စစ်ကိုင်းတိုင်း၊ ဒီပဲယင်းမြို့၊ မဲအိုးရွာဘုန်းကြီးကျောင်းမှာ သိမ်းဆည်းထားတဲ့ ဆန်တွေကို စစ်ကောင်စီတပ်က ဘိလပ်မြေတွေနဲ့ရောကာ ရည်ရွယ်ချက်ရှိရှိ မီးရှို့ဖျက်ဆီးခဲ့ကြတာကြောင့် ဒေသခံပြည်သူတွေ စားနပ်ရိက္ခာ အခတ်အခဲတွေနဲ့ ကြုံတွေ့နေရတယ်လို့ သိရပါတယ်။
စစ်ကောင်စီတပ်က ဒီပဲယင်းမြို့ မဲအိုးရွာ အနီးဝန်းကျင်ရှိ ကျေးရွာတွေကို လိုက်လံမီးရှို့ ဖျက်ဆီးနေချိန်ကတည်းက အိမ်ရှိဆန်တွေကို လတ်တလောစားဖို့သာချန်ပြီး ရွာဘုန်းကြီးကျောင်းမှာ သွားရောက်သိမ်းဆည်းထားခဲ့ကြတာလို့ ဒေသခံတဦးက ပြောပါတယ်။
“ရွာကိုမီးရှို့ရင် ဆန်တွေပါသွားမှာစိုးရိမ်လို့ ဘုန်းကြီးကျောင်းမှာ သွားထားကြတာ။ ဘုန်းကြီးကျောင်းပါ မီးရှို့သွားတော့ ကုန်ရော။ တရွာလုံးကဆန်တွေ အဲ့မှာ သွားထားကြတာ အများကြီးပဲ။ အရေအတွက်က မနည်းဘူး။ စစ်(--) တွေလုပ်သွားတာ သဲတွေ ဘိလပ်မြေတွေနဲ့ ဆန်တွေကိုရော စားဆီတွေလောင်းပြီး မီးရှို့သွားတယ်။ တချို့ဟာတွေကြတော့လည်း သူတို့ယူသွားတယ်။ သယ်လို့မနိုင်တဲ့ဟာတွေကို မီးရှို့ထားခဲ့တာ။”
မီးဘေးသင့်ပြည်သူတွေကို ကူညီပေးနေတဲ့ S&C က “စစ်တပ်က ဒီပဲယင်းမြို့နယ်ထဲ မီးပတ်ရှို့နေတော့ သူတို့ဆီလည်း လာမယ်ဆိုတာ ကြိုတွေးရုံနဲ့ သိကြတာပေါ့။ နောက်တော့ သူတို့ပါ ပါသွားရော။ ဆန်တွေကို ဘယ်သူမှပြန်မယူဘူးလေ။ ပြန်ယူလို့မရအောင်လည်း ဘိလပ်မြေတွေနဲ့ရောပြီး မီးရှို့သွားတာကို။ အခု S&C အဖွဲ့က တတ်နိုင်သလောက် ထောက်ပံ့မှုတွေ ပေးထားပါတယ်။ တဲအိမ်လေးတွေ ဆောက်ပေးဖို့လည်း စီစဉ်ထားပါတယ်။ နေ့စဥ်ရက်ဆက် စစ်ရှောင်တွေအတွက် ကျွေးမွေးမှုက အခက်အခဲ နည်းနည်းရှိလာပါတယ်။ ကုန်ဈေးနှုန်းတွေကလည်း အဆမတန်တက်နေတော့ လူတိုင်းစေ့ ထောက်ပံ့ပေးနိုင်ဖို့ ကြန့်ကြာလာတယ်။ သူတို့တွေ အရေးပေါ်လိုအပ်နေတဲ့ စောင်နဲ့ ခြင်ထောင်တွေ ခွဲဝေပေးထားတယ်” လို့ ဒီဗွီဘီကို ပြောပါတယ်။
ဒီပဲယင်းမြို့နယ်အတွင်းက မီးဘေး စစ်ဘေး ပညာရေးစောင့်ရှောက်ရေးအဖွဲ့ S&C မှ ကူညီထောက်ပံ့ပေးထားတဲ့ စစ်ရှောင်စခန်းတခုမှာ မီးဘေး၊ စစ်ဘေး လာရောက် ရှောင်တိမ်းနေသူ ဦးရေ ၁,၀၀၀ ဝန်းကျင်ရှိတယ်လို့ ဆိုပါတယ်။
စစ်ကောင်စီတပ်ဟာ မဲအိုးကျေးရွာကို ဒီဇင်ဘာ ၁၀ ရက်ကနေ ၁၁ ရက်နေ့အထိ ၂ ရက် ဆက်တိုက် မီးရှို့ဖျက်ဆီးခဲ့တာကြောင့် ဘုန်းကြီးကျောင်း အပါအဝင် အိမ်ခြေ ၉၀ နီးပါး မီးရှို့ခံလိုက်ရပြီး အိမ်ခြေ ၈၀ မီးလောင်ပြာကျကာ ဒေသခံအများအပြား အိုးမဲ့အိမ်မဲ့ ဖြစ်ခဲ့ရပါတယ်။
စစ်ကိုင်းတိုင်း၊ ကန့်ဘလူမြို့နယ်၊ ကံကြီးရွာက စပါးရိတ်နေတဲ့ လယ်သမားတွေကို ဒီဇင်ဘာ ၈ ရက် မနက် ၁၀ နာရီမှာ စစ်တပ်က ပစ်ခတ်ခဲ့တာကြောင့် လယ်သမား ၂ ဦး ဒဏ်ရာရရှိခဲ့တယ်လို့ ကန့်ဘလူမြို့နယ် ဒေသခံတွေက ပြောပါတယ်။
ခမရ-၃၆၉ စစ်ကောင်စီတပ်က ပစ်ခတ်ခဲ့တာကြောင့် အသက် ၃၀ အရွယ်အမျိုးသား တယောက်က ခါးနဲ့ လက်မောင်းမှာ ဒဏ်ရာရရှိခဲ့ပြီး နောက် ၄၂ နှစ်အရွယ် အမျိုးသားကတော့ ညာဘက်ခြေထောက် ကျည်ဆန်မှန်ပြီး ခြေထောက် ကျိုးသွားခဲ့ကာ အသက်အန္တရာယ်ကတော့ မစိုးရိမ်ရဘူးလို့ ကန့်ဘလူမြို့နယ် ဒေသခံရွာသားတဦးက ပြောပါတယ်။
“စခတွေက မနက်ခင်း ၈ နာရီလောက်က ချပ်သင်းရွာကနေ ဝက်သအင်းရွာဘက်ကို စစ်ကြောင်းထိုးလာတယ်။ မနက် ၁၀ နာရီခွဲအချိန်ခန့်ကြာေတာ့ ဝက်သအင်းနဲ့ ပုဏ္ဏားရွာကြားမှာ စပါးရိတ်နေတဲ့ လယ်သမားတွေကို လက်နက်ငယ်တွေနဲ့ စပစ်တယ်။ အကုန်လုံး ကြောက်ပြီး ထွက်ပြေးကြရတယ်ဗျ။ နှစ်ယောက်ကတော့ ကျည်ထိမှန်ပြီး ဒဏ်ရာရရှိထားတယ်။ ဒဏ်ရာရရှိတဲ့သူ နှစ်ယောက်လုံးက ကံကြီးရွာက လယ်သမားတွေပါဗျ။”
စစ်ကောင်စီစစ်ကြောင်းဟာ အင်အား ၈၀ လောက်ရှိပြီး ပုဏ္ဏားကြီးရွာအတွင်း ဝင်ရောက်ရှာဖွေကာ ဒေသခံအမျိုးသမီး ၃ ဦးနဲ့ အမျိုးသား ၁ ဦးကိုလည်း ညက ဖမ်းဆီးခေါ်ဆောင်သွားခဲ့ပါတယ်။ အဲဒီစစ်ကြောင်းဟာ လက်ရှိအချိန်မှာ ဝက်သအင်းကျေးရွာမှာ စခန်းချ ညအိပ်နေထိုင်နေတယ်လို့လည်း ဒေသခံတွေက ပြောပါတယ်။
စစ်ကိုင်းတိုင်း၊ ဒီပဲယင်းမြို့နယ်မှာတော့ နိုဝင်ဘာ ၃၀ ရက်ကစပြီး ဒီဇင်ဘာ ၈ ရက်နေ့အထိ ကျေးရွာပေါင်း ၁၂ ရွာကို စစ်ကောင်စီတပ်က မီးရှို့ဖျက်ဆီးခဲ့ရာ စစ်ဘေးမီးဘေးသင့်ပြည်သူ ၁၀,၀၀၀ ကျော် စားဝတ်နေရေး အခက်အခဲ ဖြစ်နေတယ်လို့ ဒီပဲယင်းမြို့နယ် ညီနောင်များအဖွဲ့ တာဝန်ခံက ပြောပါတယ်။
“အခုဆို စစ်ကြောင်းဝင်လာတဲ့နေ့ကရောဆို ၁၀ ရက်ရှိပြီ။ စစ်ရှောင်တွေ ကူညီရေးလည်း နေရာအစုံ မျှဝေကူညီနေရတော့ ခက်ခဲလာခဲ့ပြီ။ ရွာတွေလည်း ပြာကျနေရပြီ။”
နိုဝင်ဘာ ၃၀ ရက်က ရေဦးဘက်ကနေဝင်လာကာ ၁ ရက်နေ့ကစပြီး ရေဦး၊ ဒီပဲယင်းနယ် အစပ်က ပျော်ဘွယ်ရွာနဲ့ မစိုးရိမ် ၂ ရွာကို စရှို့ခဲ့လို့ အိမ်ခြေ ၂၀ လောက် မီးလောင်ဆုံးရှုံးသွားတယ်လို့ ဆိုပါတယ်။
ဒီဇင်ဘာ ၁ ရက်ကနေ စတင်မီးရှို့ခဲ့တာ ရွာ ၁၂ ရွာ ဘုန်းကြီးကျောင်း ၃ ကျောင်း မီးလောင်ပြာကျခဲ့ပြီး စစ်ဘေးရှောင် ၁၀,၀၀၀ ကျော်လောက်ရှိနေကာ စားဝတ်နေရေး အခက်အခဲ အကျပ်အတည်းတွေ ဖြစ်နေတယ်။
စစ်ဘေးရှောင်ပြည်သူတွေဟာ နီးစပ်ရာ ဘုန်းကြီးကျောင်း၊ စာသင်ကျောင်းတွေမှာ ခိုလှုံနေကြပြီး ဆောင်းရာသီဖြစ်တဲ့အတွက် နေထိုင်စရာခက်ခဲကာ မြို့နယ်အတွင်းက ကူညီထောက်ပံ့ပေးနေရတယ်လို့ ဒီပဲယင်းမြို့နယ် ညီနောင်များ တာဝန်ခံက ပြောပါတယ်။
“စစ်ရှောင်တွေ မီးဘေးသင့်တွေအတွက် တတ်နိုင်သလောက် အကူအညီပေးကြဖို့သာ မေတ္တာရပ်ခံချင်ပါတယ်။ အရင်မီးရှို့ခံရတာတွေ ကူညီလို့ မပြီးသေးခင် မီးထပ်ရှို့နေတော့ ဆက်ကူညီဖို့ ပိုခက်ခဲသွားတယ်” လို့ ဒီပဲယင်းမြို့နယ်ညီနောင်များတာဝန်ခံက ပြောပါတယ်။
ပြီးခဲ့တဲ့လပိုင်းတွေက စစ်ဘေးရှောင်နဲ့ စစ်ကောင်စီက မီးရှို့လို့ မီးဘေးသင့်ပြည်သူတွေကို မြို့နယ်အတွင်းရှိ ပြည်သူတွေရဲ့ အလှူငွေနဲ့ အခြေခံစားသောက်ကုန်နဲ့ ငွေအနည်းငယ်ဆီ ကူညီထောက်ပံ့ပေးခဲ့တယ်လို့ ဒီပဲယင်းမြို့နယ်ညီနောင်များအဖွဲ့က ဆိုပါတယ်။
