ဧရာဝတီတိုင်း၊ ဒေးဒရဲမြို့နယ်မှာ သက်ငယ်မုဒိန်းမှုနဲ့ ဖမ်းဆီးခံထားရသူတယောက် ရဲစခန်းအချုပ်ကနေ ထွက်ပြေးလွတ်မြောက်သွားပြီး ၃ ရက်ကြာတဲ့အထိ ပြန်ဖမ်းမမိသေးဘူးလို့ သိရပါတယ်။
သက်ငယ်မုဒိန်းမှု ကျူးလွန်မှုနဲ့ ဖမ်းဆီးထားတဲ့ အောင်သူရဇော်ဆိုသူမှာ ဇန်နဝါရီ ၂၃ ရက်က ဒေးဒရဲမြို့မ ရဲစခန်းမှာ အိမ်သာတက်ချိန်မှာ ထွက်ပြေးလွတ်မြောက်သွားတာလို့ ရဲတပ်ဖွဲ့အသိုင်းဝိုင်းက သိရပါတယ်။
“သူက အိမ်သာသွားမယ်ဆိုပြီး အိမ်သာနောက်ကနေ ထွက်ပြေးသွားတာ ပြန်မမိသေးဘူး သက်ငယ်မုဒိန်းမှုက အမှုကြီးထဲမှာပါတယ် စုံခုံစစ်ဖို့တော့ လုပ်နေတယ်ကြားတယ်”လို့ ရဲတပ်ဖွဲ့နဲ့နီးစပ်သူတဦးက ပြောပါတယ်။
အချုပ်သားတဦး ထွက်ပြေးလွတ်မြောက်သွားရင် အရပ်သာအစိုးရလက်ထက်က ကင်းမှာ တာဝန်ရှိသူတွေကို ထောင် ၃ နှစ်ချတာတွေရှိပြီး အာဏာသိမ်းစစ်တပ်လက်ထက်မှာတော့ အရေးယူဖို့ ရှိ မရှိ မသိရသေးပါဘူး။
သက်ငယ်မုဒိန်းမှုကျူးလွန်ထားသူ ထွက်ပြေးလွတ်မြောက်သွားတဲ့ ရဲစခန်းမှာ ရဲတွေရော စစ်သားတွေပါ အချိန်ပြည့် ကင်းစောင့်တာတွေရှိနေချိန်မှာ ခုလို ထွက်ပြေးလွတ်မြောက်သွားတဲ့ အပေါ် ဒေသခံတွေအကြား ပိုက်ဆံယူပြီး လွှတ်ပေးသလားဆိုတဲ့ ဝေဖန်မှုတွေလည်း ရှိနေပါတယ်။
ထိုင်းနိုင်ငံအနောက်ပိုင်း ကန်ကျနပူရီခရိုင်ထဲမှာ တရားမဝင် ဝင်ရောက်လာတဲ့ မြန်မာနိုင်ငံသားတွေ ရက်ခြားဆိုသလို ဖမ်းဆီးခံနေရတာမှာ စက်တင်ဘာ ၂၇ ရက်နေ့ကလည်း နောက်ထပ် ၁၃ ဦး အဖမ်းခံရပြီး ၉ ဦး ထွက်ပြေးလွတ်မြောက်သွားပါတယ်။
ကန်ကျနပူရီခရိုင် ကန်ကျနပူရီမြို့ ဘန့်ကောင်ကျေးရွာအုပ်စုရှိ တောအုပ်ထဲမှာ မသင်္ကာ ဖွယ်လူတစ်စုရောက်ရှိနေကြောင်း ရွာသားတွေက အကြောင်းကြားလာတဲ့အတွက် စက်တင်ဘာ ၂၇ ရက် မနက်ပိုင်းက နယ်မြေခံရဲ၊ စစ်တပ်နဲ့ အုပ်ချုပ်ရေးပိုင်းဆိုင်ရာ တာဝန်ရှိသူတွေနဲ့အတူ သွားရောက်ပိတ်ဆို့ဖမ်းဆီးခဲ့တယ်လို့ ဘန့်ကောင်အုပ်စု နယ်မြေ ၇ ကျေးရွာအုပ်ချုပ်ရေးမှူးက သတင်းထောက်တွေကို ပြောပါတယ်။
တာဝန်ရှိသူတွေက မင်္ကာသူတွေရှိရာတဝိုက်ကို လူစုခွဲပိတ်ဆို့ထားပေမယ့် အဆိုပါလူ တွေက သူတို့ကိုလှမ်းမြင်ကတည်းက တောတောင်ထဲကို ထွက်ပြေးသွားကြကြောင်း ထွက်ပြေးသူတွေကို လိုက်လံဖမ်းဆီးရာမှာ ၁၃ ဦးသာ ဖမ်းမိတယ်လို့ ဆိုပါတယ်။
စစ်ဆေးမေးမြန်းချက်အရ သူတို့ဟာ မြန်မာနိုင်ငံ မော်လမြိုင် နဲ့ ရန်ကုန်ဘက်ကလာတာဖြစ်ကြောင်း၊ ထိုင်းမှာအလုပ်လုပ်ဖို့ ပွဲစားခ တစ်ဦးကို ဘတ် ၂၂၀၀၀ စီပေးရပြီး သူတို့အဖွဲ့မှာ ၂၂ ဦး ဝင်လာတာကာ ထိုင်းနိုင်ငံအတွင်းပိုင်းဝင်ဖို့ အဆိုပါ တောအုပ်ကနေ အဆက်အသွယ်စောင့်ဆိုင်းနေစဉ် ဖမ်းဆီးခံရတာလို့ ဆိုပါတယ်။
တာဝန်ရှိသူတွေက သူတို့ကို ဓာတ်ပုံရိုက်၊ ကိုယ်ရေးမှတ်တမ်းယူထားပြီး ပြည်နှင်ဒဏ်ပေးသွားမယ်လို့ ပြောပါတယ်။
အဆိုပါ ဘန့်ကောင်အုပ်စု တောတောင်ထဲမှာပဲ စက်တင်ဘာ ၂၆ ရက်နေ့က တရားမဝင်ဝင်ရောက်လာသူ ၁၂ ဦး၊ စက်တင်ဘာ ၂၄ ရက်နေ့က ၁၀ ဦး နဲ့ ၂၃ ရက်နေ့က ၁၄ ဦး ဖမ်းဆီးရမိတာကြောင့် စက်တင်ဘာ ၂၃ မှ ၂၇ ထိ ၅ ရက်အတွင်း တရားမဝင် ဝင်ရောက်လာတဲ့ မြန်မာနိုင်ငံသား ၅၀ နီးပါးအဖမ်းခံရပြီး သူတို့တွေဟာ ပွဲစားခ ဘတ် ၁၆၀၀၀ မှ ၂၂၀၀၀ ထိ ပေးခဲ့ရပါတယ်။ ကိုးကား - #MGR_THAICRIME
