောပါတယ်။

“အဲဒီရွာမှာ အိမ်ခြေ ၁၅၀ လောက်ရှိပြီး စစ်ကောင်စီတပ်သားတွေ မီးရှို့ဖျက်ဆီးလို့ ဘုန်းကြီး ကျောင်းအပါဝင် နေအိမ်အဆောက်ဦ ၃ လုံးလောက်ပဲ ကျန်တယ်လို့ သတင်းရတယ်။ ပြည်သူတွေ ပိတ်မိတာတွေလည်းများတယ်။ ဖမ်းဆီးခံရတာတွေလည်းရှိမယ်။”

အဲဒီကျေးရွာကို ပထမဆုံးအကြိမ် စစ်ကောင်စီ စစ်ကြောင်းထိုးခဲ့တာဖြစ်ပြီး မေ ၄ ရက်က အောင်းကျေးရွာနားမှာ ချုံခိုတိုက်ခိုက်ခဲ့တာကြောင့် တောင်လှန်ရေးတပ်ဖွဲ့တွေ အဲဒီရွာဘက်ကို ဆုတ်သွားတယ်လို့ထင်ပြီး မေ ၅ ရက် ည ၁၂ နာရီလောက်မှာ ညောင်ရွာကနေတဆင့် မေ ၆ ရက် မနက်မှာ အကြည်ဘန်းရွာဘက်ကို စစ်ကြောင်းထိုးတာလို့ ဆိုပါတယ်။

ရွာသားတဦးက “အကြည်ဘန်းရွာက သက်ကြီးပိုင်းအဘိုးအိုတယောက် သေဆုံးသွားလို့ အသုဘ ချနေတဲ့အချိန်မှာ စစ်ကြောင်းထိုးတာ။ အဲဒီ အသုဘတောင်သင်္ချိုင်းကို မပို့နိုင်ခဲ့ဘဲ ထွက်ပြေးခဲ့ ကြတာ။ ဘာပစ္စည်းမှ ယူချိန်မရလိုက်ဘဲ ထွက်ပြေးကြရတာ” လို့ ပြောပါတယ်။

စစ်ကောင်စီစစ်ကြောင်းက အလယ်ဘန်းရွာကို ဝင်နေပြီလို့ သတင်းရပြီး အကြည်ဘန်းရွာနား မှာလည်း ကင်းပုန်းတွေ ချထားလို့ နယ်မြေရှင်းလင်းရေး မလုပ်နိုင်သေးသလို ဆက်သွယ်ရေး ဖုန်းလိုင်းတွေ ပြတ်တောက်နေလို့ ပျက်စီဆုံးရှုံးမှုနဲ့ ပြည်သူတွေ ဖမ်းဆီးခံရတဲ့ အခြေနေတွေကို အတိကျ အတည်မပြုနိုင်သေးဘူးလို့  ဒေသကာကွယ်ရေးအဖွဲ့ဝင်တဦးက ပြောပါတယ်။

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသ မီးလောင်ကျွန်းရွာကို မတ် ၁၉ ရက် မနက်မှာ စစ်ကောင်စီတပ်က ဝင်ရောက်ကာ ဒေသခံ ၁၅ ယောက်ကို ဖမ်းဆီးပြီး ရွာမီးရှို့ခဲ့တယ်လို့  ဒေသခံတွေက ပြောပါတယ်။

ဒေသခံ တဦးက "ဖမ်းခံထားရတာတော့ ၁၅ ယောက်လောက်ရှိတယ်။ ထွက်ပြေးကြတာတွေလည်း ရှိတယ်။ အဲဒီထဲက တယောက်က ပြန်ဖမ်းမိပြီး လက်နှစ်ဖက် ကျည်ထိထားတယ်။ သွေးထွက်လွန်မှာစိုးလို့ လွှတ်ပေးဖို့ တောင်းပန်မှ လွှတ်ပေးလိုက်တာ။ ခုတော့ ဆေးကု နေတယ်"လို့ ပြောပါတယ်။ 

လတ်တလော ဒေသခံ ၁၅ ယောက် ဝန်းကျင် ဖမ်းဆီးခံထားရဆဲဖြစ်ပြီး ထွက်ပြေးတာကြောင့် ပစ်ခတ်ခံထားရသူတွေလည်း ရှိတယ်လို့ သိရပါတယ်။

မီးလောင်ကျွန်းရွာက နေအိမ်တွေ မီးရှိုခံထားရပြီး ရွာတွင် စစ်တပ် ရှိနေတာကြောင့် မီးလောင်ပျက်စီးတဲ့အခြေအနေကို မသိရသေးဘူးလို့ ဆိုပါတယ်။

မကွေးတိုင်း ထီးလင်းမြို့နယ်မှာလည်း မတ် ၁၆ ရက်နဲ့ ၁၈ ရက်တွေမှာ စစ်ကောင်စီစစ်ကြောင်းက သေနတ်နဲ့ ပစ်သတ်ခဲ့လို့ စိတ်ရောဂါဝေဒနါရှင် ၂ ယောက်အပါဝင်  ၄ ယောက် သေဆုံးခဲ့တယ်လို့ ဒေသခံတွေဆီကနေ သိရပါတယ်။

ထိန်တိုင်းရွာဘက်ကို အင်အား ၂၀၀ ကျော်လောက်ပါတဲ့ စစ်ကောင်စီစစ်ကြောင်းက မတ် ၁၆ ရက် ညနေ ၄ နာရီကျော်လောက်မှာ ထန်းလှီးပြီးပြန်လာတဲ့ အသက် ၇၀ အရွယ် ဦးကားကျော်နဲ့ စိတ်မနှံ့တဲ့ အသက် ၅၃ နှစ်အရွယ် ဦးသန်းထွေးတို့ကို သေနတ်နဲ့ ပစ်သတ်ခဲ့ကြတယ်လို့ ထိန်တိုင်းကျေးရွာ ဒေသခံတယောက်က ပြောပါတယ်။

ဒါ့အပြင် အဲဒီစစ်ကြောင်းက မတ် ၁၈ ရက် မွန်းလွဲ ၂ နာရီလောက်မှာ အသက် ၄၀ အရွယ် စိတ်ဝေဒနာရှင် ကိုသန်းမင်းအောင်နဲ့ ညနေ ၄ နာရီလောက်မှာတောထဲမှာနေတဲ့ အသက် ၄၀ အရွယ် ဦးကိုတင်ကို ကြိုးတွေနဲ့တုတ်ပြီး သေနတ်နဲ့ ပစ်သတ်သွားကြတယ်လို့ ဆိုပါတယ်။

ဒေသခံ တဦးက “ထိန်တိုင်းရွာက ဦးသန်းထွေးကိုတော့ ကားလမ်းဘေးက ရေကန်မှာ တိုက်ပွဲအတွင်းမှာ သေဆုံးခဲ့ တဲ့ စစ်သား အလောင်းနဲ့ ခေါင်းပြန်ဖင်ပြန်မြုပ်ထားခဲ့တာ။ ဦးကားကျော်ရဲ့ အလောင်းကိုတော့ ထိန်တိုင်းရွာအဝင် လမ်းခွဲက ချောင်စပ်နားမှာတွေ့ရှိခဲ့တာ”လို့ ပြောပါတယ်။

ဆေးမင်းတောရွာက ကိုသန်းမင်းအောင်ရဲ့ အလောင်းကိုတော့ ဆေးရုံနဲ့ ရွာကြားမှာတွေ့ရှိပြီး ကိုဘိုတင်ရဲ့အလောင်းကိုတော့ ဆေးမင်းတောရွာ အနောက်ဘက်နားက သူ့ရဲ့ ယာခင်းထဲမှာ တွေ့ရှိခဲ့တာလို့ ဆိုပါတယ်။

ထီးလင်းမြို့နယ်မှာ မတ် ၁၆ ရက်ကနေ ၁၈ ရက်အထိ စစ်ကောင်စီစစ်ကြောင်းနဲ့ ဒေသကာကွယ်ရေးပူးပေါင်းတပ်ဖွဲ့တွေ တိုက်ပွဲဖြစ်ပွားပြီး စစ်ကောင်စီဘက်က ၄၀ ကျော်လောက် သေဆုံးကာ ၃၀ ထက်မနည်း ဒဏ်ရာရရှိခဲ့တယ်လို့ YRA-ထီးလင်းက သိရပါတယ်။

အဆိုပါ ဖမ်းဆီးသတ်ဖြတ်မှုတွေနဲ့ ပတ်သက်ပြီး စစ်ကောင်စီဘက်ကိုတော့ ဆက်သွယ် မေးမြန်းနိုင်ခြင်းမရှိသေးပါဘူး။