PDF ဂိမ်းကစားရင် အရေးယူမယ်လို့ စစ်ကောင်စီအကြမ်းဖက်အဖွဲ့ကထုတ်ပြန်ထားတာဟာ ပြည်သူလူထုကို ခြောက်လှန့်ဖို့ သက်သက်ဖြစ်ပြီး  ဂိမ်းဆက်လက်ကစားကြရင်း  ထောက်ပို့လုပ်တာကို မရပ်တန့်ကြဖို့  ပြည်သူတွေ အချင်းချင်း တိုက်တွန်းထားပါတယ်။

ထောက်ပို့ ချန်နယ်တခုဖြစ်တဲ့ ပဒေသာပင်ဦးဆောင်သူ ကိုပဒေသာက “ခေတ်သစ်နည်းပညာတွေနဲ့ တော်လှန်ရေးကို ထောက်ပံ့ဖို့ လူငယ်တွေကြိုးစားတဲ့အခါမှာ  ဂိမ်းကစားရုံ၊ ကလစ် လုပ်ပေးရုံနဲ့ တော်လှန်ရေးအဖွဲ့တွေဆီ ဝင်ငွေတွေ စီးဆင်းနေတာပါ။ လစဉ် များပြားတဲ့ ဝင်ငွေတွေကြောင့် စစ်ကောင်စီက တော်လှန်ရေးကို ထောက်ပံ့ဖို့ တီထွင်ဖန်တီးထားတဲ့ PDF game တွေ ထောက်ပို့ အက်ပလီ ကေးရှင်းတွေ အသုံးပြုတဲ့ပြည်သူတွေကို ဥပဒေအရ အရေးယူမယ်လို့ အကြိမ်ကြိမ်ထုတ်ပြန် ကြေညာနေတာပါ၊ ဒီလိုကြေညာတာက စစ်ကောင်စီရဲ့ ခြိမ်းခြောက်မှု သက်သက်သာဖြစ်ပြီး ပြည်တွင်းက ထောက်ပို့တွေအနေနဲ့ လုံခြုံတဲ့ နည်းလမ်းတွေကြိုတင်ပြင်ဆင်ပြီး ဆက်လက်ထောက်ပို့ပေးကြပါ”လို့ ပြောပါတယ်။

PDF ဂိမ်းကစားရင် အရေးယူမယ်လို့ စစ်ကောင်စီက နေ့စဉ်သတင်းစာတွေကနေ ထုတ်ပြန်ကြေညာနေတာဖြစ်ပြီး Click app တွေကနေရတဲ့ တော်လှန်ရေးအဖွဲ့တွေရဲ့ ဝင်ငွေလမ်းကြောင်းကို ဖြတ်တောက်ချင်လို့ လုပ်ဆောင်တာလို့လည်းဆိုပါတယ်။

ကိုပဒေသာက “ဒီကနေရတဲ့ ဝင်ငွေက များတယ်ပေါ့နော်။ လစဉ် လတိုင်းမှာ ဒီ PDF game အပါအဝင် တခြားသော ချန်နယ်တွေ တခြားသော အက်ပလီကေးရှင်းတွေက ရသောဝင်ငွေက ပမာဏများတယ်။ လစဉ်လည်းရနေတာဖြစ်တယ်။ ပြီးတော့ ဘယ်လိုမှ trace လိုက်လို့မရဘူးပေါ့နော်။ နောက်တခုကတော့ လူထုကို အကြောက်တရားသွင်းတာပေါ့နော် ဒီလို ကြေညာချက်မထုတ်လည်း ကျနော်တို့ကို သူတို့ စိတ်ရှိသလို သူတို့ လုပ်ချင်သလို လုပ်မှာပဲ။ ဥပဒေဆို တာ မသိဘူး။ တရားမျှတမှုဆိုတာ မသိဘူး ကြေညာချက်ထုတ်တယ်ဆိုတာ ရှင်းရှင်းလေး ကျနော်တို့ကို ကြောက်အောင်ခြောက်တာပဲ။ ဒီလို အကြောက်တရားပေးနေတဲ့သူတွေကို ပြုတ်ကျသွားတဲ့အထိ ကျနော်တို့စွမ်းဆောင်ရမယ်။ ဒါမှပဲ အကြောက်တရား ကင်းကင်းနဲ့ကျနော်တို့ နေနိုင်မှာ”လို့ ပြောပါတယ်။

၂၀၂၂ ခုနှစ်တုန်းကလည်း အခုလို နည်းတူ ထုတ်ပြန်ကြေညာချက်တွေ ထုတ်ပြန်ခဲ့ပေမဲ့ ဂိမ်းတွေ အက်ပလီကေးရှင်းတွေကရတဲ့ ထောက်ပို့ ငွေကြေးစီးဆင်းမှုက ရပ်တန့်သွားတာမျိုးမရှိခဲ့ပါဘူး။

ပြည်တွင်းမှာ အကြောင်းပြချက်မျိုးစုံနဲ့ ဖမ်းဆီးတာတွေရှိနေပေမယ့်လည်း ထောက်ပို့အလုပ်တွေ ရပ်မသွားဖို့ကို အစစ်အဆေး အဖမ်းအဆီးတွေများနေတဲ့ကြားက ထောက်ပို့လုပ်ငန်းတွေ လုပ်ကိုင်နေတဲ့ မန္တလေးက ပြည်သူတစ်ယောက်က ပြောပါတယ်။

“သိပ်ပြီးတော့ ဂရုစိုက်စရာမလိုဘူးလို့ ထင်ပါတယ်။ ထုတ်ပြန်ချက်ထုတ်တာနဲ့ပဲ ထောက်ပို့ ကလစ်တာကို ရပ်မသွားစေချင်ဘူးပေါ့နော်။ ဒါကြောင့် စိုးရိမ်ပြီးတော့ ရပ်လိုက်မယ်ဆိုရင် ကျမတို့ အကျဉ်းထောင်တွေထဲမှာ ရောက်နေကြတဲ့ အိုးဘိုထဲမှာပဲဖြစ်ဖြစ် တောထဲမှာပဲဖြစ်ဖြစ် ရောက်နေကြတဲ့ ကျမတို့ သူငယ်ချင်းတွေ ရှိတယ်ပေါ့နော်။ အဲ့လိုလူတွေရဲ့ မျက်နှာကိုပြန်ပြီးတော့ မြင်ယောင်ပေးပါ။ အဲတာတွေ မြင်ပြီးတော့ ကလစ်ကာတွေကို ရပ်မသွားစေချင်ဘူး။ ဒါက ကျမတို့ ထောက်ပို့တွေအတွက် safe အဖြစ်ဆုံး ထောက်ပို့နည်းဆိုတော့ဒီကလစ်ကာနည်းနဲ့ပဲ စစ်အာဏာရှင်ပြုတ်ကျရေးကို တက်နိုင်သမျှ ပါဝင်သွားစေချင်တယ်။ ထုတ်ပြန်ချက်ကြောင့် ရပ်သွားတာမျိုးတော့ မဖြစ်စေချင်ဘူး။”

ပြည်တွင်းက ကလစ်လုပ်သူတွေအနေနဲ့ လုံခြုံမှုအားနည်းနေတဲ့ကြားက ထောက်ပို့လုပ်ငန်းတွေလုပ်ကိုင်နေတဲ့ အချိန် ပြည်ပက ကလစ်ကာတွေကလည်း အခုထက်ပို တော်လှန်ရေးထောက်ပို့ လုပ်ငန်းတွေမှာ အားစိုက် ပေးဖို့ကို ပြည်ပရောက် မြန်မာနိုင်ငံသားတစ်ယောက်က လည်း ပြောပါတယ်။

“အခု ဒီဂိမ်းကစားတဲ့အပေါ်မှာ ခြိမ်းခြောက်မယ်။ ခြောက်လှန့်မယ်။ ပြည်သူလူထုကို အကြောက်တရားနဲ့ အုပ်ချုပ်မယ်ဆိုတဲ့ အတွေးမျိုးက သူတို့ခေါင်းထဲမှာ ရှိနေတာပေါ့နော် စစ်ကောင်စီရဲ့ ဝါဒဖြန့်မီဒီယာတွေကနေတဆင့် ဒီဂိမ်းတွေကစားရင် ဖမ်းမယ်ဆိုပြီး ခြိမ်းခြောက်လိုက်တယ်ပေါ့နော်။ ဒါဆိုရင် ပြည်ပကိုရောက်နေတဲ့ ကျမတို့လို ထောက်ပို့လုပ်နေတဲ့သူတွေအတွက်ကျတော့ ဘာမှ သူတို့ လုပ်လို့ မရဘူးပေါ့နော်။ ပြည်ပမှာ ရှိနေတဲ့သူတွေက ဒီထက်ပိုပြီးတော့ ဂိမ်းတွေကလစ်တွေ ပိုပြီးတော့ ကစားပြီးတော့ တော်လှန်ရေးကို ထောက်ပံ့လို့ရတယ်ပေါ့နော်”

တော်လှန်ရေးထောက်ပို့ ချန်နယ်တွေ၊ အက်ပလီကေးရှင်းတွေ၊ ဂိမ်းတွေကနေ နှစ်စဉ် သိန်းထောင်ချီက စစ်ကောင်စီပြုတ်ကျရေးအတွက် တော်လှန်ရေးအဖွဲ့တွေဆီ စီးဝင်နေတာပါ၊ စစ်ကောင်စီရဲ့ ဧပြီ ၂၅ ရက်က ထုတ်ပြန်ကြေညာချက်ထဲမှာတော့ PDF ဂိမ်းကစားတာက လူငယ်လူရွယ်တွေက တပ်မတော်အပေါ် အထင်မြင်လွဲမှားစေတဲ့အတွက် PDF ဂိမ်းကစားရင် ဥပဒေအရ အရေးယူခံရနိုင်တယ်လို့ ပါရှိပါတယ်။

ကိုင်းဗျား…. တော်လှန်ရေးကတော့ အချိုးအကွေ့တွေ တစတစ ပေါ်လာပြန်ပါပြီ။ ရန်သူဘက်ကလည်း အပြင်းအထန် ချေမှုန်းနေပြီး တော်လှန်ရေးအဖွဲ့တွေကလည်း ရရာလက်နက်နဲ့ မီးကုန်ယမ်းကုန် တီးနေပါပြီ။ ဒီတော့ ပြောစရာလေးတွေက ငြိမ်းမောင်မှာ ရှိလာပြန်ရော။

ပထမတချက်ကတော့ ထောက်ပို့သမားစစ်စစ်တွေကို အသိပေးချင်တာပါ။ ခုချိန်မှာ တော်လှန်ရေးအနွယ်ဝင် အဖွဲ့တွေဟာ မှိုလိုပေါက်နေပါတယ်။ လုပ်တဲ့အဖွဲ့ရော၊ မလုပ်တဲ့အဖွဲ့ရော၊ လုပ်နိုင်တဲ့အဖွဲ့ရော၊ မလုပ်နိုင်တဲ့အဖွဲ့ရောပေါ့။ နွေဦးတော်လှန်ရေးရဲ့ ပကတိဘာဝ ဝင်ငွေရင်းမြစ်ဟာ လူထုပဲဖြစ်တယ်။ မပြီးမချင်း လူထုကသာ အဓိက ငွေကြေးထောက်ပံ့ရမှာပါ။ ဒီတော့ ပြည်သူ့ဘဏ္ဍာ အလကား အလေအလွင့် မရှိရလေအောင် ဂရုပြုဖို့ လိုလာပါပြီ။

ဗုဒ္ဓဘာသာ အယူအဆတခု ရှိပါတယ်။ လှူတာ ကိုယ့်စေတနာ ကိုယ်အကျိုးပေးတာပေါ့.. သူ မဟုတ်တာလုပ်ရင် သူခံပေါ့ကွယ်ဆိုတဲ့ ဘာသာရေးဆိုင်ရာ ဆန္ဒစွဲတခု ရှိပါတယ်။ တကယ်တော့ တော်လှန်ရေးဆိုတာ အဲသလို ဘာသာရေးအယူဆနဲ့ ရောယှက်ဖို့ မသင့်ပါဘူး။

တော်လှန်ရေးဆိုတာ ဖိနှိပ်သတ်ဖြတ်သူ လူတန်းစားတရပ်ကို ဖိနှိပ်ခံ သတ်ဖြတ်ခံရတဲ့ လူတန်းစားတရပ်က ဝိုင်းဝန်းပုန်ကန် သတ်ဖြတ်တော်လှန်ကြတာပါပဲ ဆိုတဲ့ သဘောတရားကို ဥက္ကဋ္ဌကြီးမော်က ပြောခဲ့ဖူးပါတယ်။

ဒါကြောင့် တော်လှန်ရေးဆိုတာ လိုအပ်ရင် လူသတ်ရတယ်။ မီးရှို့ရတယ်။ ဒီလို တော်လှန်သော ကြမ်းတမ်းသည့် လုပ်ရပ်တွေကိုတောင် လုပ်ဆောင်နေရတာဖြစ်တဲ့အတွက် ကိုယ်လှူလိုက်တဲ့ အလှူတွေ တကယ်တော်လှန်ရေးကို ဝင်ရောက်သလားဆိုတာ မဖြစ်မနေ အကဲခတ် စောင့်ကြည့်ရပါမယ်။ တကယ်လုပ်တဲ့အဖွဲ့ဆိုရင် တကယ်ထောက်ပံ့ပေးရသလို မလုပ်ဘဲ တခုခုဆို ပြည်သူ့ရှေ့ကပြေးတဲ့ အဖွဲ့တွေကိုလည်း ဝင်ငွေဖြတ်သင့်ရင် ဖြတ်ရပါမယ်။

စစ်အနိုင်တိုက်ရေးကို ဆိုလိုတာ မဟုတ်ပါဘူး။ လာသမျှ စစ်ခွေးကို အမှုန့်ကြိတ်ဖို့လည်း မပြောပါဘူး။ စစ်ကြောင်းထိုးလာပြီဆိုတာနဲ့ ပြည်သူကို အရင်ကယ်ထုတ်ရပါမယ်။ စစ်ကြောင်းက နီးလွန်းနေရင် မိုင်းဆွဲတာမျိုးနဲ့ ခေတ္တအချိန်ဆွဲပေးရပါမယ်။ ဒါမှ လူထုဟာ နွားတကောင်မကျန်၊ ထယ်သွားတခုမကျန် သယ်ဆောင်ပြီး စိတ်လုံခြုံမှုအပြည့်နဲ့ ပြေးနိုင်မှာပါ။ ကာကွယ်ရေးတပ် ဖြစ်တဲ့အတွက် ကာကွယ်ရေးဆိုတာ ဝင်ရောက်လာတဲ့ ရန်သူက အန္တရာယ်မပြုနိုင်အောင် လွတ်ရာရှောင်ရပါမယ်။

ဒုတိယအဆင့်ကမှ ကိုယ့်ကို လာမသတ်ခင် ကိုယ်က အရင်သွားသတ်တာ ဖြစ်ပါတယ်။ ဒါဟာ ပဓာနကျတဲ့ အနိမ့်ဆုံးသောတာဝန် ဖြစ်ပါတယ်။ ထိပ်တိုက်ရင်ဆိုင် တိုက်ပွဲဝင်ခြင်း၊ မဝင်ခြင်းကတော့ ကိုယ့်အဖွဲ့အနေအထားပေါ် ကြည့်ပြီး ဆက်လုပ်ရမှာပေါ့။ အခု မြေပြင်မှာ တွေ့နေရတာက တချို့အဖွဲ့တွေက တခုခုဆို ပြည်သူ့ရှေ့ကပြေးတဲ့အဖွဲ့တွေ ရှိနေပါတယ်။

လူထုဟာ ရန်သူတပ်ကို သတင်းမပေးခြင်းဖြင့်လည်း ထောက်ခံထားသလို ဆန်၊ ဆီ၊ ဆား အကုန်ထောက်ပို့ပေးထားပါတယ်။ ကျောင်းလည်း မဖွင့်ရပါဘူး။ ဆေးလည်း မကုရပါဘူး။ ပွဲတော်တွေလည်း မကျင်းပရပါဘူး။ ဥပုသ်သီလ မစောင့်ရတော့ပါဘူး။ ဒီလောက်ပေးဆပ်ပြီး အားကုန်သုံးလို့ ကူညီနေတဲ့အချိန် ရန်သူစစ်ကြောင်းဝင်တဲ့အခါ လက်နက်ကိုင်က ထိပ်ကပြေးနေရင်ဖြင့် မလိုလားအပ်တဲ့ အခင်းအကျင်းတွေ ဖြစ်လာနိုင်ပါတယ်။

လူထုဟာလည်း ရေငုံနှုတ်ပိတ်နေလို့ မရပါဘူး။ လိုအပ်လာတဲ့အခါ ထိရောက်တဲ့နေရာကိုပဲ ထောက်ပို့သင့်ပါတယ်။ ယိုပေါက်တွေများလာရင် လူထုနစ်နာပါလိမ့်မယ်။ လူထု ခြေကုန်လက်ပန်းကျတဲ့အခါ သိကြားတပ်မတော် ဝင်တိုက်လည်း မနိုင်မှာ သေချာပါတယ်။

ဒုတိယတခုက လက်နက်ကိုင်ရင်း ဖောက်ပြန်သွားတဲ့ စစ်ဘုရင်တွေပါ။ လက်နက်ကလေး ရလာတော့ ရွာထဲမှာ ဆိုင်ကယ်မောင်းတာကအစ တဗျင်းဗျင်း ဖြဲလာတော့တာပေါ့။ ကွမ်းယာဆိုင်ဝင်ပြီး အလကား ယာစားရတာနဲ့ မုန့်ဖြုတ်စားရတာနဲ့ ယိုယွင်းလာနိုင်ပါတယ်။ အဲဒီကနေအခြေခံပြီး တဆင့်တဆင့်တက်ကာ စစ်ဘုရင်တွေ ပေါ်ပေါက်လာရပါတော့တယ်။ ဒီတော့ ခေါင်းဆောင်တွေဟာ စစ်သင်တန်းမှာ တိုက်ခိုက်ရေးချည်း သင်လို့မပြီးဘဲ ညပိုင်းတွေမှာ နိုင်ငံရေးအတွေးအခေါ်နဲ့ ကျင့်ဝတ်တွေကို ရိုက်ထည့်ပေးရပါမယ်။ စစ်မှန်တဲ့ နိုင်ငံရေးအသိနဲ့ တိုက်ပွဲဝင်မှသာ မဖောက်မပြန် ရပ်တည်နိုင်မှာပါ။ တော်လှန်ရေးဟာ ဘဝပေးအသိနဲ့တင် မရတော့ပါဘူး။ နိုင်ငံရေးအသိနဲ့ တော်လှန်မှသာ မုချ အောင်ပွဲဆင်ရပါလိမ့်မယ်။

ငြိမ်းမောင်က သွေးထိုးနေတာ မဟုတ်သလို လော်ဘီလုပ်နေတာလည်း မဟုတ်ပါဘူး။ ကိုယ်တိုင်လည်း စစ်ကိုင်းမြေက လက်နက်ကိုင်တပ်ထဲမှာပါပဲ။ ကိုယ်တိုင်ရော၊ ကိုယ့်ပြည်သူတွေပါ အသက်နဲ့ရင်းရတဲ့ တော်လှန်ရေးကို လွယ်လွယ်နဲ့ မပျက်စီးစေချင်လို့ မနေနိုင်ဘဲ အဆဲခံ ရေးရပါတယ်။

လူထုဟာလည်း မျက်စိကျယ်ကျယ်နဲ့ ရန်သူကို ဆန့်ကျင်ရင်း မိတ်ဆွေထဲက ရန်သူပေါက်စတွေကိုလည်း ဉာဏ်ကျယ်ကျယ်နဲ့ ဆင်ခြင်ကြဖို့လိုပါကြောင်း ရေငုံနှုတ်ပိတ် ရပ်ကြည့်နေလို့ မရကြောင်း သတိပေးပါရစေ။

စစ်မှန်တဲ့ နိုင်ငံရေးအဘိဓမ္မာ နိုင်ငံရေးသစ္စာမရှိဘဲ လက်နက်ကိုင်ရင်ဖြင့် ယခင့်ယခင်ကလို “သေနတ်ကြီးလည်း ရှိတယ်၊ သတ်နည်း သိတယ်၊ ဟေ့… တပ်ကြီးလည်း ရှိတယ်” ဆိုတဲ့ကိန်း ဆိုက်နေဦးမှာဖြင့် မြင်ယောင်နေကြောင်းပါခင်ဗျား။

သင်ဟာလည်း ပြည်သူထဲက ထောက်ပို့ဆိုရင်ဖြင့် ကိုယ် ထောက်ပို့နေတဲ့အဖွဲ့ဟာ ဘယ်လို အဖွဲ့အစည်းလဲ ဆိုတာ ထောက်ကြည့်ဖို့တော့ လိုကြောင်းပါ ခင်ဗျာ။

ငြိမ်းမောင်(ပ.တ.တ)