စစ်ကိုင်းတိုင်း၊ ကလေးမြို့က စစ်ကောင်စီရဲ့ ဖမ်းဆီးခံထားရတဲ့ ကလေးပင်မသပိတ်အဖွဲ့ဝင် ၄ ဦးကို စစ်ကောင်စီက ရာဇသတ်ကြီးပုဒ်မ ၅၀၅(က) နဲ့ ထောင်ဒဏ် ၂ နှစ်စီ ချမှတ်လိုက်တယ်လို့ မိသားစုဝင်တွေက ဒီဗွီဘီကို ပြောပါတယ်။
အဆိုပါသပိတ်အဖွဲ့ဝင် ၄ ဦးကို မေ ၁၀ ရက် မနေ့က မြို့နယ်တရားရုံးမှာ အမိန့်ချခဲ့တာဖြစ်ပြီး ဆူပူဆန္ဒပြပွဲတွေမှာ ပါဝင်ခဲ့ကာ ပြည်သူတွေကို အကြမ်းဖက်လှုပ်ရှားမှုတွေမှာ ပါဝင်လာစေဖို့ လှုံ့ဆော်တာကြောင့် ၅၀၅(က) အရ ထောင်ဒဏ် ၂ နှစ် ချမှတ်ခဲ့တာလို့ စစ်ကောင်စီသတင်းတွေ အမြဲဖော်ပြနေတဲ့ တယ်လီဂရမ်ချန်နယ်တွေမှာ ရေးသားထားပါတယ်။
ဖမ်းဆီးခံခဲ့ရတဲ့ မိသားစုဝင်တဦးက “၄ ယောက်လုံးနဲ့ တွေ့ခွင့်ရခဲ့တယ်။ ၄ ယောက်လုံးကို အချုပ်ကနေ ထောင်ထဲပို့လိုက်ပြီ။ ကျန်တဲ့အမှုတွေနဲ့ တရားစွဲဆိုတာတော့ မရှိပါဘူး” လို့ ပြောပါတယ်။
ဧပြီ ၁၆ ရက် သင်္ကြန်အတက်နေ့က ကလေးပင်မသပိတ်အဖွဲ့ဝင် ကိုသန်းစိုးဦး၊ ကိုမျိုးကိုဝင်း၊ မနှင်းစံနဲ့ မကျင်ဒိတ်ကင်တို့ဟာ တော်လှန်သင်္ကြန်သပိတ် ပြုလုပ်စဉ် စစ်ကောင်စီပတ်ကင်းနဲ့ တွေ့ဆုံကာ ဖမ်းဆီးခံခဲ့ရတာပါ။
ကလေးမြို့ ပင်မသပိတ်ဟာ စစ်အာဏာသိမ်းပြီးချိန်ကစပြီး ပျက်ရက်မရှိ စစ်အာဏာရှင်စနစ်ကို ဆန့်ကျင်ဆန္ဒပြ တော်လှန်လာခဲ့ကြရာ ရက်ပေါင်း ၈၀၀ အထိ ဆန့်ကျင်ဆန္ဒပြခဲ့ကြတဲ့အဖွဲ့လည်း ဖြစ်ပါတယ်။
တော်လှန်လူငယ်ရဲဘော်တယောက်ဖြစ်တဲ့ ကိုဗညားစိုးထက်ကို အကြမ်းဖက်စစ်ကောင်စီက ထောင် ၁၀ နှစ် မတရား ထပ်မံချမှတ်လိုက်တာကြောင့် သူ့ကို ချမှတ်ထားတဲ့ စုစုပေါင်း ထောင်ဒဏ် ၈၄ နှစ် ထိရှိလာပြီလို့ Yangon Revolution Force – YRF က ပြောပါတယ်။
ဒီပြစ်ဒဏ်တွေဟာ အမြင့်ဆုံးပြစ်ဒဏ်ချမှတ်ထားခံရမှုတွေထဲက တခုဖြစ်ပြီးတော့ ရဲဘော် ဗညားစိုးထက်ဟာ ဒီမတိုင်ခင်ကတည်းက ထောင်ဒဏ် ၇၄ နှစ်ချမှတ်ထားခံရပြီးဖြစ်တယ်လို့ ဆိုပါတယ်။
Yangon Revolution Force – YRF ကတော့ မြေပြင်တော်လှန်ရေးအဖွဲ့တဖွဲ့အနေနဲ့ အ ကြမ်းဖက်စစ်အုပ်စုကို ဆန့်ကျင်ကာ ရှေ့တန်းကနေ ရရာနည်းလမ်းနဲ့ တော်လှန်ကမ်ပိန်း တွေ၊ မြေပြင်လူထုသပိတ်လှုပ်ရှားမှုတွေနဲ့ စဉ်ဆက်မပြတ် လှုပ်ရှားနေတဲ့ အဖွဲ့တဖွဲ့ ဖြစ် ပါတယ်။
မြန်မာနိုင်ငံမှာတော့ အကြမ်းဖက် စစ်တပ်က မတရားအာဏာသိမ်းယူထားခဲ့တဲ့ ကာလဟာ ၂ နှစ်ကျော်ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေး မတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေး ကဏ္ဍတွေ အသီးသီးမှာ အဘက်ဘက်က ကျဆင်းနေခဲ့တာ ဖြစ်ပါတယ်။
ဒါ့အပြင် အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက် သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ် ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံပြည်သူ့ကာကွယ်ရေး တပ်တွေ၊ တိုင်းရင်းသားလက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။
တဘက်မှာလည်း အာဏာသိမ်း အကြမ်းဖက်စစ်ကောင်စီက စစ်အာဏာသိမ်းမှုကို ဆန့် ကျင်ပြီး နွေဦးတော်လှန်ရေးမှာ ပါဝင်နေတဲ့ ဘယ်သူ့ကိုမဆို မတရားပုဒ်မတပ် ဖမ်းဆီးအ ရေးယူတာ၊ ညှဉ်းပန်းနှိပ်စက်သတ်ဖြတ်နေတာ ဖြစ်ပါတယ်။
အာဏာသိမ်းပြီးကတည်းကနေ ဒီကနေ့အထိ အကျဉ်းထောင်တွေမှာ ၁၇,၇၂၆ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၅,၇၂၄ ယောက်ကတော့ ထောင် ဒဏ် ချမှတ်ခံထားရတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေ အေပီပီ) က ထုတ်ပြန်ထားပါတယ်။
တော်လှန်ရေးနဲ့ ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်း သိမ်းခံနေရသူ အရေအတွက်ကတော့ ၁၁၁ ယောက် ရှိနေပြီး မျက်ကွယ် သေဒဏ်ချမှတ် ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ်ပြစ်ဒဏ်ချမှတ်ခံ ထားရတာကြောင့် သေဒဏ်ချမှတ်ခံထားရသူ စုစုပေါင်း ၁၅၃ ယောက် ရှိလာခဲ့ပြီ ဖြစ်ပါ တယ်။
ဧရာဝတီတိုင်း၊ ငပုတောမြို့နယ်၊ ငရုတ်ကောင်းမြို့ပင်လယ်ပြင်မှာ ဧပြီ ၁၉ ရက်နေ့က ဖမ်းဆီးခံခဲ့ရတဲ့ ရိုဟင်ဂျာ အယောက် ၇၀ ကို စစ်ကောင်စီလက်အောက်ခံ တရားရုံးကနေ ဧပြီ ၂၄ ရက်နေ့က ထောင်ဒဏ် ၂ နှစ်စီ ပြစ်ဒဏ်ချမှတ်လိုက်ပါတယ်။
ရခိုင်ပြည်နယ်နေ ထွက်ခွာလာတဲ့ ရိုဟင်ဂျာတွေကို စစ်ကောင်စီလက်အောက်ခံ ငပုတောမြို့နယ် တရားရုံးကနေ မှတ်ပုံတင်အက်ဥပဒေပုဒ်မ ၆၃ (က)နဲ့ ထောင်ဒဏ် ၂ နှစ်စီ ပြစ်ဒဏ်ချမှတ်ခဲ့တာလို့ ရဲတပ်ဖွဲ့နဲ့ နီးစပ်သူတွေက ပြောပါတယ်။
“ ခုက တရားရုံးတင်တာနဲ့ တန်းအမိန့်ချလိုက်တာ၊ အရင်ကဆို ရုံးချိန်း ပြန်ချိန်းတာတွေရှိတယ်၊ ခုက ဘာမှဖြေရှင်းခွင့်မပေးတော့ဘဲ တန်းချတဲ့သဘောမျိုးတော့ ဖြစ်သွားတာပေါ့။ သူတို့ကို လိုက်ပို့တဲ့ ပွဲစားနဲ့ စက်လှေသမားတွေတော့ အမိန့်မချသေးဘူး”လို့ ရဲတပ်ဖွဲ့နဲ့နီးစပ်သူတစ်ဦးက ပြောပါတယ်။
ဖမ်းဆီးခဲ့တဲ့ ရိုဟင်ဂျာတွေထဲမှာ အသက် ၁၈ နှစ်အပြည့်သေးတဲ့ အမျိုးသား ၂၆ ဦးကို ငှက်အော်စမ်းလူငယ်လေ့ကျင်ရေးစခန်းကို ပို့ဆောင်ပြီး အသက် ၇ နှစ်အောက် ကလေး ၂ ဦးကိုတော့ ပုသိမ်မြို့မှာရှိတဲ့ လူမှုဝန်ထမ်းဦးစီးဌာနကို အပ်နှံပေးခဲ့တယ်လို့ ဆိုပါတယ်။
ထောင်ဒဏ် ၂ နှစ်ချမှတ်ခံရတဲ့ ရိုဟင်ဂျာ ၄၂ ဦးကိုတော့ ဧပြီလ ၂၅ ရက်မှာ ငပုတောမြို့နယ်က နေ ပုသိမ်အကျဉ်းထောင်ကို လွှဲပြောင်းပို့ဆောင်ပေးခဲ့တယ်လို့ သိရပါတယ်။
ဖမ်းဆီးခံရတဲ့ ရိုဟင်ဂျာတွေကို ခေါ်ဆောင်လာတဲ့ ပွဲစားနဲ့ စက်လှေမောင်းသူ စုစုပေါင်း ၇ ဦး ကိုတော့ စစ်ကောင်စီလက်အောက်ခံ ရဲတပ်ဖွဲ့က လူကုန်ကူးမှုပုဒ်မနဲ့အမှုဖွင့်ပြီး စစ်ဆေးနေတယ်လို့ ရဲတပ်ဖွဲ့ကနေ သိရပါတယ်။
