ထောင်ဒဏ် ၂၅ နှစ် ချမှတ်ခံထားရတဲ့ မွန်ပြည်နယ် ဝန်ကြီးချုပ် ဒေါက်တာအေးဇံကို စစ်ကောင်စီက ရွေးကောက်ပွဲမှာ မလျော်သြဇာသုံးတယ်ဆိုတဲ့ စွပ်စွဲချက်နဲ့ ထောင်ဒဏ် ၂ နှစ်ထပ်မံ အမိန့်ချမှတ်လိုက်တယ်လို့ တရားရုံးနဲ့ နီးစပ်သူတွေက ဒီဗွီဘီကို ပြောပါတယ်။

ဝန်ကြီးချုပ် ဒေါက်တာအေးဇံဟာ ၂၀၂၀ အထွေထွေရွေးကောက်ပွဲမှာ မလျော်သြဇာသုံးခဲ့တယ်ဆိုတဲ့ စွပ်စွဲချက်နဲ့  စစ်ကောင်စီက ရာဇသတ်ကြီး ဥပဒေ ပုဒ်မ ၁၇၁(စ) နဲ့ အမှု ၂ မှု ဖွင့်လှစ်ထားတာပါ။

ဒီအမှုအတွက် ဝန်ကြီးချုပ် ဒေါက်တာအေးဇံကို ဒီဇင်ဘာ ၆ ရက်က အထူးတရားရုံးမှာ ရုံးထုတ်စစ်ဆေးပြီးနောက် ထောင်ဒဏ် ၂ နှစ် ထပ်မံ အမိန့်ချမှတ်ခဲ့တာပါ။

“အမှုတမှုအတွက် ထောင်ဒဏ် ၁ နှစ်စီ၊ စုစုပေါင်း ထောင်ဒဏ် ၂ နှစ် ထပ်ချတယ်။ ဝန်ကြီးချုပ်ကတော့ ဒီအမှုတွေအတွက် တရားရုံးအဆင့်ဆင့်ကို အယူခံတင်သွားမယ်လို့ ပြောတယ်” လို့ တရားရုံးနဲ့နီးစပ်သူတဦးက ပြောပါတယ်။

ထောင်ဒဏ် ၂ နှစ် ချမှတ်လိုက်တဲ့ အဲဒီအမှုတွေဟာ တရားစွဲအဖွဲ့အစည်း ခွင့်ပြုအမိန့်မပါတာကြောင့် အမှုတခုလုံးကို ချေဖျက်ကြောင်း ပြည်ထောင်စု တရားလွှတ်တော်ချုပ်ရုံးက အမိန့်ချပြီးနောက် စစ်ကောင်စီက ပြန်လည်တရားစွဲထားတဲ့ အမှုတွေလည်း ဖြစ်ပါတယ်။

မွန်ပြည်နယ် ဝန်ကြီးချုပ် ဒေါက်တာအေးဇံဟာ စစ်တပ်အာဏာသိမ်းပြီးနောက် စစ်ကောင်စီက စွဲဆိုထားတဲ့ အဂတိမှု ၉ မှုအတွက် ထောင်ဒဏ် ၂၁ နှစ် ၊ ၅၀၅(ခ) နဲ့ ထောင်ဒဏ် ၂ နှစ်၊ ပုဒ်မ ၁၃၀ (က)နဲ့ ထောင်ဒဏ် ၂ နှစ် ၊ ၁၇၁(စ) နဲ့ အမှု ၂ မှုအတွက် ထောင်ဒဏ် ၂ နှစ်၊ စုစုပေါင်း ထောင်ဒဏ် ၂၇ နှစ် အမိန့်ချမှတ်ခံထားရပါတယ်။

အသက် ၆၈ နှစ်အရွယ် ဝန်ကြီးချုပ် ဒေါက်တာအေးဇံကိုတော့ စစ်ကောင်စီက မွန်ပြည်နယ်၊ ကျိုက်မရောဗဟိုအကျဉ်းထောင်မှာ ဖမ်းဆီးချုပ်နှောင်ထားပြီး လက်ရှိမှာတော့ ကျန်းမာရေး ကောင်းမွန်နေတယ်လို့ သိရပါတယ်။

ဧရာဝတီတိုင်း၊ ဝါးခယ်မမြို့နယ်မှာ စစ်ကောင်စီက အသက်မပြည့်သေးတဲ့ ကျောင်းသားတဦးကို ဧပြီလဆန်းပိုင်းက ထောင်ဒဏ် ၂ နှစ်ပြစ်ဒဏ်ချမှတ်ခဲ့တယ်လို့ သိရပါတယ်။

စစ်အာဏာသိမ်းမှုကိုဆန့်ကျင်တဲ့ ဆန္ဒပြပွဲတွေမှာပါဝင်တယ်ဆိုတဲ့ စွပ်စွဲချက်နဲ့ ၁၀ တန်းကျောင်းသား မောင်ရဲမင်းဦးကို စစ်ကောင်စီက ဖမ်းဆီးခဲ့ပြီး ပုဒ်မ ၅၀၅ (က)နဲ့ တရားစွဲဆိုကာ ထောင်ဒဏ် ၂ နှစ်ပြစ်ဒဏ် ချမှတ်ခဲ့တာလို့ နီးစပ်သူတွေက ပြောပါတယ်။

“အသက်မပြည့်သေးတဲ့သူတွေ ထောင်ချတာတော့ မဖြစ်သင့်ဘူးပေါ့။ ဒါပေမယ့် ခုကသိတဲ့အတိုင်း စစ်တပ်က လက်နက်နဲ့အနိုင်ကျင့်နေတာ မဟုတ်လည်း ခံနေရတာ၊ အနေအထိုင်ကအစ သတိထားနေရတယ်။ သတင်းပေးလည်းကြောက်နေရတယ်၊ ဂျပန်ခေတ်ကို ပြန်ရောက်ရသလိုပဲ ခုကလေးဆိုလည်း မဟုတ်ဘဲ ခံရတာ” လို့ နီးစပ်သူတဦးက ပြောပါတယ်။

အသက် ၁၈ နှစ်မပြည့်သေးတဲ့ ၁၀ တန်းကျောင်းသား မောင်ရဲမင်းဦးကို ထောင်ဒဏ် ၂ နှစ်ချမှတ်ပြီး စစ်ကောင်စီက ငှက်အော်စမ်း လူငယ်အကျဉ်းထိန်းသိမ်းရေးစခန်းကို ပို့ဆောင်ထားတယ်လို့ ဆိုပါတယ်။

ဝါးခယ်မမြို့မှာ စစ်ကောင်စီက အာဏာသိမ်းပြီးနောက်ပိုင်း ဒေသခံပြည်သူ ၅၀ နီးပါးကို စွပ်စွဲဖမ်းဆီးထားပြီး အဲ့အထဲမှာ အသက်မပြည်သေးတဲ့သူ ၁၀ ကျော်ဝင်နေတယ်လို့ ဒေသခံတွေက ပြောပါတယ်။