ဒဂုံတက္ကသိုလ် ဓာတုဗေဒ တတိယနှစ်ကျောင်းသူ မသဉ္ဇာဇော်ကို စစ်ကောင်စီက နိုဝင်ဘာ ၈ ရက် ဒီကနေ့မှာ နိုင်ငံတော်အကြည်ညိုပျက်စေမှု ရာဇသတ်ကြီး ပုဒ်မ ၁၂၄ - ခ(က)နဲ့ ထောင်ဒဏ် ၁၀ နှစ်ချမှတ်လိုက်တယ်လို့ ဒဂုံတက္ကသိုလ်ကျောင်းသားများသမဂ္ဂကနေ သိရပါတယ်။
ဒဂုံတက္ကသိုလ်ကျောင်းသားများသမဂ္ဂအဖွဲ့ဝင် မသဉ္ဇာဇော်အပါအဝင် ဒဂုံတက္ကသိုလ် ကျောင်းသား ကျောင်းသူ ၆ ယောက်ကို စက်တင်ဘာ ၁၄ ရက် ညပိုင်းက ရန်ကုန်၊ ကျောက်တံတားမြို့နယ်မှာ အကြမ်းဖက် စစ်တပ်က ဖမ်းဆီးခဲ့တာပါ။
အဲဒီ ၆ ယောက်ထဲက ဒဂုံတက္ကသိုလ်ကျောင်းသားများသမဂ္ဂ အတွင်းရေးမှူးဟောင်း ကိုစည်သူအောင်တင်(ဥပဒေ-တတိယနှစ်)ကိုလည်း ရာဇသတ်ကြီးပုဒ်မ ၁၂၄ - ခ(ဃ) ၊ ပုဒ်မ ၅၀၅ - တို့နဲ့ နိုဝင်ဘာ ၃ရက်နေ့က စစ်တရားရုံးကနေ ထောင်ဒဏ် ၁၀နှစ်ချမှတ်ခဲ့ပါတယ်။
ကျန်တဲ့ ကျောင်းသား၊ ကျောင်းသူ ၄ ယောက်ကိုတော့ ဖမ်းဆီးထားပြီး ဆက်လက် စစ်ဆေးနေဆဲ ဖြစ်ပါတယ်။
ဒဂုံတက္ကသိုလ်ကျောင်းသားများသမဂ္ဂ ဥက္ကဋ္ဌဟောင်း ကိုမင်းသုခကို စစ်ကောင်စီက ဒီနေ့ ထောင်ဒဏ် ၁၀ နှစ် ချမှတ်လိုက်ပါတယ်။
သူ့ကို ဇွန် ၅ ရက်နေ့က ဖမ်းဆီးခဲ့တာဖြစ်ပြီး ၃ လအကြာမှာ မြောက်ဥက္ကလာပမြို့နယ် တရားရုံးက အမိန့်ချမှတ်တာလို့ သမဂ္ဂက ထုတ်ပြန်ပါတယ်။
ကိုမင်းသုခဟာ ဖောက်ခွဲရေးလုပ်ငန်းတွေလုပ်ကိုင်နေသူဖြစ်တယ်ဆိုပြီး ဖမ်းဆီးခံရပြီးနောက် စစ်ကောင်စီက စွပ်စွဲထုတ်ပြန်ထားပါတယ်။
သူဟာ ဒဂုံတက္ကသိုလ် သင်္ချာအထူးပြု တတိယနှစ်ကျောင်းသားဖြစ်ပြီး ၂၀၁၄ နဲ့ ၂၀၁၆ ခုနှစ်က ဒဂုံတက္ကသိုလ်ကျောင်းသားများသမဂ္ဂ ဥက္ကဋ္ဌအဖြစ် တာဝန်ယူခဲ့ပါတယ်။
