ပဲခူးတိုင်းအနောက်ခြမ်း၊ ပေါင်းတည်အကျဥ်းထောင်ထဲမှာ ပုဒ်မ ၅၀၅(က)နဲ့ ဖမ်းဆီး ချုပ်နှောင်ခံနေရတဲ့ နတ်တလင်းမြို့နယ် အန်အယ်လ်ဒီပါတီ အလုပ်အမူဆောင် အမျိုးသား တယောက်ကို စစ်ကောင်စီက ထောင်ဒဏ် ၃ နှစ်ချမှတ်လိုက်ပါတယ်။
ဖမ်းဆီးထောင်ချခံရသူဟာ သာယာဝတီခရိုင်၊ နတ်တလင်းမြို့နယ် အန်အယ်လ်ဒီပါတီ အလုပ်အမူဆောင် ဦးအောင်ဆန်းလင်းဖြစ်ပြီး သူ့ကို ရုံးချိန်း ၂ ချိန်းသာစစ်ဆေးခဲ့ကာ ရှေ့နေမပါဘဲ ဒီဇင်ဘာ ၂ ရက်နေ့မှာ မိန့်ချမှတ်ခဲ့တာလို့ သူနဲ့နီးစပ်တဲ့ နတ်တလင်းမြို့ခံ တဦးက ပြောပါတယ်။
အသက်က ၄၉ နှစ်အရွယ် ဦးအောင်ဆန်းလင်းကို နိုဝင်ဘာ ၉ ရက်မှာ စစ်ကောင်စီက လာရောက်ဖမ်းဆီးခဲ့တာဖြစ်ပြီး ဖမ်းစီးစဥ်က ရိုက်နှက်စစ်ဆေးခဲ့တာကြောင့် မျက်စိ ထိခိုက် ဒဏ်ရာရသွားတယ်လို့ သိရပါတယ်။
သူနဲ့အတူ ဖမ်းဆီးခံရတဲ့ တခြားအမျိုးသားတယောက်ကိုတော့ စစ်ကောင်စီက ပြန်လွှတ်ပေးလိုက်ပြီလို့ သိရပါတယ်။
မိတ္ထီလာနည်းပညာတက္ကသိုလ်ကျောင်းသား ကိုအောင်ခန့်မင်းထိန်ကို ရာဇသတ်ကြီး ပုဒ်မ ၅၀၅(က)နဲ့ မိတ္ထီလာ အကျဉ်းထောင်တွင်း တရားရုံးကနေ နိုဝင်ဘာ ၁၅ ရက်နေ့မှာ ထောင်ဒဏ် ၃ နှစ်ချလိုက်တယ်လို့ သူ့ရဲ့ မိသားစု အသိုက်အဝန်းက သိရပါတယ်။
ကိုအောင်ခန့်မင်းထိန်ရဲ့ မိသားစုနဲ့ နီးစပ်သူ တစ်ဦးက "နည်းပညာတက္ကသိုလ်စတုတ္ထနှစ် တက်နေသူပေါ့။ မေလ ၁၆ ရက်နေ့က နေအိမ်အတွင်း ဝင်ရောက်ဖမ်းဆီးသွားတာ။ အဲဒီနောက် ပုဒ်မ ၅၀၅(က)နဲ့ အမှုဖွင့်ပြီး ထောင်သုံးနှစ် ချလိုက်တာ။ အမိန့်ချတဲ့နေ့ဟာ အချုပ်ခံထားရတာ ၆ လပြည့်တဲ့နေ့ပဲ" လို့ ပြောပါတယ်။
ကိုအောင်ခန့်မင်းထိန်ရဲ့ ဖခင်ဟာလည်း စစ်ကောင်စီတွေက လိုက်လံဖမ်းဆီးနေတာကြောင့် တိမ်းရှောင်နေရတယ် လို့ သိရပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း(AAPP)ရဲ့သတင်းထုတ်ပြန်ချက်အရ ဖေဖေါ်ဝါရီ ၁ ရက်ကနေ နိုဝင်ဘာလ ၁၆ရက် အထိ စစ်ကောင်စီက ဖမ်းဆီချုပ်နှောင်ထားတဲ့ နိုင်ငံရေးအကျဉ်းသား ၇၂၉၁ ဦးရှိနေပြီး ၂၈၉ဦးကို ထောင်ဒဏ်ချမှတ်ခံထားရတယ်လို့ သိရပါတယ်။
