မြေပြင်တော်လှန်ရေးအဖွဲ့တဖွဲ့ဖြစ်တဲ့ ရေဘဝဲ (ပြည်သူ့အကျိုးပြု လူငယ်အဖွဲ့အစည်း) က နိုင်ငံရေးအကျဉ်းသားလူငယ် ၃ ယောက် အပါအဝင် ရန်ကုန်မြို့၊ အင်းစိန်ထောင်ကနေ အကျဉ်းသား ၇၀၀ လောက် တိတ်တဆိတ် ထောင်ပြောင်းရွှေ့ခံထားရတယ်လို့ ပြောပါတယ်။

ပြောင်းရွှေ့ခံရသူတွေထဲမှာတော့ အကြမ်းဖက်စစ်ကောင်စီလက်အောက်ခံ ရန်ကုန်တိုင်း၊ လှိုင်မြို့နယ် တရားရုံးကနေ ပြီးခဲ့တဲ့ ၂၀၂၂ ခုနှစ် မတ်လကတည်းက နှစ်ရှည်ထောင်ဒဏ် ၁၃ နှစ်စီ မတရားအမိန့်ချမှတ်ခံခဲ့ရတဲ့ ရေဘဝဲ (ပြည်သူ့အကျိုးပြု လူငယ်အဖွဲ့အစည်း) က နိုင်ငံရေးအကျဥ်းသားတွေဖြစ်ကြတဲ့ အကြီးကောင် (ခ) ကျော်ဇေယျ၊ မန်းကီး (ခ) မင်းခန့်ကျော်၊ အိုဂျီ (ခ) ပိုင်ထူးခန့်တို့ ပါဝင်ပြီး သူတို့ကို ပြီးခဲ့တဲ့ ဇန်နဝါရီ ၁၄ ရက် မတိုင်ခင်ကတည်းက သရက်ထောင်ကို ရွှေ့ပြောင်းခံထားရတယ်လို့ ဆိုပါတယ်။

သက်ဆိုင်ရာ အုပ်ထိန်းသူမိသားစုဝင်တွေကို ကြိုတင်အကြောင်းကြားခြင်း လုံးဝမရှိဘဲ ဇန်နဝါရီ ၁၄ ရက် ထောင်ဝင်စာပို့တဲ့အချိန်ကျမှ ထောင်ဝန်ထမ်းတွေက မရှိဘူး၊ မသိဘူး၊ ပို့မရဘူးလို့ ဖြေကြားခဲ့တဲ့အတွက် လိုက်လံစုံစမ်းရာကနေ ခုလိုသိရှိခဲ့ရတာလို့ ရေဘဝဲ (ပြည်သူ့အကျိုးပြု လူငယ်အဖွဲ့အစည်း) က ထုတ်ပြန်ချက်မှာ ဖော်ပြပါတယ်။

အုပ်ထိန်းသူမိသားစုဝင်တွေက အခြေခံလူတန်းစားတွေ ဖြစ်တဲ့အပြင် တဦးနဲ့တဦး ဆက်သွယ်မှု အားနည်းနေတာတွေကြောင့် နိုင်/ကျဥ်း ရေဘဝဲလူငယ် ၃ ယောက်ရဲ့ အသက်အန္တရာယ်၊ အစားအသောက်၊ အနေအထိုင်၊ ကျန်းမာရေး စတာတွေကို အုပ်ထိန်းသူမိသားစုဝင်တွေနဲ့အတူ အဖွဲ့အစည်းက စိုးရိမ်ပူပန်နေတယ်လို့ ဆိုပါတယ်။

မြန်မာနိုင်ငံမှာတော့ အကြမ်းဖက်စစ်အုပ်စုက မတရားအာဏာသိမ်းယူထားတဲ့ ကာလဟာ ၂ နှစ်နီးပါးထိ ကြာမြင့်လာခဲ့ပြီဖြစ်ကာ ဒီကာလတွေအတွင်း စစ်တပ်ဟာ သူတို့ကိုဆန့်ကျင်တဲ့ ဘယ်သူ့ကိုမဆို မတရား ဖမ်းဆီးအရေးယူတာ၊ ညှဉ်းပန်းနှိပ်စက်သတ်ဖြတ်တာတွေကိုပါ ဉပဒေမဲ့ ပြောင်ပြောင်တင်းတင်း ကျူးလွန်နေတာပါ။

ကုလသမဂ္ဂ လူ့အခွင့်အရေးဆိုင်ရာရုံးကတော့ မြန်မာနိုင်ငံတဝန်း အကျဉ်းထောင်တွေမှာ ဖမ်းဆီးအကျဉ်းချထားတဲ့ နိုင်ငံရေးအကျဉ်းသားတွေအားလုံးကို ပြန်လွှတ်ပေးဖို့ စစ်ကောင်စီကို တောင်းဆိုထားပြီး ပြည်သူတွေကို ဖမ်းချုပ်ထားခြင်းမပြုဘဲ နိုင်ငံရေးမှာ လွတ်လွတ်လပ်လပ် ပါဝင်ခွင့်ပေးမှသာ မြန်မာ့ပဋိပက္ခပြေလည်ရေး အောင်မြင်စွာ ဆောင်ရွက်နိုင်မယ်လို့လည်း ဇန်နဝါရီ ၆ ရက် ရက်စွဲနဲ့ ထုတ်ပြန်ချက်မှာ ပြောလိုက်ပါတယ်။

ပြီးခဲ့တဲ့ ဇန်နဝါရီ ၄ ရက်က လွတ်လပ်ရေးနေ့အထိမ်းအမှတ် အကျဉ်းသား ၇,၀၁၂ ဦးကို စစ်ကောင်စီက ပြစ်ဒဏ်လွတ်ငြိမ်းခွင့် ပေးခဲ့ပေမဲ့ အဲဒီလို ပြန်လွတ်လာသူတွေထဲ စစ်အာဏာသိမ်းမှုအပေါ် ဆန့်ကျင်ဆန္ဒပြခဲ့လို့ ဖြိုခွင်းဖမ်းဆီးခံခဲ့ရသူတွေ အနည်းစုသာ ပါဝင်ခဲ့တာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ်ပြန်ချက်မှာတော့ အဆိုပါ လွတ်မြောက်အကျဉ်းသား ၇,၀၀၀ ကျော်ထဲမှာ နိုင်ငံရေး အကျဉ်းသား ၃၀၀ ဝန်းကျင်သာ ပါဝင်ခဲ့တယ်လို့ ဆိုပါတယ်။

နွေဦးတော်လှန်ရေးကာလအတွင်း ဒီနေ့အထိ ၁၃,၆၁၃ ယောက် ချုပ်နှောင်ခံထားရဆဲဖြစ်ပြီး အဲဒီထဲက ၂,၁၄၈ ယောက်ကတော့ ထောင်ဒဏ်ချမှတ်ခံထားရပါတယ်။

တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူ အရေတွက်ကတော့ အယောက် ၁၀၀ ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက် အပါအဝင် ၁၂၁ ယောက်ကတော့ မျက်ကွယ်ပြစ်ဒဏ် ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၄၂ ယောက် ရှိလာခဲ့ပြီ ဖြစ်ပါတယ်။

လတ်တလောအချိန်ထိ အာမခံနဲ့လွတ်မြောက်သူ ၂၄ ယောက်ရှိပြီး ပြန်လည်လွတ်မြောက်လာသူ ဦးရေကတော့ ၃,၇၅၀ ယောက် ရှိခဲ့တယ်လို့ ဆိုပါတယ်။

စစ်ကောင်စီဟာ နိုင်ငံရေးအကျဉ်းသားတွေကို အကျဉ်းထောင်နေရာတွေပြောင်းရွှေ့ပြီး စိတ်ပိုင်းဆိုင်ရာ၊ ရုပ်ပိုင်းဆိုင်ရာ နှစ်မျိုးစလုံးကို အကြမ်းဖက်နေတယ်လို့  လေ့လာစောင့်ကြည့်သူတွေက ပြောပါတယ်။ 

အောက်တိုဘာ ၈ ရက် မနက် ၄ နာရီဝန်းကျင်အချိန်က မန္တလေး အိုးဘိုထောင်ထဲက နိုင်ငံရေးအကျဉ်းသားတွေကို ထောင်ပြောင်းရွှေ့တာတွေပြုလုပ်ခဲ့ပါတယ်။ 

အိုးဘိုထောင်နဲ့နီးစပ်သူတွေရဲ့ပြောဆိုချက်တွေအရ နိုင်ငံရေးအကျဉ်းသား ၁၂၀ ဝန်းကျင်ကို သံခြေချင်းခတ်ပြီး ရှမ်းပြည်နယ်၊ တောင်ကြီးမြို့နယ် တောင်လေးလုံးထောင်ကို ရွှေ့ပြောင်းတာလို့ သိရပါတယ်

ရွှေ့ပြောင်းခံရတဲ့အကျဉ်းသားတွေထဲမှာ တိုက်ပိတ်ခံထားရတဲ့ ဗကသ ကျောင်းသားခေါင်းဆောင်တွေ၊ နိုင်ငံရေးတက်ကြွလှုပ်ရှားသူတွေနဲ့ သပိတ်ခေါင်းဆောင်တွေ ပါဝင်ခဲ့ပါတယ်။ 

အိုးဘိုထောင်ထဲမှာ စက်တင်ဘာလအစောပိုင်းက နိုင်ငံရေးအကျဉ်းသားတွေက အစာငတ်ခံဆန္ဒပြခဲ့တယ်လို့ ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ်က ထုတ်ပြန်ပြီးနောက်ပိုင်း အခုလိုထောင်ပြောင်းရွှေ့တဲ့သတင်းတွေ ထွက်ပေါ်လာတာပါ။

မိုးကုတ်သပိတ်ခေါင်းဆောင် ကိုစိုးဌေးက "ရုပ်ပိုင်းဆိုင်ရာ စိတ်ပိုင်းဆိုင်ရာ ညဉ်းပန်းနှိပ်စက်တယ်။ အဲ့ဒီထက်ဆိုးရင် သတ်ဖြတ်တယ်ပေါ့နော်။ သူကတော့ အာဏာရှင်စရိုက်ကို ပီပီပြင်ပြင် သရုပ်ဖော်နေတာပေါ့နော်။ ကျနော်တို့ တော်လှန်ရေးအင်အားစုတွေအနေနဲ့ကတော့ အကျဉ်းထောင်တွေထဲမှာ သေသလားရှင်သလားမသိရဘူး။ ကျန်းမာရေးအခြေအနေ ဘယ်လိုရှိနေလဲမသိရဘူး။ ဘယ်ကိုရွှေ့လိုက်တယ်ဆိုတာမသိရဘူး။ ဘယ်မှာဘယ်လို နေနေရတယ်ဆိုတာ မသိရဘူး။ ဒါတွေအကုန်လုံးက အာဏာရှင်ရဲ့လူ့အခွင့်အရေးကို စနစ်တကျချိုးဖောက်တဲ့ ဆိုးကျိုးကနေလွတ်မြောက်ဖို့ အား နှစ်ဆထပ်တင်ပါ။ အားပိုစိုက်ပါ။ ဒီထက်ပိုပြီးတော့မှ ဝိုင်းဝန်းကြိုးစားပေးကြပါလို့ မေတ္တာရပ်ခံချင်ပါတယ်။"လို့ ပြောပါတယ်။

ပဲခူးတိုင်း၊ သာယာဝတီထောင်မှာ CDM ဝန်ထမ်းတွေအပါအဝင် နိုင်ငံရေးအကျဉ်းသား ၂၀ ကျော်ကို စစ်ကောင်စီက အလုပ်ကြမ်းတွေစေခိုင်းပြီး အကြမ်းဖက်ရိုက်နှက်တာတွေပြုလုပ်နေတယ်လို့ အောက်တိုဘာလဆန်းပိုင်းမှာ သတင်းတွေထွက်ပေါ်ခဲ့ပါတယ်။

အာဏာသိမ်းကာလအတွင်း စစ်တပ်နဲ့အပေါင်းပါတွေရဲ့ အကြမ်းဖက် ပစ်ခတ် သတ်ဖြတ်မှုတွေကြောင့် သေဆုံးခဲ့ရတဲ့ ပြည်သူ ၂၃၀၀ ကျော်အထိရှိခဲ့ပါတယ်။ ဒါ့အပြင် မိသားစုနဲ့ အဆက်အသွယ်ပြတ်ပြီး စာရင်းပျောက်နေတဲ့လူငယ်တွေ၊ ဘယ်အကျဉ်းထောင် ဘယ်စစ်ကြောရေးကို ရောက်နေတယ်ဆိုတာ သတင်းမရတဲ့ပြည်သူတွေလည်း အများအပြားရှိနေခဲ့တာပါ။ 

ဖမ်းဆီးထိန်းသိမ်းခံရသူတွေဟာ ရဲစခန်းမှာ ဖမ်းဆီးခံရစဉ် ငွေညှစ်ခံရတာ၊ စစ်ကြောရေးမှာ ညှဉ်းပန်းနှိပ်စက်ခံရတာတွေရှိနေသလို  ဥပဒေရဲ့အကာအကွယ်ကိုမရကြဘဲ စစ်ကောင်စီရဲ့ စီမံချင်သလိုစီမံပြီး တရားစွဲဆိုထောင်ချတာတွေကို ရင်ဆိုင်နေကြရတာဖြစ်ပါတယ်။ 

စစ်အာဏာသိမ်းပြီးနောက်ပိုင်း နိုင်ငံတဝန်း စစ်ကောင်စီက ဖမ်းဆီးတရားစွဲဆိုတာခံရသူ ၁၂၆၀၀ ကျော်အထိရှိနေတယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP ရဲ့ အောက်တိုဘာလ ၁၄ ရက်နေ့အထိ မှတ်တမ်းအရ သိရပါတယ်။