ရခိုင်ပြည်နယ်၊ မောင်တောမြို့နယ်မှာ အထွေထွေအုပ်ချုပ်ရေးဦးစီးဌာန ဝန်ထမ်းတယောက် အသက်ခံခဲ့ရတာနဲ့ ပတ်သက်ပြီး တရားခံအစစ်ကို ဖမ်းမမိသေးဘဲ အသက် ၁၈ နှစ်မပြည့်သေးတဲ့ ကလေး ၂ ယောက်ကို လူသတ်ရာမှာ ပူးပေါင်းပါဝင်မှုနဲ့  ဖမ်းဆီးအမှုဖွင့် စစ်ဆေးနေပါတယ်။ 

မောင်တောမြို့နယ် မြင်းလွတ်ထွေ/အုပ်ဝန်ထမ်း ကိုဆန်းဌေးနိုင် (၂၆ နှစ်)ဟာ ၂၀၂၁ ခုနှစ် ဒီဇင်ဘာ ၂၂ ရက် ညသန်းခေါင်  ၁၂ နာရီလောက်က မောင်တောမြို့ စက်လှေဆိပ်အနီး အသတ်ခံလိုက်ရတာပါ။

လက်ရှိမှာတော့ အဆိုပါလူသတ်မှုမှာ ပူးပေါင်းပါဝင်ခဲ့တယ်လို့ စွပ်စွဲခံရတဲ့  အသက် ၁၈ နှစ်အောက် ကလေးငယ် ၂ ဦးကို ရာဇသတ်ကြီးပုဒ်မ ၃၀၂/၁၁၄ နဲ့ အမှုဖွင့် တရားစွဲတင်ထားပြီး သူတို့ရဲ့ ထွက်ဆိုချက်တွေအရ တရားခံအစစ်အမှန်မှာ အသက် ၂၃ နှစ်အရွယ် အိစ္စမိုင် (ခ) မူမတ်အိစ္စမိုင် (ဘ) မာမတ်အိဆိတ် ဖြစ်ကြောင်း ရဲမှတ်တမ်းတွေအရ သိရပါတယ်။

အမည်မဖော်လိုတဲ့ ရဲအရာရှိတဦးက “အသက်မပြည့်ဆိုပြီး ကလေးသူငယ်ဥပဒေပုဒ်မကို ဗန်းပြပြီး အမှုဆုံးဖြတ်လို့တော့ မရဘူး။ လူသတ်မှုမှာ ပါဝင်သူတွေကို ထိရောက်စွာ အပြစ်ပေးဖို့လိုသလို တဖက်နိုင်ငံကို ထွက်ပြေးနေတဲ့ တရားခံအစစ်ကိုလည်း အာဏာပိုင်တွေအနေနဲ့ နှစ်နိုင်ငံ စကားပြောပြီး ဖမ်းဆီးနိုင်ဖို့လိုတယ်။ ဒါမှ ဒီဒေသမှာ မှုခင်းတွေ ကျဆင်းသွားမှာဖြစ်တယ်။ အခုက မြန်မာဘက်မှာ ပြစ်မှုကျူးလွန်တယ်၊ ဘင်္ဂလားဘက်ကို တိမ်းရှောင်နေတယ်” လို့ ပြောပါတယ်။

အခုလို လူသတ်မှုဖြစ်ပြီးအချိန် ၆ လကျော်ကြတဲ့အထိ တရားခံအစစ်ကို ဖမ်းမမိသေး​တဲ့အတွက် အာဏာပိုင်တွေအနေနဲ့ အဓိက တရားခံကို ထိရောက်စွာ ဖမ်းဆီးအရေးယူပေးဖို့ မိသားစုဝင်တွေက တောင်းဆိုထားကြပါတယ်။

အသတ်ခံရသူရဲ့ ဖခင်ဖြစ်သူ ကိုအောင်ဌေးက “ကျနော့်သားကို အမှန်သတ်သွားတဲ့ လူသတ်တရားခံက လက်ရှိမှာ ဘင်္ဂလားဒေ့ရှ်နိုင်ငံ ဘင်ဒရော်ဘင် နယ်စပ်ကုန်သွယ်ရေးစခန်းမှာ ကုန်တင်ကုန်ချအလုပ်တွေကို လုပ်နေတယ်လို့ အတိအကျ သိထားတယ်။ ဒါပေမဲ့ မြန်မာအစိုးရ အာဏာပိုင်တွေအနေနဲ့ ဘင်္ဂလားအစိုးရကို အကြောင်းကြားပြီး ဖမ်းဆီးပေးတာ ယနေ့အထိ မရှိသေးဘူး။ ပညာရေးဝန်ထမ်း ၂ ဦး ပြန်ပေးဆွဲခံရတာတော့ နှစ်နိုင်ငံညှိနှိုင်းပြီး ပြန်ခေါ်နိုင်ခဲ့တယ်။ ကျနော့်သားလည်း ထွေအုပ်ဝန်ထမ်းတဦးပါ။ အခုလို ဥပေက္ခာမပြုထားသင့်ဘူး” လို့ ပြောပါတယ်။

လက်ရှိမှာတော့ လူသတ်မှုမှာ ပူးပေါင်းပါဝင်မှုနဲ့ စွပ်စွဲခံရတဲ့  အသက် ၁၈ နှစ်အောက် ကလေး နှစ်ယောက်ဖြစ်တဲ့  ဟာဆာအာရာဖက်နဲ့ နော်ဘဲလ်ဟူဆောင်းတို့ကို မောင်တောမြို့နယ်တရားရုံးမှာ စစ်ဆေးနေဆဲဖြစ်ကြောင်း စွပ်စွဲခံရသူတွေဘက်က လိုက်ပါဆောင်ရွက်‌နေတဲ့  ရှေ့နေထံက သိရပါတယ်။

အဆိုပါ လူသတ်မှုနဲ့ ပတ်သက်ပြီး စွပ်စွဲခံထားရတဲ့ ကလေး ၂ နှစ်ယောက်နဲ့ ဘင်္ဂလားဒေ့ရှ်ရောက် အိစ္စမိုင် (ခ) မူမတ်အိစ္စမိုင် တို့ဘက်ကတော့ စွပ်စွဲချက်တွေမှန်ကန်မှု ရှိမရှိ ပြန်လည်ပြောဆိုနိုင်တဲ့ အခွင့်အရေး မရရှိသေးပါဘူး။   

စစ်ကိုင်းတိုင်းဒေသကြီး၊ စစ်ကိုင်းခရိုင်ထွေအုပ်ရုံးက အကြီးတန်းစာ‌ရေး ၃ ဦးအပါအဝင် ရုံးစောင့်အထိ ၁၅ ဦးကို အကြမ်းဖက် အာဏာသိမ်းစစ်ကောင်စီက အလုပ်ထုတ်လိုက်တယ်လို့ သိရပါတယ်။

အာဏာသိမ်းစစ်ကောင်စီအောက်မှာ တာဝန်ထမ်းဆောင်လိုခြင်မရှိလို့ စစ်အာဏာဆန့်ကျင်ရေး အာဏာဖီဆန်ရေးလှုပ်ရှားမှု (CDM) မှာပါဝင်ခဲ့တဲ့အတွက် မတ်လ ၁၇ ရက်စွဲနဲ့ အလုပ်က စာထုတ်တာပါ။

ထုတ်ပြန်စာထဲမှာတော့ ဝန်ထမ်း ၁၅ ဦးဟာ နိုင်ငံ့ဝန်ထမ်းဥပဒေ (၃၈)၊ နိုင်ငံဝန်ထမ်းနည်းဥပဒေများအပိုဒ် (၁၆၃)၊ အပိုင်ခွဲ (ဖ) တို့ပါ ပြဌာန်းချက်တွေကို မလိုက်နာဘဲ ခွင့်မဲ့ပျက်ကွက် ကျူးလွန်ခဲ့တာကြောင့် အလုပ်က ထုတ်ပယ်လိုက်တာလို့ ဖော်ပြထားပါတယ်။