မြန်မာနိုင်ငံရဲ့ ကိုဗစ်-၁၉ ကာကွယ်ဆေးထိုးအစီအစဉ်ရဲ့ အကြီးအကဲဟောင်း ပြည်သူ့ကျန်းမာရေးဦးစီးဌာန၊ ညွှန်ကြားရေးမှူး ဒေါက်တာထားထားလင်းနဲ့ ညွှန်ကြားရေးမှူးချုပ်  (ငြိမ်း) ဒေါက်တာစိုးဦးတို့ကို စစ်ကောင်စီက အဂတိလိုက်စားမှုနဲ့ စွပ်စွဲပြီး ထောင်ဒဏ်တွေ ချမှတ်လိုက်ပါတယ်။

ညွှန်ကြားရေးမှူး ဒေါက်တာထားထားလင်းကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၆ အရ အလုပ်နှင့်ထောင်ဒဏ် ၃ နှစ်နဲ့ ညွှန်ကြားရေးမှူးချုပ်(ငြိမ်း) ဒေါက်တာစိုးဦးကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၆/၆၃ အရ အလုပ်နှင့်ထောင်ဒဏ်  ၂ နှစ် ကျခံစေရန်  မန္တလေးတိုင်းဒေသကြီးတရားလွှတ်တော်က ဧပြီ ၂၀ ရက်မှာ အမိန့် ချမှတ်ခဲ့တာလို့ စစ်ကောင်စီ ပြန်ကြားရေးက သတင်းထုတ်ပြန်ပါတယ်။

ဒေါက်တာထားထားလင်းဟာ ကိုဗစ်ကာကွယ်ဆေးနဲ့ပတ်သက်တဲ့  GAVI HSS2 Grant (Global Alliance for Vaccines and Immunization-Health System Strengthening 2) ဆောင်ရွက်သော လုပ်ငန်းများနှင့်ပတ်သက်၍ စီမံချက်မန်နေဂျာအဖြစ် ဆောင်ရွက်စဉ် ညွှန်ကြားချက်ကို လိုက်နာဆောင်ရွက်ခြင်းမရှိသဖြင့် နိုင်ငံတော်ရဲ့ ဘဏ္ဍာငွေကျပ် ၁၆၁ ဒသမ ၁၉၈ သန်းကို  နစ်နာဆုံးရှုံးစေခဲ့တယ်လို့ စစ်ကောင်စီက စွပ်စွဲထားပါတယ်။

ညွှန်ကြားရေးမှူးချုပ် ဒေါက်တာစိုးဦးဟာလည်း  GAVI HSS2 Grant လုပ်ငန်း တာဝန်ယူကြီးကြပ်ပြီး စီမံခန့်ခွဲရသူဖြစ်တဲ့အလျောက် ဒေါက်တာ ထားထားလင်းရဲ့ ဆောင်ရွက်မှုမှာ ကြီးကြပ်စစ်ဆေးဖို့ စီမံခန့်ခွဲဖို့ ပျက်ကွက်ခဲ့တယ်လို့ စွပ်စွဲပြီး ထောင်ဒဏ်ချမှတ်ခဲ့တာဖြစ်ပါတယ်။

စစ်ကောင်စီရဲ့ စွပ်စွဲချက်တွေနဲ့ ပတ်သက်ပြီး  ထောင်ဒဏ်ချမှတ်ခံထားရသူတွေဘက်ကတော့ ပြန်လည်ချေပပြောဆိုနိုင်တဲ့ အခွင့်အရေးမရရှိသေးပါဘူး။

ဒေါက်တာထားထားလင်းကို ပြီးခဲ့တဲ့ ၂၀၂၁ ခုနှစ် ဇွန်လ ၁၀ ရက်နေ့က ဒဂုံမြို့နယ်မှာ စစ်ကောင်စီက ဖမ်းဆီးခဲ့ပြီး  သူဟာ အမျိုးသားညီညွတ်ရေးအစိုးရ (NUG) နဲ့ အလုပ်လုပ်နေတယ်လို့ စစ်ကောင်စီမီဒီယာတွေမှာ စွပ်စွဲဖော်ပြခဲ့ပါတယ်။

ဒေါက်တာထားထားလင်း အပါအဝင် ဆရာဝန်စုစုပေါင်း ၂၅  ယောက်တို့ဟာ ရာဇသတ်ကြီးပုဒ်မ ၅၀၅ (က)၊ မတရားသင်းဆက်သွယ်မှု ပုဒ်မ ၁၇ (၁)၊ နိုင်ငံတော်သစ္စာဖောက်ဖျက်ပုန်ကန်မှု ပုဒ်မ ၁၂၄ တို့အရ စွဲဆိုချက်တွေကို  ရင်ဆိုင်ရမယ်လို့လည်း စစ်ကောင်စီက ထုတ်ပြန်ခဲ့ပါတယ်။

ဒီနောက် ဒေါက်တာထားထားလင်း အပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ၅၆ အရ လည်းကောင်း၊ ဒေါက်တာစိုးဦးအပေါ် အဂတိလိုက်စားမှု တိုက်ဖျက်ရေး ဥပဒေပုဒ်မ ၅၆/၆၃ အရလည်းကောင်း နေပြည်တော် ဘုရားကုန်း မြို့မရဲစခန်းမှာ နိုဝင်ဘာ ၃၀ ရက် နေ့က ပထမသတင်း ပေးတိုင်ကြားချက် ဖွင့်လှစ်အမှုဖွင့် အရေးယူခဲ့တာဖြစ်ပါတယ်။

မွန်ပြည်နယ်၊ ချောင်းဆုံမြို့နယ်က CDM ဝန်ထမ်းနဲ့ အရပ်သားပြည်သူ ၁၀ ဦးထက်မနည်း ဖမ်းဆီးခံခဲ့ရပြီး သံဖြူဇရပ်မြို့နယ် နာရေးကူညီမှုအသင်းအဖွဲ့ဝင် ၁ ဦးကိုလည်း ထောင်ဒဏ် ချမှတ်လိုက်တယ်လို့  သိရပါတယ်။

စစ်ကောင်စီတပ်ဖွဲ့ဝင်တွေဟာ ချောင်းဆုံမြို့နယ် ကွမ်သဲကျေးရွာက ဒေသခံ‌တွေနဲ့ CDM ဝန်ထမ်းတွေကို ဒီဇင်ဘာ ပထမအပတ်ကစပြီး ဆက်တိုက်ဖမ်းဆီးလာခဲ့ပြီး လက်ရှိမှာတော့ ၁၀ ဦးထက်မနည်း ဖမ်းဆီးခံထားရကာ ၅၀ ကျော် ထွက်ပြေးတိမ်းရှောင်နေရတယ်လို့ တိမ်းရှောင်နေ ရတဲ့သူတွေက DVB ကို ပြောပါတယ်။

စစ်ကောင်စီကတော့ စစ်အာဏာရှင် ဆန္ဒပြပွဲပါဝင်တာ၊ စစ်ကောင်စီရဲ့ လုပ်ရပ်တွေကို ဝေဖန်တာ အပြင် ပြည်သူ့ကာကွယ်ရေးတပ်ဖွဲ့ PDF တွေနဲ့ ဆက်သွယ်နေတယ်ဆိုတဲ့ စွပ်စွဲချက်တွေနဲ့ လိုက်လံဖမ်းဆီးနေတာပါ။

ဖမ်းဆီးခံထားရတဲ့သူတွေထဲမှာတော့ အထွေထွေအုပ်ချုပ်ရေး ဦးစီးဌာနက ချောင်းဆုံမြို့နယ် CDM ဦးစီးအရာရှိ ဦးထက်ပြည့်စုံကို စစ်ကောင်စီက ၅၀၅(က)နဲ့ အမှုဖွင့်ထားက လူငယ်တချို့ ကိုတော့ စစ်ကြောရေးကို ပို့ဆောင်ထားပြီး တချို့က ဒီကနေ့အထိ မိသားစုနဲ့ အဆက်အသွယ် မရသေးဘူးလို့ ပြောပါတယ်။

စစ်ကောင်စီက ဖမ်းဆီးထားတဲ့သူတွေထဲမှာတော့ ပရဟိတလုပ်နေတဲ့သူတွေ၊ တက္ကသိုလ် ကျောင်းသားတွေ အများစုပါဝင်နေတာ ဖြစ်ပါတယ်။

ကွမ်သဲကျေးရွာဟာ NLD ပါတီကို အများစု ထောက်ခံကြတာဖြစ်ပြီး၊ လက်ရှိမှာတော့ စစ်ကောင်စီ တပ်ဖွဲ့တွေက ညတိုင်းလိုလို လာရောက် ဖမ်းဆီးတာတွေ လုပ်ဆောင်နေတဲ့အတွက် ကြောင့် ဒေသခံတွေပြည်သူတွေ စိုးရိမ်မှုတွေ မြင့်တက်နေတာ ဖြစ်ပါတယ်။

ယာယီတပ်ရင်းမှူးအပါအဝင် စစ်သား ၆ ဦးရဲ့ ရုပ်အလောင်းအား ဓာတ်ပုံရိုက်ပြီး လူမှုကွန်ရက် ဖေ့ဘွတ်ခ်စာမျက်နှာပေါ်တင်ခဲ့တဲ့ သံဖြူဇရပ်မြို့နယ်က နာရေးကူညီမှုအသင်းအဖွဲ့ဝင် ဦးကျော်ဝင်း ကို စစ်ကောင်စီက ထောင်ဒဏ် ၁ နှစ်နဲ့ ၃ လ အမိန့်ချမှတ်လိုက်တယ်လို့ မိသားစုဝင်နဲ့ နီးစပ်သူတွေက DVB ကို ပြောပါတယ်။

ကရင်အမျိုးသားအစည်းအရုံး ဒူးပလာယာခရိုင် ဝင်းရေးမြို့နယ်အတွင်းမှာ ပြီးခဲ့တဲ့ အောက်တို ၂၀ ရက်နေ့က ကရင်အမျိုးသားလွတ်မြောက်ရေးတပ်မတော် KNLAနဲ့ စစ်ကောင်စီတို့ကြား တိုက်ပွဲ တွေဖြစ်ပွားခဲ့ပြီး အဲဒီတိုက်ပွဲမှာ စစ်ကောင်စီဘက်က ယာယီတပ်ရင်းမှူး ဗိုလ်မှူး သန်းဝင်းထွန်း အပါအဝင်  ၆ ဦး သေဆုံးခဲ့တာ ဖြစ်ပါတယ်။

တိုက်ပွဲဖြစ်ပြီးနောက် စစ်ကောင်စီဘက်က အလောင်းလာမကောက်လို့ သံဖြူဇရပ် နာရေး ကူညီမှုအသင်းက သွားရောက် ကောက်ယူပေးတာ ဖြစ်ပါတယ်။ အဲဒီနောက်မှာတော့ ဦးကျော်ဝင်း က သယ်ဆောင်လာတဲ့ ရုပ်အလောင်းတွေကို သုသာန်မှာ ဓာတ်ပုံရိုက်ပြီး လူမှုကွန်ရက် ဖေ့ဘွတ်စ် စာမျက်ပေါ် တင်ခဲ့တာ ဖြစ်ပါတယ်။

စစ်ကောင်စီဘက်က သေဆုံးမှုကို ဓာတ်ပုံရိုက်ပြီး လူမှုကွန်ရက် ဖော့ဘုတ်စ်စာမျက်နှာအပေါ် တင်ခဲ့တဲ့အတွက်ကြောင့် စစ်တပ်မိသားစုဝင်တွေက ဦးကျော်ဝင်းကို အသရေဖျက်မှုနဲ့ တရားစွဲပြီးနောက် အောက်တိုဘာ နောက်ဆုံးအပတ်မှာ ထောင်ဒဏ် ၃ လ အမိန့်ချခဲ့တာပါ။

ဒါ့အပြင် စစ်ကောင်စီက ဦးကျော်ဝင်းကို ၅၀၅ (က)နဲ့ ထပ်မံ တရားစွဲဆိုခဲ့ပြီး ဒီကနေ့ ဒီဇင်ဘာ ၈ ရက်နေ့မှာ ကျိုက်မရောဗဟိုအကျဉ်းထောင်ရှိ အထူးတရားရုံးမှာ ထောင်ဒဏ် ၁ နှစ် အမိန့် ထပ်ချလိုက်တာ ဖြစ်ပါတယ်။

သံဖြူဇရပ် နာရေးကူညီမှုအသင်းအဖွဲ့ဝင် ဦးကျော်ဝင်းဟာ မွန်ပြည်နယ်မှာတော့ ဦးကျော်ဝင်း AB လို့ လူသိများပြီး လူမှုကယ်ဆယ်ရေး လုပ်ငန်းတွေကို ထဲထဲဝင်ဝင် ကူညီလုပ်ကိုင်နေသူ တစ်ဦး ဖြစ်ပါတယ်။